মধ্যপ্ৰদেশৰ গোৱালিয়ৰৰ ৰাস্তাত হঠাৎ এখন বিশেষ গাড়ীয়ে সকলোৰে দৃষ্টি আকৰ্ষণ কৰিলে। গাড়ীখনৰ বাহিৰভাগত দেখা গ’ল প্ৰায় ৩৪০০টা চুমাৰ চিহ্ন। সামাজিক মাধ্যমত গাড়ীখনৰ ছবি ভাইৰেল হোৱাৰ পাছতে ঘটনাটোৱে লাভ কৰিলে ব্যাপক চৰ্চা।
গাড়ীখনৰ মালিক আছিল আদিত্য সিকৰৱাৰ। জানিব পৰা মতে, বিদেশী সামাজিক মাধ্যমৰ এটা ট্ৰেণ্ড দেখি আদিত্যৰ প্ৰেমিকাই সেই একে ধৰণেৰে গাড়ীখন সজোৱাৰ সিদ্ধান্ত লৈছিল। তাৰ পাছত এটাৰ পাছত এটাকৈ প্ৰায় ৩৪০০টা লিপষ্টিকৰ চুমাৰ চিহ্ন গাড়ীখনত আঁকা হয়। এই অভিনৱ কামটো সম্পূৰ্ণ কৰিবলৈ প্ৰায় চাৰি ঘণ্টা সময় লাগিছিল প্ৰেমিকাৰ।
চুমাৰ চিহ্নৰে ভৰা গাড়ীখন ৰাস্তাত ওলোৱাৰ লগে লগে মানুহৰ কৌতূহলৰ কেন্দ্ৰ হৈ পৰে। বহুতে গাড়ীখনৰ ছবি আৰু ভিডিঅ’ তুলি সামাজিক মাধ্যমত পোষ্ট কৰে। অতি কম সময়ৰ ভিতৰতে সেই ছবিসমূহ ভাইৰেল হৈ পৰে।
ভাইৰেল ছবিত স্পষ্টকৈ দেখা গৈছিল গাড়ীখনৰ নম্বৰ প্লেট। এই নম্বৰৰ সহায়তেই ট্ৰেফিক আৰক্ষীয়ে গাড়ীখন চিনাক্ত কৰি বিচাৰি উলিয়ায়। পিছত আৰক্ষীয়ে গাড়ীখন জব্দ কৰি মালিক আদিত্য সিকৰৱাৰক মাতি আনে।
আৰক্ষীয়ে গাড়ীখনৰ নিয়ম ভংগ কৰাৰ অভিযোগ উত্থাপন কৰে। তাৰ পিছত আদিত্যৰ বিৰুদ্ধে ৫,৫০০ টকাৰ চালান জাৰি কৰা হয়।
আৰক্ষীৰ ব্যৱস্থাৰ পাছত আদিত্য সিকৰৱাৰে নিজৰ ভুল স্বীকাৰ কৰে। পিছত গাড়ীখন ধুই সকলো লিপষ্টিকৰ চুমাৰ চিহ্ন আঁতৰাই পেলোৱা হয়। মুহূৰ্ততে সামাজিক মাধ্যমৰ ‘কিছ কাৰ’ হৈ পৰা গাড়ীখন পুনৰ সাধাৰণ ৰূপলৈ ঘূৰি আহিল।
প্ৰেমৰ চিন দেখুৱাবলৈ কৰা এই অভিনৱ কাণ্ড শেষত প্ৰেমিকৰ বাবে হ’ল ৫,৫০০ টকাৰ শিক্ষা। সামাজিক মাধ্যমৰ ট্ৰেণ্ড কেতিয়াবা মজাৰ হ’ব পাৰে, কিন্তু ৰাজপথত সেই ট্ৰেণ্ডৰ মূল্য যে যথেষ্ট গধুৰ হ’ব পাৰে, গোৱালিয়ৰৰ এই ঘটনাই সেয়াই দেখুৱালে।
