বিগত বৰ্ষসমূহৰ দৰে এইবাৰো তেজপুৰস্থিত গিৰিজানন্দ চৌধুৰী ইনষ্টিটিউট অৱ মেনেজমেণ্ট এণ্ড টেকন’লজী চমুকৈ জি আই এম টি, তেজপুৰত অহা ২৭ এপ্ৰিলত ‘Ethnic Day’ কাৰ্যসূচীৰ অংশ হিচাপে ‘গোমচেং ২০১৯’ অনুষ্ঠানৰ আয়োজন কৰিবলৈ লোৱা হৈছে।
উল্লেখযোগ্য যে ৰাজ্যৰ অন্যতম আগশাৰীৰ অভিযান্ত্ৰিক শিক্ষা প্ৰতিষ্ঠানটোত ব’হাগ মাহৰ প্ৰথম পষেকত পৰম্পৰাগত সাজ পোছাক পৰিধানৰ দিৱস হিচাপে এটা দিন নিৰ্ধাৰণ কৰি প্ৰতিবছৰে ‘Ethnic Day’ উদযাপন কৰি অহা হৈছে। উক্ত দিনটোত প্ৰতিষ্ঠানটোৰ ছাত্ৰ-ছাত্ৰী, শিক্ষক-শিক্ষয়িত্ৰীসকলৰ লগতে অন্যান্য কৰ্মচাৰীবৃন্দ সকলোৱে পৰম্পৰাগত সাজপাৰ পৰিধান কৰি নিজ নিজ কৃষ্টিৰ পৰিৱেশন কৰে।
অসমৰ বাৰেৰহনীয়া সাংস্কৃতিক সমিলমিলৰ লগতে উত্তৰ-পূবৰ সংস্কৃতিক ভিন্নতাক প্ৰতিনিধিত্ব কৰা উক্ত আকৰ্ষণীয় অনুষ্ঠানটো এইবাৰো বৰ্ণাঢ্য কাৰ্যসূচীৰে আয়োজন কৰিবলৈ লোৱা হৈছে। এইবাৰ বিশেষ আকৰ্ষণ হিচাপে ‘পৰম্পৰাগত সাজপাৰ প্ৰতিযোগিতা’, ‘পৰম্পৰাগত খাদ্য প্ৰস্তুত প্ৰতিযোগিতা’ৰ লগতে অসমীয়া পৰম্পৰাগত খেল ধেমালিৰ আয়োজন কৰা হ’ব বুলি সাংস্কৃতিক বিভাগৰ তত্বাবধায়িকা সাধনা গোস্বামীয়ে জানিবলৈ দিয়ে।
