উত্তৰ প্ৰদেশত সংঘটিত হৈছে আন এক কিশোৰী দলবদ্ধ ধৰ্ষণ কাণ্ড। ১৫ বছৰীয়া এগৰাকী নাবালিকাক অপহৰণ কৰি দলবদ্ধ ধৰ্ষণৰ অভিযোগ উত্থাপন হৈছে তিনি যুৱকৰ বিৰুদ্ধে। এই ঘটনাই এতিয়া জোকাৰি গৈছে সমগ্ৰ ৰাজ্য।
আৰক্ষীয়ে ঘটনা সন্দৰ্ভত অৱগত কৰা মতে, এই ঘটনাৰ পিছতে এজন অভিযুক্তই গ্ৰেপ্তাৰ হোৱাৰ আশংকাত ভীতিগ্ৰস্ত হৈ আত্মহত্যা কৰে। আগ্ৰাত এই ঘৃণনীয় ঘটনা সংঘটিত হৈছে বুলি আৰক্ষীয়ে সদৰী কৰিছে।
প্ৰকাশিত খবৰ অনুসৰি, যোৱা সোমবাৰে পিতৃৰ দোকানৰ পৰা উভতি অহাৰ সময়তে অভিযুক্তই কিশোৰীগৰাকীক অপহৰণ কৰে আৰু এখন অটোৰিক্সাত উঠাই লৈ যায়।
ঘটনাৰ পিছদিনা স্থানীয় এগৰাকী ব্যক্তিয়ে কিশোৰীগৰাকীক পথৰ দাঁতিত পৰি থকা অৱস্থাত উদ্ধাৰ কৰে। ইয়াৰ পিছতে নাবালিকাগৰাকীৰ পিতৃয়ে থানাত এজাহাৰ দাখিল কৰে।
ভুক্তভোগীৰ পিতৃৰ অভিযোগৰ পিছত আৰক্ষীয়ে তদন্ত আৰম্ভ কৰে। তদন্তৰ অন্তত আৰক্ষীয়ে অভিযুক্ত ৰূপেশ, কৰুয়া আৰু জগদীশৰ বিৰুদ্ধে এফআইআৰ দাখিল কৰে।
১৮ৰ পৰা ২০ বছৰৰ বয়সৰ ভিতৰৰ এই আটাইকেইগৰাকী অভিযুক্ত শ্বামছাবাদৰ এখন গাঁৱৰ বাসিন্দা। আৰক্ষীয়ে জানিবলৈ দিয়া মতে, অভিযুক্তই কিশোৰীগৰাকীক এখন অট’ত লৈ গাঁৱৰ নিৰ্জন স্থানলৈ লৈ গৈ ধৰ্ষণ কৰে।
ধৰ্ষণৰ পিছত পথৰ কাষতে কিশোৰীগৰাকীক এৰি থৈ যায় দুৰ্বৃত্তই। অভিযুক্ত ৰূপেশ নামৰ অট’চালকগৰাকীক ইতিমধ্যে গ্ৰেপ্তাৰ কৰা হৈছে আৰু কৰুয়া পলাতক হৈ আছে বুলি আৰক্ষীয়ে সদৰী কৰিছে।
আনহাতে, গ্ৰেপ্তাৰৰ আশংকাত আত্মহত্যা কৰে জগদীশে। ইফালে ভুক্তভোগী কিশোৰীগৰাকীৰ শাৰীৰিক পৰীক্ষা কৰা হৈছে বুলি আৰক্ষীয়ে জানিবলৈ দিয়ে
