গোলাঘাট জিলা সাহিত্য সভা আৰু বোকাখাতৰ পুৱতি সাহিত্য সভাৰ যৌথ উদ্যোগত কালি অৰ্থাৎ ১০ অক্টোবৰত বোকাখাতত জনসুহৃদ চিদানন্দ শইকীয়াৰ জন্ম শতবৰ্ষৰ আৰম্ভণি অনুষ্ঠান দিনজোৰা কাৰ্যসূচীৰে অনুষ্ঠিত হৈ যায়।
বোকাখাতৰ পুৱতি সাহিত্য সভা ভৱনত আয়োজিত এই বিশেষ অনুষ্ঠানৰ পুৱা পতাকা উত্তোলন কৰে উদযাপন সমিতিৰ সভাপতি ভবেশ শইকীয়াই ৷
বেচৰকাৰী সংগঠন গ্ৰাছৰ সহযোগত বৃক্ষ ৰোপণ কৰে বোকাখাতৰ পৌৰপতি চিত্ৰা কাৰ্ডং, গোলাঘাট জিলা সাহিত্য সভাৰ উপ সভাপতি কল্পনা চেতিয়া, পুৱতি সাহিত্য সভাৰ প্ৰাক্তন সভাপতি মনোৰঞ্জন সেন আৰু জেষ্ঠ নাগৰিক সন্মিলনৰ সভাপতি আনিচুৰ ৰহমানে ৷
অনুষ্ঠানত জনসুহৃদ চিদানন্দ শইকীয়াৰ প্ৰতিকৃতিত মাল্য অৰ্পণ কৰে চিদানন্দ শইকীয়া ন্যাস পৰিচালনা সমিতিৰ সভাপতি গোপিকানন্দ শইকীয়াই, বন্তি প্ৰজ্বলন কৰে পুৱতি সাহিত্য সভাৰ সভাপতি অপূৰ্ব বৰদলৈয়ে ৷
অনুষ্ঠানত স্মৃতি তৰ্পণ কৰে কেবিনেট মন্ত্ৰী অতুল বৰাই ৷ দুপৰীয়ালৈ আয়োজিত মুকলি সভাৰ পৌৰহিত্য কৰে গোলাঘাট জিলা সাহিত্য সভাৰ সভাপতি সুৰেন্দ্ৰ মোহন হাজৰিকাই ৷
মুকলি সভাত গোলাঘাটৰ দেৱৰাজ ৰয় মহাবিদ্যালয়ৰ অৱসৰপ্ৰাপ্ত অধ্যাপক হেম ফুকনে, সাহিত্যিক পেঞ্চনাৰ অন্নদা শইকীয়া, আপকুৰ উপদেষ্টা তথা জ্যেষ্ঠ সাংবাদিক ভবেশ শইকীয়া, অসম সাহিত্য সভাৰ হেমেন হাজৰিকা, দিলীপ শৰ্মাই বিশিষ্ট অতিথি ৰূপে অংশ গ্ৰহণ কৰে।
অনুষ্ঠানৰ আৰম্ভণিতেই গায়ত্রী দিহা নামৰ দলে দিহা নাম পৰিবেশন কৰে। পুৱতি সাহিত্য সভাৰ সম্পাদক গীতাঞ্জলি কলিতাই আঁত ধৰা সভাত এখন গ্ৰন্থও উন্মোচন কৰা হয়।
আধুনিক বোকাখাতৰ নিৰ্মাতা জনসুহৃদ চিদানন্দ শইকীয়াৰ এই শতবর্ষ অনুষ্ঠান ২০২০ বৰ্ষত বিভিন্ন কাৰ্য্যসূচীৰে গোলাঘাট সাহিত্য সভাই ৰূপায়িত কৰিব ।