গাজাৰ বিতৰ্কিত সাহায্য শিবিৰত বিশৃংখলতা। কাজিয়া, লুণ্ঠন, গুলীচালনাৰে ক্ষন্তেকতে যুদ্ধক্ষেত্ৰলৈ পৰিণত হ’ল সাহায্য শিবিৰটো। মঙলবাৰে ‘গাজা হিউমেনিটেৰিয়ান ফাউণ্ডেশ্যন’ (জি এইচ এফ) নামৰ এটা বেচৰকাৰী সংস্থাই ভোকাতুৰ বাসিন্দাসকলৰ বাবে খাদ্য আৰু সাহায্য লৈ ৰাফালৈ গৈছিল। ঘটনাক্ৰম অনুসৰি বেৰিকেড লগোৱা এলেকাত সাহায্য ভৰ্তি ট্ৰাকৰ পৰা খাদ্য বিতৰণ কৰা হৈছিল। হাজাৰ হাজাৰ পেলেষ্টাইনী সেই খাদ্যৰ অপেক্ষাত আছিল। ঘণ্টাৰ পিছত ঘণ্টা অপেক্ষা কৰাৰ পিছত হঠাতে তেওঁলোকৰ ধৈৰ্য্য হেৰুৱাই। বেৰিকেড ভাঙি ৰিলিফ ভৰ্তি ট্ৰাকখনৰ ফালে এটা গোট আগবাঢ়ি আহে আৰু লুটপাত আৰম্ভ কৰে। খবৰ অনুসৰি পৰিস্থিতি নিয়ন্ত্ৰণ কৰিবলৈ ইজৰাইল সেনাই হেলিকপ্টাৰৰ পৰা গুলীচালনা কৰিবলৈ বাধ্য হয়। ইয়াৰ ফলত বহু লোক পদ পিষ্ট হৈ বহু লোকৰ মৃত্যু হোৱাৰ লগতে আঘাত প্ৰাপ্ত হয়।
এই ঘটনাই সমগ্ৰ বিশ্বতে আলোড়নৰ সৃষ্টি কৰিছে। ৰাষ্ট্ৰসংঘইও এই ঘটনাৰ তীব্ৰ গৰিহণা দিছে। কিন্তু ইতিমধ্যে এই বেচৰকাৰী সংস্থাটোৰ সাহায্য শিবিৰ সন্দৰ্ভত বিতৰ্কৰ সৃষ্টি হৈছিল। অভিযোগ উত্থাপন হৈছে যে ৰাষ্ট্ৰসংঘক অন্ধকাৰত ৰাখি সকাহ দিয়াৰ নামত আমেৰিকা আৰু ইজৰাইলে গাজালৈ সশস্ত্ৰ বাহিনী প্ৰেৰণ কৰিছে। সামৰিক আৰু ৰাজনৈতিক লক্ষ্যত উপনীত হোৱাৰ আহিলা হিচাপে ব্যৱহাৰ কৰা হৈছে এই সাহায্য শিবিৰ। কেৱল ৰাষ্ট্ৰসংঘই নহয়, অন্যান্য মিত্ৰ সংগঠনসমূহেও জি এইচ এফৰ ওপৰত আপত্তি প্ৰকাশ কৰিছিল। কেৱল এয়াই নহয়, এই সংস্থাটোৰ সাহায্য বিতৰণৰ অভিজ্ঞতা বা সামৰ্থ্য নাই বুলিও অভিযোগ উত্থাপন হৈছিল। অৱশ্যে সোমবাৰৰ পৰা ৰাফাত সাহায্য শিবিৰ আৰম্ভ কৰা বুলি সংগঠনটোৱে জানিবলৈ দিয়ে। কিন্তু পিছদিনা সেই সাহায্য শিবিৰত এক মৰ্মান্তিক ঘটনা সংঘটিত হয়।
গাজাত হামাছৰ সৈতে জড়িত চৰকাৰী সংবাদ মাধ্যমৰ কাৰ্যালয়ে এক বিবৃতিত কয় যে ইজৰাইলৰ দখলদাৰী সেনাই সাধাৰণ ভোকাতুৰ লোকৰ ওপৰত প্ৰত্যক্ষ গুলীচালনা কৰে। মানৱীয় সাহায্য প্ৰদানৰ নামত সেই অঞ্চললৈ মাতি অনা হৈছিল ভোকাতুৰ ৰাইজক। ৰাফাত যি ঘটিল সেয়া ইচ্ছাকৃতভাৱে কৰা হত্যাকাণ্ড। কেৱল এয়াই নহয়, ই এক যুদ্ধাপৰাধ বুলি উল্লেখ কৰিছে। এই হত্যাকাণ্ড পৰিকল্পিত ভাবে সংঘটিত হৈছিল বুলি অভিযোগ কৰিছে। আনহাতে উত্তৰ গাজাত ইজৰাইলী সেনাই এজন সাংবাদিকৰ ঘৰত বোমা নিক্ষেপকৰা ফলত আঠজন লোক নিহত হোৱাৰ খবৰ পোৱা গৈছে।
অৱশ্যে ইজৰাইলী সেনাই কোনো ভোকাতুৰ ব্যক্তিক গুলী চলোৱা নাছিল বুলি দাবী কৰিছে। ৰাইজক নিয়ন্ত্ৰণ কৰিবলৈ বতাহত গুলীচালনা কৰা বুলি উল্লেখ কৰিছে। ইজৰাইলে সাহায্যৰ প্ৰৱেশ নিষিদ্ধ কৰা বাবে প্ৰায় তিনিমাহ ধৰি যুদ্ধবিধ্বস্ত গাজালৈ কোনো বহিঃৰাজ্যৰ পৰা সাহায্য প্ৰদান কৰিব পৰা নাছিল।
কিছুদিন পূৰ্বে আন্তঃৰাষ্ট্ৰীয় পৰ্যায়ৰ পৰা প্ৰবল হেঁচা প্ৰদান কৰাত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে গাজাত সাহাৰ্যৰ বাবে প্ৰৱেশৰ অনুমতি দিছিল। ইয়াৰ পিছত ৰাষ্ট্ৰসংঘৰ কেইবাখনো ট্ৰাকে সাহায্য কঢ়িয়াই গাজাত প্ৰৱেশ কৰে। কেৱল ৰাষ্ট্ৰসংঘই নহয়, কিছুমান বেচৰকাৰী সংস্থা (এন জি অ’)ৰ ট্ৰাকেও সাহায্য কঢ়িয়াই লৈ গৈছে। আমেৰিকা সমৰ্থিত ‘গাজা হিউমেনিটেৰিয়ান ফাউণ্ডেশ্যন’ও সেই তালিকাত আছিল বিলি জানিব পৰা গৈছে।
