উত্তৰাখণ্ডৰ আলমোৰা জিলাৰ ডাবৰা গাঁৱৰ এখন চৰকাৰী বিদ্যালয়ৰ সমীপৰ পৰা বিপুল পৰিমাণৰ বিস্ফোৰক (জেলেটিন ষ্টিক) উদ্ধাৰ হোৱাৰ ঘটনাই সমগ্ৰ দেশতে চাঞ্চল্যৰ সৃষ্টি কৰিছে। বিদ্যালয়খনৰ অধ্যক্ষ সুভাষ সিঙৰ তৎপৰতাৰ বাবে শনিবাৰে এই ঘটনা পোহৰলৈ আহে।
আৰক্ষীৰ সূত্ৰৰ পৰা জানিব পৰা মতে বিদ্যালয়খনৰ অধ্যক্ষ সুভাষ সিঙে বিদ্যালয়খনৰ সমীপত এটা জোপোহাত পৰি থকা এটা ছীল কৰা পেকেট দেখা পায়। সন্দেহ ওপজাত তেওঁ লগে লগে আৰক্ষীক খবৰ দিয়ে।
এই তথ্য লাভ কৰাৰ লগে লগে উধম সিং নগৰ আৰু নাইনিতালৰ পৰা বোম স্কোয়াড আৰু পুলিচৰ তালাচী কুকুৰৰ দুটা আৰক্ষীৰ দল ক্ষীপ্ৰতাৰে আহি সেই স্থানত উপস্থিত হয়। সমগ্ৰ অঞ্চলটো ঘেৰাও কৰি অভিযান আৰম্ভ কৰাৰ পিছত জোপোহাৰ পৰা প্ৰায় ২০ কিলোগ্ৰাম ওজনৰ মুঠ ১৬১ডাল জেলেটিন ষ্টিক উদ্ধাৰ কৰা হয়।
আলমোৰাৰ আৰক্ষী অধীক্ষক দেৱেন্দ্ৰ পিঞ্চাই কয়, “ইয়ালৈ ক’ৰ পৰা আৰু কিয় ইমান বিস্ফোৰক আহিল তাৰ তদন্ত চলি আছে। ইয়াৰ আশে-পাশে থকা অঞ্চলতো তালাচী চলোৱা হৈছে।”
আৰক্ষী অধীক্ষকগৰাকীয়ে লগতে কয় যে বিএনএছ আইনৰ অধীনত অচিনাকি ব্যক্তিৰ বিৰুদ্ধে অবৈধ বিস্ফোৰক উদ্ধাৰৰ ধাৰাত গোচৰ ৰুজু কৰা হৈছে। ঘটনাৰ তদন্তৰ বাবে গঠন কৰা হৈছে ৪ জনীয়া বিশেষ দল।
এনে জেলেটিন ষ্টিক সাধাৰণতে শিল কটা আৰু পথ নিৰ্মাণৰ বাবে বা খনন এলেকাত শিল খননৰ বাবে ব্যৱহাৰ কৰা হয়। নির্মাণ কামৰ বাবে ৰখা হৈছিল নে ইয়াৰ আঁৰত আন কিবা কাৰণ আছে আৰক্ষীয়ে তাৰ তদন্ত অব্যাহত ৰাখিছে৷
শেহতীয়াকৈ দিল্লীত সংঘটিত বিস্ফোৰণ আৰু হাৰিয়ানাৰ পৰা বৃহৎ পৰিমাণৰ বিস্ফোৰক উদ্ধাৰৰ পিছত দেশৰ চোৰাংচোৱা সংস্থা আৰু আৰক্ষীয়ে উচ্চ সতৰ্কতা অৱলম্বন কৰিছে।
কিছুদিন পূৰ্বে হাৰিয়ানাৰ ফৰিদাবাদৰ পৰা প্ৰায় ৩০০০ কিলোগ্ৰাম বিস্ফোৰক উদ্ধাৰ কৰা হৈছিল। ইয়াৰ পূৰ্বে পশ্চিম বংগতো নাকা চেকিঙৰ সময়ত উদ্ধাৰ হৈছিল জেলেটিন ষ্টিক। এনে পৰিস্থিতিত উত্তৰাখণ্ডৰ পৰা উদ্ধাৰ হোৱা বিস্ফোৰক সামগ্ৰীৰ পৰিপ্ৰেক্ষিতত নিৰাপত্তা আৰু অধিক বৃদ্ধি কৰা হৈছে।
