গোলাঘাট জিলাত বনাঞ্চলৰ ভূমি বেদখলৰ বিৰুদ্ধে বন বিভাগে অভিযান তীব্ৰতৰ কৰি তুলিছে। শেহতীয়াকৈ ভাৰতৰ উচ্চতম ন্যায়ালয়ৰ পৰা লাভ কৰাৰ ৰায়ৰ পাছতেই মেৰাপানীৰ ২ নং নেগেৰিবিলৰ ৫৯টা পৰিয়াললৈ নতুনকৈ উচ্ছেদৰ জাননী জাৰি কৰিছে।
গোলাঘাট বন সংমণ্ডলৰ তৰফৰ পৰা সংমণ্ডল বন বিষয়াৰ স্বাক্ষৰিত এই জাননীসমূহ যোৱা ২১ ফেব্ৰুৱাৰীত প্ৰদান কৰা হয়। জাননীযোগে পৰিয়ালসমূহক ৭ দিনৰ ভিতৰত বেদখলকৃত ভূমি খালী কৰিবলৈ নিৰ্দেশ দিয়া হৈছে। বন বিভাগ, কেন্দ্ৰীয় সংৰক্ষিত আৰক্ষী বাহিনী আৰু জিলা আৰক্ষীৰ এক যুটীয়া অভিযানত এই জাননীসমূহ প্ৰদান কৰা হয়।
উল্লেখযোগ্য যে, ইয়াৰ পূৰ্বেও সৰুপথাৰৰ উৰিয়ামঘাট আৰু মেৰাপানীৰ ২ নং নেগেৰিবিলত বন বিভাগে বেদখলকাৰীৰ বিৰুদ্ধে উচ্ছেদ অভিযান চলাইছিল। এই বিবাদৰ সূত্ৰপাত হৈছিল ২০২৫ চনৰ ৮ আগষ্টত, যেতিয়া বন বিভাগে প্ৰথমবাৰৰ বাবে ২ নং নেগেৰিবিলৰ ২০৫টা পৰিয়াললৈ উচ্ছেদৰ জাননী জাৰি কৰিছিল। পৰৱৰ্তী সময়ত নেগেৰিবিলৰ ৫৯টা আৰু উৰিয়ামঘাটৰ ১১টা পৰিয়ালে উচ্ছেদ প্ৰক্ৰিয়া স্থগিত ৰখাৰ দাবীৰে গুৱাহাটী উচ্চ ন্যায়ালয়ৰ দ্বাৰস্থ হৈছিল।
অৱশেষত এই গোচৰটো উচ্চতম ন্যায়ালয় পায়গৈ। যোৱা ১০ ফেব্ৰুৱাৰীত উচ্চতম ন্যায়ালয়ে অসম বন বিভাগৰ সপক্ষে ৰায়দান কৰে, যাৰ ফলত উচ্ছেদ প্ৰক্ৰিয়াত থকা আইনী বাধা দূৰ হয়।
বিভাগীয় বিষয়াসকলে জানিবলৈ দিয়া মতে, জাননী প্ৰদানৰ সময়ত বহুতো লোকে নতুন জাননী গ্ৰহণ কৰিবলৈ বা তাত স্বাক্ষৰ কৰিবলৈ অস্বীকাৰ কৰে। সেয়েহে কৰ্তৃপক্ষই আইনী প্ৰক্ৰিয়া মানি চলি তেওঁলোকৰ বাসগৃহৰ বেৰত জাননীসমূহ আঁৰি দিয়ে। অৱশ্যে একাংশ লোকে এই জাননী গ্ৰহণ কৰে।
বন বিভাগৰ সূত্ৰই প্ৰকাশ কৰা অনুসৰি, যদি জাননী লাভ কৰা পৰিয়ালসমূহে ৭ দিনৰ ভিতৰত নতুনকৈ কোনো আৱেদন দাখিল নকৰে, তেন্তে নিৰ্দিষ্ট স্থানসমূহত অতি শীঘ্ৰেই উচ্ছেদ অভিযান আৰম্ভ হোৱাৰ পূৰ্ণ সম্ভাৱনা আছে।
