গ্ল’বেল নেচাৰ কনজাৰ্ভেচন ইনডেক্স ২০২৪ (global Nature conservation imdex 2024)ত ১৮০খন দেশৰ ভিতৰত ভাৰতৰ স্থান ১৭৬। বিশেষজ্ঞসকলৰ ভাষ্য অনুসৰি অনাগত ভৱিষ্যতৰ বাবে ই যথেষ্ট চিন্তনীয় বিষয়। এই তালিকাত ভাৰতে ১০০ পইণ্টৰ ভিতৰত ৪৫.৫ পইণ্ট লাভ কৰিছে।
বৃহস্পতিবাৰে প্ৰকাশ পাইছে বিশ্ব পৰিৱেশ সুৰক্ষা সূচাংক । ইজৰাইলৰ বেন-গুৰিয়ান ইউনিভাৰ্চিটি অৱ দ্য নেগেভৰ গোল্ডমেন ছনেনফেল্ড স্কুল অৱ ছাষ্টেনেবিলিটি এণ্ড ক্লাইমেট চেঞ্জ আৰু বায়’ডিবি নামৰ ৱেবছাইটটোৱে এই সূচকাংক প্ৰস্তুত কৰিছে।
সেই তালিকাত ভাৰতৰ পিছত আছে মাত্ৰ চাৰিখন দেশ – মাইক্ৰ’নেছিয়া (ৰেংক – ১৭৭), ইৰাক (১৭৮), তুৰস্ক (১৭৯) আৰু কিৰিবাটি (১৮০)। ভাৰতৰ আগত বাংলাদেশ (১৭৩), পাকিস্তান, ম্যানমাৰ, চীন (১৬৪) আদি চুবুৰীয়া দেশ। এই তালিকাখন মূল চাৰিটা মাত্ৰাৰ ওপৰত ভিত্তি কৰি তৈয়াৰ কৰা হৈছে।এই চাৰিটা মাপকাঠী হ’ল ভূমি ব্যৱস্থাপনা, জৈৱ বৈচিত্ৰ্যৰ প্ৰতি বিভিন্ন ভাবুকি, শাসন আৰু সামৰ্থ্য আৰু ভৱিষ্যত পৰিকল্পনা।
ভাৰত ইমান পিছ পৰি থকাৰ এটা কাৰণ হ’ল জৈৱ বৈচিত্ৰ্যৰ প্ৰতি অহৰহ ভাবুকি আৰু ভূমি সংৰক্ষণৰ ব্যৱস্থাৰ অভাৱ। দেখা গৈছে যে ভাৰতৰ ৫৩ শতাংশ মাটি নগৰ, উদ্যোগিক আৰু কৃষি কামত ব্যৱহাৰ কৰা হৈছে। ২০০১-২০১৯ চনৰ ভিতৰত ২৩,৩০০ বৰ্গ কিলোমিটাৰ এলেকাত বনাঞ্চল ধ্বংস হৈছিল। যিটো চিন্তনীয়। ভাৰতত জনসংখ্যা বৃদ্ধিৰ বাবে জৈৱ বৈচিত্ৰ্য ধ্বংস হৈ আছে।
ভাৰতৰ ৭.৫ শতাংশ ভূমি সুৰক্ষিত যদিও সামুদ্ৰিক খণ্ডত সুৰক্ষাৰ উন্নতিৰ প্রয়োজন আছে বুলিও প্রতিবেদনত উল্লেখ কৰা হৈছে৷ জলভাগৰ ৰাষ্ট্ৰীয় সীমা আৰু একচেটিয়া অৰ্থনৈতিক মণ্ডল (EEZ)ৰ মাত্ৰ ০.২ শতাংশহে সুৰক্ষিত।
মন কৰিবলগীয়া যে এই তালিকাৰ প্ৰথম দহখনৰ ভিতৰত ইউৰোপৰ ৭খন দেশ আছে। শীৰ্ষত আছে লাক্সেমবাৰ্গ (স্ক’ৰ ৭০.৮), দ্বিতীয় স্থানত ইষ্ট’নিয়া (৭০.৫), তৃতীয় স্থানত আছে ডেনমাৰ্ক (৬৯.৪), চতুৰ্থ স্থানত ফিনলেণ্ড (৬৬.৯), পঞ্চম স্থানত আছে যুক্তৰাজ্য (৬৬.৯), ষষ্ঠ স্থানত আছে আফ্ৰিকা মহাদেশ জিম্বাবুৱে (৬৫ .৯ ), অ’চেনিয়া মহাদেশ অষ্ট্ৰেলিয়া সপ্তম স্থান (৬৫.৮), ছুইজাৰলেণ্ড অষ্টম স্থান (৬৪.৭), ৰোমানিয়া নৱম স্থান (৬৪.৬) আৰু কোষ্টা ৰিকা দশম স্থান (৬৪.৪)। এই তালিকাত এছিয়াৰ এখন দেশৰ স্থান ভাল। ভাৰতৰ চুবুৰীয়া দেশ ভূটানে ১০০ পইণ্টৰ ভিতৰত ৬৩.১ পইণ্ট লাভ কৰি ১৫ নম্বৰ স্থানত আছে।
