গোলাঘাট জিলাৰ খাদ্য, অসামৰিক যোগান আৰু গ্ৰাহক পৰিক্ৰমা বিভাগৰ এটা দলে সোমবাৰে জিলাখনৰ মৰঙিৰ শ’লমৰা টোপ অঞ্চলৰ মঃ ফইজুদ্দিন আহমেদ নামৰ এজন লোকৰ সুলভ মূল্যৰ দোকানত অভিযান চলায় ৷
এই অভিযানত সুলভ মূল্যৰ দোকানখনত ভালেমান বিসংগতি তথা অনিয়ম সংঘটিত কৰাৰ তথ্য পোহৰলৈ আহে।
অভিযানকাৰী দলটোৱে ৰাষ্ট্ৰীয় খাদ্য সুৰক্ষা আইনৰ অধীনৰ চাউল আৰু ৰাজসাহায্যযুক্ত কেৰাচিন মজুতকৰণৰ পঞ্জীয়ন বহী নৰখা, ১৪ জনতকৈ অধিক ৰেচন কাৰ্ড থকা হিতাধিকাৰীক চাউল বিতৰণ নকৰা, অন্যান্য অনুজ্ঞাপত্ৰ নথকাকে আদি কৰি দোকানীজনৰ বিৰুদ্ধে বিভিন্ন দফা উলংঘনৰ ভালেমান তথ্য লাভ কৰে।
ইয়াৰোপৰি, তেওঁ ৰংদৈ মহিলা সমবায় নামেৰে এখন অস্তিত্বহীন সুলভ মূল্যৰ দোকানো চলাই আছিল। কোনোধৰণৰ অনুজ্ঞাপত্ৰ নোহোৱাকৈ এই সুলভ মূল্যৰ দোকানখনৰ নামত লোকজনে বিভাগৰ পৰা সামগ্ৰী সংগ্ৰহ কৰি বিতৰণ কৰি আহিছিল৷
বিভাগে লোকজনৰ বিৰুদ্ধে আছাম পাব্লিক ডিষ্ট্ৰিবিউচন অৱ আৰ্টিকলছ অৰ্ডাৰ, ১৯৮২ৰ ২৩ নং দফা উলংঘন কৰাৰ অভিযোগত এটা গোচৰ ৰুজু কৰে ৷ লগতে বিহীত চৰকাৰী প্ৰক্ৰিয়া অনুসৰি বিভাগে ৰাষ্ট্ৰীয় খাদ্য সুৰক্ষা আইনৰ অধীনৰ ৫.৮০ কুইন্টল চাউল জব্দ কৰে ৷
উল্লেখযোগ্য যে খাদ্য আৰু অসামৰিক যোগান মন্ত্ৰী ৰঞ্জিত কুমাৰ দাসে বিভাগটোত হৈ থকা অনিয়মসমূহ দূৰ কৰাৰ উদ্দেশ্যে ভুৱা হিতাধিকাৰী আৰু ভুৱা সুলভ মূল্যৰ দোকান আদিৰ বিৰুদ্ধে ব্যাপক অভিযান চলাবলৈ বিভাগৰ বিষয়া-কৰ্মচাৰীসকলক নিৰ্দেশ দিছিল।
সেই অনুসৰি গোলাঘাট জিলাত বিভাগৰ উদ্যোগত এনে অনিয়ম সংঘটিত কৰা লোকৰ বিৰুদ্ধে অভিযান তীব্রতৰ কৰি তোলা হৈছে।
