গোলাঘাট নিৰ্বাচন জিলাৰ অন্তৰ্গত ৯৫নং গোলাঘাট আৰু ৯৬নং খুমটাই সমষ্টিত পোষ্টেল বেলটযোগে বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাসকলৰ ভোটদান সুচাৰুৰূপে সম্পন্ন কৰাৰ বাবে প্ৰয়োজনীয় সকলো ব্যৱস্থা গ্ৰহণ কৰা হৈছে।
এই ভোটদাতাসকলৰ বাবে অহা ১৮ আৰু ১৯ মাৰ্চত ভোটগ্ৰহন কৰা হ’ব।
গোলাঘাট জিলা পুথিভঁৰাল প্ৰেক্ষাগৃহত সোমবাৰে পোষ্টেল বেলটযোগে ভোটগ্ৰহণৰ প্ৰক্ৰিয়াত নিয়োজিত চুপাৰভাইজাৰ, ছেক্টৰ বিষয়া, মাইক্ৰ’ অৱজাৰ্ভাৰ আৰু ভিডিঅ’গ্ৰাফাৰসকলৰ প্ৰশিক্ষণ সম্পন্ন হয়।
প্ৰশিক্ষণ কার্যসূচীত অংশ লৈ জিলা নিৰ্বাচন বিষয়া তথা উপায়ুক্ত বিভাষ চন্দ্ৰ মোদীয়ে পোষ্টেল বেলট প্ৰক্ৰিয়াটো সুচাৰুৰূপে সম্পন্ন কৰাৰ ক্ষেত্ৰত এই প্ৰক্ৰিয়াৰ দায়িত্বত থকা প্ৰতিগৰাকী বিষয়াকে সতৰ্ক হ’বলৈ আহ্বান জনায়।
তেওঁ পোষ্টেল বেলটযোগে ভোটগ্ৰহণ প্ৰক্ৰিয়া নিকা আৰু নিয়াৰিকৈ সম্পন্ন কৰাটো সুনিশ্চিত কৰাৰ ওপৰত গুৰুত্ব আৰোপ কৰে। মোদীয়ে ৱিষয়াসকলক পোষ্টেল বেলটসমূহ বন্ধ খামত সুমুওৱাৰ শুদ্ধ পদ্ধতিও দেখুৱাই দিয়ে যাতে কোনো ভোটদাতাই ভুল পদ্ধতি অৱলম্বন নকৰে।
তেওঁ কয় যে সমগ্ৰ প্ৰক্ৰিয়াটো নিকা কৰাৰ বাবে প্ৰতিটো ভোটগ্ৰহণকাৰী দলত ভিডিঅ’গ্ৰাফাৰ আৰু মাইক্ৰ’ অৱজাৰ্ভাৰ নিয়োগ কৰা হৈছে।
উল্লেখযোগ্য যে সমষ্টি দুটাত ১,৪৬৫ গৰাকী বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাই পোষ্টেল বেলটযোগে ভোট দিব পাৰিব। ১৮ মাৰ্চত খুমটাই সমষ্টিৰ বাবে আৰু ১৯ মাৰ্চত গোলাঘাট সমষ্টিৰ বাবে পুৱা ৮ বজাৰ পৰা সন্ধিয়া ৬ বজালৈ ভোটদাতাসকলৰ ঘৰে ঘৰে গৈ পষ্টেল বেলটসমূহ সংগ্ৰহ কৰা হ’ব।
প্ৰতিটো ভোটগ্ৰহনকাৰী দলত এজন চুপাৰভাইজৰ, এজন চেক্টৰ বিষয়া, এজন মাইক্ৰ’ অৱজাৰ্ভাৰ, ভিডিঅ’গ্ৰাফাৰ আৰু আৰক্ষীৰ লোক থাকিব। ১৮ আৰু ১৯ মাৰ্চত ভোটগ্ৰহণ সম্পূৰ্ণ নহ’লে ২০ মাৰ্চতো পোষ্টেল বেলট সংগ্ৰহ কৰা হ’ব।
দুয়োটা সমষ্টিত ৮০ বছৰ বয়সৰ উৰ্ধৰ ১,১৩৯ গৰাকী আৰু বিশেষভাৱে সক্ষম ৩২৬ গৰাকী ভোটদাতাৰ নাম পোষ্টেল বেলটযোগে ভোটদানৰ বাবে বৈধ পোৱা গৈছে।
খুমটাই সমষ্টিত আবেদন কৰা ৪৪১ গৰাকী ৮০ উৰ্ধৰ আৰু ৯৮ গৰাকী বিশেষভাৱে সক্ষম ভোটদাতাৰ পোষ্টেল বেলট সংগ্ৰহ কৰা হ’ব। একেদৰে গোলাঘাট সমষ্টিত আবেদন কৰা ৬৯৮ গৰাকী ৮০ উৰ্ধৰ ভোটদাতা আৰু ২২৮ গৰাকী বিশেষভাৱে সক্ষম ভোটদাতাই পোষ্টেল বেলটযোগে ভোট দিব পাৰিব।
প্ৰশিক্ষণত অতিৰিক্ত উপায়ুক্ত মুন গগৈ, চুলতানা আখতাৰা আহমেদ, পল্লৱী গগৈ, সহকাৰী আয়ুক্ত গৌৰীপ্ৰিয়া দেউৰী, ময়ূৰাক্ষী দত্ত আৰু অম্লান ফুকন উপস্থিত থাকে।