জি আই এম টি, তেজপুৰত উদযাপন নৱাগত আদৰণি আৰু দীক্ষান্ত সমাৰোহ
অসমৰ আগশাৰীৰ কাৰিকৰী শিক্ষা প্ৰতিষ্ঠান তেজপুৰ ডেকাৰগাওঁস্থিত গিৰিজানন্দ চৌধুৰী ইনষ্টিটিউট অৱ মেনেজমেণ্ট এণ্ড টেকন’লজী চমুকৈ জি আই এম টি, তেজপুৰত আজি (৩০ আগষ্ট) দিনজোৰা কাৰ্য্যসূচীৰে নৱাগত আদৰণি সভা আৰু দীক্ষান্ত সমাৰোহ উদযাপিত হয়।
নতুন শিক্ষাবৰ্ষত নামভৰ্তি কৰা শিক্ষাৰ্থীসকলক আদৰণি জনোৱাৰ লগতে সদ্য ডিগ্ৰীপ্ৰাপ্ত প্ৰাক্তন শিক্ষাৰ্থীসকলক সম্বৰ্ধনা জনোৱাৰ বাবে আয়োজিত অনুষ্ঠানটোত মুখ্য অতিথি হিচাপে উপস্থিত থাকে দৰং মহাবিদ্যালয়ৰ প্ৰাক্তন অধ্যক্ষ অৱনী কুমাৰ শৰ্মা।
স্নাতক ডিগ্ৰীপ্ৰাপ্ত শিক্ষাৰ্থীসকলক তেওঁ মানপত্ৰ আৰু উপহাৰ প্ৰদান কৰে।
অধ্যাপক শৰ্মাই নিজৰ ভাষণত মহাবিদ্যালয়খনৰ সমূহ ছাত্ৰ-ছাত্ৰীক শুভেচ্ছা জনোৱাৰ লগতে সকলোৰে উত্তৰোত্তৰ কামনা কৰে। সাম্প্ৰতিক সময়ত কেৱল ডিগ্ৰীপ্ৰাপ্তিৰ বাবে শিক্ষা গ্ৰহণ নকৰি প্ৰকৃত অৰ্থত জ্ঞানী আৰু সংস্কাৰী হ’বলৈ তেওঁ শিক্ষাৰ্থীসকলক আহ্বান জনায়।
অনুষ্ঠানটোত অসমৰ বিশিষ্ট কেৰিয়াৰ পৰামৰ্শদাতা তথা মহাবিদ্যালয়ৰ অধ্যক্ষ বুলজিৎ বুঢ়াগোহাঁই, প্ৰশাসনিক ডীন কেপ্টেইন মুকুল কুমাৰ দাস, শৈক্ষিক ডীন দীপল বৰুৱায়ো ভাষণ আগবঢ়ায়।
সমান্তৰালভাৱে মহাবিদ্যালয়ৰ ছাত্ৰ-ছাত্ৰীসকলে বিভিন্ন সাংস্কৃতিক অনুষ্ঠান পৰিৱেশন কৰে। বাৰেৰহনীয়া গীত নৃত্যৰ লগতে কাশ্মীৰৰ বীৰ চহিদ সেনা জোৱানৰ প্ৰতি শ্ৰদ্ধাঞ্জলি জনায়ো ছাত্ৰ-ছাত্ৰীসকলে অনুষ্ঠান পৰিৱেশন কৰে।
ইয়াৰ লগতে ন-পুৰণি শিক্ষাৰ্থীৰ চিনা-পৰিচয় পৰ্বও আকৰ্ষণীয়ভাৱে অনুষ্ঠিত কৰা হয়।