সংক্ষিপ্ত বিশেষ পুনৰীক্ষণ বা এছএছআৰ। নিৰ্বাচন আয়োগে প্ৰতি বছৰে এই কাৰ্যসূচী ৰূপায়ণ কৰি ১৮ বছৰ সম্পূৰ্ণ কৰা যুৱক-যুৱতীসকলক ভোটাৰ তালিকাত নাম সোমোৱাৰ সুযোগ প্ৰদান কৰি আহিছে। এই প্ৰথা ১৯৫৮ চনৰ পৰা চলি আহিছে যদিও ২০২৪ চনৰ পৰা মুখ্য নিৰ্বাচন আয়ুক্ত জ্ঞানেশ কুমাৰ আৰু দুয়োজন আয়ুক্তৰ মাজত সহমত নোহোৱাৰ বাবে ‘জেন জি’ক ভোটাধিকাৰ প্ৰদানৰ প্ৰক্ৰিয়া স্থবিৰ হৈ পৰিছে।
বৃহস্পতিবাৰে ‘দ্য ইকনমিক টাইমছ’ত প্ৰকাশিত এক প্ৰতিবেদনত এনে চাঞ্চল্যকৰ দাবী উত্থাপন হৈছে। এদিন পূৰ্বে ‘দ্য ইণ্ডিয়ান এক্সপ্ৰেছ’ৰ অনুসন্ধানমূলক প্ৰতিবেদনক লৈ সমগ্ৰ দেশতে আলোড়নৰ সৃষ্টি হৈছিল।
সেই প্ৰতিবেদনত জ্ঞানেশ কুমাৰ আৰু আন দুজন নিৰ্বাচন আয়ুক্ত সুখবীৰ সিং সান্ধু আৰু বিবেক যোশীৰ মাজত এছ আই আৰকে ধৰি বিভিন্ন নিৰ্বাচনী প্ৰক্ৰিয়াত মতানৈক্যৰ অভিযোগ উত্থাপন কৰা হৈছিল। নিৰ্বাচন আয়ুক্ত দুগৰাকীয়ে ১০ মাহত ১৪ বাৰ লিখিত আপত্তি উত্থাপন কৰাৰ পিছতো জ্ঞানেশ কুমাৰে কোনো গুৰুত্ব নিদিলে।
ইফালে, নতুন প্রতিবেদনত দাবী কৰা হৈছে যে নির্বাচনী আয়ুক্ত দুগৰাকী সান্ধু আৰু যোশীয়ে নতুন ভোটাৰৰ নাম তালিকাত অন্তর্ভুক্ত কৰিবলৈ এছ এছ আৰ পুনৰ প্রৱর্তনৰ বাবে তীব্ৰ পোষকতা কৰিছিল যদিও কোনো ফলাফল পোৱা নগ’ল৷ আনকি ২০২৫-২৬ চনৰ এছ এছ আৰ প্ৰক্ৰিয়াও এতিয়াও আৰম্ভ হোৱা নাই।
স্বাভাৱিকতে এই বিষয়ত বিৰোধী শিবিৰ সৰৱ হৈছে। কংগ্ৰেছৰ কটাক্ষ, মোডী চৰকাৰে জেন জিক ভয় কৰে কাৰণ, জেন জিয়ে মোডীৰ বিৰোধিতা কৰে। এই ভয়ৰ বাবেই মোদীয়ে জ্ঞানেশ কুমাৰৰ সৈতে মিলি ষড়যন্ত্ৰ কৰিছে। এতিয়া জ্ঞানেশ কুমাৰে জেন জিৰ ভোটাধিকাৰ কাঢ়ি লোৱাৰ কাম কৰি আছে।
আয়োগে প্ৰতি বছৰে এছ এছ আৰ অনুষ্ঠিত কৰি তালিকাত নতুন ভোটাৰ অন্তৰ্ভুক্ত কৰে। কিন্তু ২০২৪ চনৰ পৰা জ্ঞানেশ কুমাৰে নিষিদ্ধ কৰি ৰাখিছে। অৰ্থাৎ ১৮ বছৰীয়া যুৱক-যুৱতীক ভোটাৰ তালিকাত অন্তৰ্ভুক্ত কৰাৰ প্ৰক্ৰিয়া বন্ধ হৈ গৈছে। নিৰ্বাচন আয়ুক্ত দুগৰাকীয়ে এছ এছ আৰ অন্তৰ্ভুক্ত কৰাৰ দাবী উত্থাপন কৰিলেও জ্ঞানেশ কুমাৰে সেয়া হ’বলৈ দিয়া নাই।
ইকনমিক টাইমছৰ প্ৰতিবেদনত কোৱা হৈছে যে ২০২৫ চনৰ জুন মাহত বিহাৰৰ পৰা সমগ্ৰ দেশতে এছ আই আৰ প্ৰক্ৰিয়া আৰম্ভ হৈছিল।এই প্ৰেক্ষাপটত ২০২৪ চনৰ পৰা এছ এছ আৰ প্ৰক্ৰিয়া স্থগিত ৰখা হৈছে। এই বিষয়ত আয়োগৰ ভিতৰত মতানৈক্যৰ বাবে জ্ঞানেশ কুমাৰেও চলিত বৰ্ষৰ আৰম্ভণিতে আইনী পৰামৰ্শ বিচাৰিছিল। এছ আই আৰ প্ৰক্ৰিয়া চলি থকাৰ সময়তে এছ এছ আৰ কাৰ্যসূচী আৰম্ভ কৰিব লাগে নেকি সেই সন্দৰ্ভত আইনী বিশেষজ্ঞসকলৰ পৰামৰ্শ লোৱা হৈছিল।
সেই আইনী পৰামৰ্শ অহাৰ পিছত দুই নিৰ্বাচন আয়ুক্ত সান্ধু আৰু যোশীয়ে নিজৰ স্থিতি স্পষ্ট কৰি দিয়ে যে এছ এছ আৰ আৰম্ভ কৰিব লাগে। কাৰণ আয়োগৰ হাতপুথিত উল্লেখ আছে যে প্ৰতি বছৰে নিয়মীয়াকৈ এছ এছ আৰ সম্পূৰ্ণ কৰিব লাগে। এছ এছ আৰ কাৰ্যসূচীয়ে ভোটাৰ তালিকা ফটোসহ আপডেট কৰা আৰু অমিল আৰু অসামঞ্জস্যতা পৰীক্ষা কৰাত সহায় কৰে। সেই বছৰ ১৮ বছৰ বয়স সম্পূৰ্ণ কৰিবলৈ ওলোৱা নাগৰিকে চাৰিটা তাৰিখত (১ জানুৱাৰী, ১ এপ্ৰিল, ১ জুলাই আৰু ১ অক্টোবৰ) এছ এছ আৰৰ জৰিয়তে আবেদন কৰিব পাৰে।
