দুটা ছাগলীক ‘গ্ৰেপ্তাৰ’ কৰিলে আৰক্ষীয়ে।শুনিবলৈ আচৰিত যেন লাগিলেও এয়া সঁচা ঘটনা।
তেলেংগানাৰ কৰিমনগৰ জিলাৰ হুজুৰবাদ চহৰৰ আৰক্ষীয়ে ‘গ্ৰেপ্তাৰ’ কৰিছে দুটা ছাগলীক। ছাগলী দুটাই এটা স্থানীয় বেচৰকাৰী সংস্থাৰ কৰ্মীসকলে ৰোৱা গছপুলি খাইছিল।
‘’অপৰাধী’’ দুটাক ইয়াৰ গৰাকীয়ে ১,০০০টকাৰ জৰিমনা আদায় দিয়াৰ পাছতহে আৰক্ষীৰ জিম্মাৰ পৰা মুকলি কৰি দিয়া হয়।
হিন্দুস্তান টাইমছে প্ৰকাশ কৰা বাতৰি অনুসৰি হুজুৰবাদৰ আৰক্ষী পৰিদৰ্শকে জানিবলৈ দিয়ে যে মঙলবাৰে ‘চেভ দ্য ট্ৰী’ছ’ নামৰ স্থানীয় বেচৰকাৰী সংস্থাটোৰ দুজন কৰ্মীয়ে দুটা ছাগলী কৰায়ত্ত কৰি আনি এক অভিযোগ দাখিল কৰে যে জন্তু দুটাই হুজুৰবাদ চৰকাৰী হাস্পাতলৰ টৌহদত ৰোৱা প্ৰায় ১৫০টা গছপুলি খাই পেলায়।
পৰিদৰ্শকজনে লগতে জানিবলৈ দিয়ে যে তেওঁলোকে আটক কৰি ৰখা ছাগলী দুটা গৰাকীয়ে বুধবাৰে ৰাতিপুৱা পৌৰ নিগম কৰ্তৃপক্ষক ১,০০০ টকা জৰিমনা আদায় দি আৰক্ষী থানাৰ পৰা মুকলি কৰি নিয়ে।
অৱশ্যে আৰক্ষী পৰিদৰ্শকগৰাকীয়ে কয় যে এয়া প্ৰকৃততে গ্ৰেপ্তাৰ নাছিল। আৰক্ষীয়ে এই সন্দৰ্ভত কোনো গোচৰ পঞ্জীয়নো কৰা নাই। কিয়নো ভাৰতীয় দণ্ডবিধিত জন্তুক ‘শাস্তি’ দিয়া বা ‘গ্ৰেপ্তাৰ’ কৰাৰ কোনো ধাৰা নাই।
আনহাতে, গৰাকীক ভৱিষ্যতে তেওঁৰ ছাগলী ৰাজহুৱা স্থানৰ বনানীকৰণ কৰা স্থানত যাতে চৰিবলৈ নিদিয়ে তাৰ বাবে সকীয়াই দিয়া হয়।