কেন্দ্ৰীয় পথ পৰিবহন আৰু ৰাষ্ট্ৰীয় ঘাইপথ ৰাজ্যিক মন্ত্ৰী তথা প্ৰাক্তন ভাৰতীয় সেনাপ্ৰধান জেনেৰেল ভি কে সিং আৰু দেশৰ প্ৰাক্তন ক্ৰীড়া মন্ত্ৰী তথা বৰ্তমান লোকসভাৰ সাংসদ ৰাজ্যবৰ্ধন সিং ৰাথোড়ে মঙলবাৰে ৰাতিপুৱা অসমত উপস্থিত হৈ কামাখ্যা মন্দিৰ দৰ্শন কৰে।
দুয়োগৰাকী বিজেপি সাংসদতে কামাখ্যা মন্দিৰ দৰ্শন কৰি মাৰ আশীৰ্বাদ গ্ৰহণ কৰি পূজা অৰ্চনা কৰে।
কামাখ্যা ধাম দৰ্শন কৰাৰ পাছত সংবাদ মাধ্যমৰ সৈতে হোৱা মুখামুখিত ভি কে সিঙে ১৯৭১ চনৰ পৰাই কামাখ্যা মাৰ দৰ্শনৰ বাবে আহি আছে বুলি কোৱাৰ লগতে ভাৰতীয় সেনাৰ বৰ্তমানৰ স্থিতি সন্দৰ্ভত সুখ ব্যক্ত কৰে।
আনহাতে, সাংসদ তথা প্ৰাক্তন অলিম্পিক পদক বিজেতা ৰাজ্যবৰ্ধন সিং ৰাথোড়ে ক্ৰীড়া ক্ষেত্ৰত অসমে ক্ৰমাগতভাৱে উন্নতি কৰি আহিছে বুলি মন্তব্য কৰে।
ৰাথোড়ে অৰ্থনীতি আৰু ক্ৰীড়া পৰস্পৰে পৰস্পৰৰৰ ওপৰত নিৰ্ভৰশীল বুলি মন্তব্য কৰি অৰ্থনীতি মজবুত হলেহে ক্ৰীড়াখণ্ডৰ বিকাশ ঘটিব বুলি উল্লেখ কৰি অসমে প্রধান মন্ত্ৰীৰ নেতৃত্বত অৰ্থনৈতিক বিকাশৰ লগতে ক্ৰীড়া ক্ষেত্ৰত উন্নতি কৰিছে বুলি কয়।
আনহাতে ফিট ইণ্ডিয়া মুভমেণ্ট সন্দৰ্ভত মত ব্যক্ত কৰি সাংসদ গৰাকীয়ে কয় যে বৰ্তমান দেশত খেলৰ প্ৰতি আগ্ৰহ বৃদ্ধি হৈছে বুলিত মত ব্যক্ত কৰে।
‘‘সকলোৱে অলিম্পিকত পদক দখল কৰাৰ লক্ষ্যৰে খেলত অংশগ্ৰহণ নকৰিলেও সুস্থ হৈ থকাৰ বাবে খেলত অংশ লৈছে,’’ সাংসদ ৰাজ্যবৰ্ধন সিং ৰাথোড়ে কয়।
