অসমৰ মানুহে হাজাৰ বছৰ ধৰি ধৰ্ম নিৰপেক্ষতা অৱলম্বন কৰি আহিছে আৰু তাৰ বাবে অসমবাসীক ধন্যবাদ জ্ঞাপন কৰিছে কংগ্ৰেছৰ সাধাৰণ সম্পাদক গোলাম নবী আজাদে।
অসমলৈ অহা কংগ্ৰেছৰ জ্যেষ্ঠ নেতাজনে আজি দিচপুৰস্থিত হোটেল ৰিভিয়েৰাত এখন সংবাদমেল সম্বোধন কৰে।
তেওঁ কয়, “ধৰ্মৰ কথা কেতিয়াও নকয় অসমৰ মানুহে। কংগ্ৰেছৰ দৰে অসমৰ মানুহে হাজাৰ বছৰ ধৰি ধৰ্ম নিৰপেক্ষতা অৱলম্বন কৰি আহিছে। তাৰ বাবে ধন্যবাদ জ্ঞাপন কৰিছো। হিন্দু-মুছলমান-খ্ৰীষ্টান সকলোৰে মাজত একতা আৰু সম্প্ৰীতি আছে”।
সংবাদমেলৰ আৰম্ভণিতে CAA-বিৰোধী আন্দোলনৰ পাঁচজন চহিদলৈ শ্ৰদ্ধাঞ্জলি জ্ঞাপন কৰে আৰু আহতসকলৰ আশু আৰোগ্য কামনা কৰে।
বিজেপি নেতৃত্বাধীন চৰকাৰে সমগ্ৰ দেশত “কা” বিৰোধী আন্দোলনত জড়িত ছাত্ৰ-ছাত্ৰীক প্ৰহাৰ কৰিছে বুলি অভিযোগ আজাদৰ। বিশ্ববিদ্যালয়ৰ চৌহদত আৰক্ষী প্ৰৱেশ কৰি ছাত্ৰ-ছাত্ৰীক প্ৰহাৰ কৰিছে বুলি অভিযোগ কৰি তেওঁ কয়, “ছাত্ৰৰ ওপৰত এনে অত্যাচাৰ পূৰ্বে হোৱা নাছিল”।
অসমত এন আৰ চিৰ কাম চৰকাৰখনে সঠিকভাৱে কৰিব নোৱাৰিলে বুলিও অভিযোগ কৰে কংগ্ৰেছৰ নেতাজনে। তেওঁৰ মতে, বাদ পৰা ১৯ লাখৰ মাজতো লাখ লাখ প্ৰকৃত ভাৰতীয় সোমাই আছে।
“কিছুমানৰ মাকৰ নাম আহিছে পুত্ৰ-জীয়ৰীৰ নাম অহা নাই, পিতৃৰ নাম অহা নাই পুত্ৰৰ নাম আহিছে”, সংবাদমেলত আজাদৰ মন্তব্য।
“অসমৰ নিচিনা ৰাজ্য এখনতে এন আৰ চিৰ কাম ঠিকমতে নহ’ল আৰু মোদী আৰু কেন্দ্ৰীয় গৃহ মন্ত্ৰীয়ে সমগ্ৰ ভাৰততে NRC-ৰ কাম কৰিব বিচাৰিছে। এইটো সম্ভৱ হৈ নুঠিব”, তেওঁ কয়।
মোদীৰ প্ৰতিশ্ৰুতিবোৰ সুঁৱৰি আজাজে কয়, “বিদেশৰ পৰা ক’লাধন আনিম বুলি কৈছিল, ক’ত আহিল? পাঁচ বছৰত ২ লাখ নিবনুৱাকো চাকৰি দিব নোৱাৰিলে। মূল্য বৃদ্ধি ৰোধ কৰিব নোৱাৰিলে। কৃষকৰ আমদানি দুগুণ কৰিব নোৱাৰিলে, কিন্তু হাজাৰ হাজাৰ কৃষকে আত্মহত্যা কৰিছে”।
তেওঁ চৰকাৰখনে বিজ্ঞাপনৰ বাবেহে অধিক ধন খৰচ কৰিছে বুলি কয়।
মোদীৰ বিমুদ্ৰাকৰণৰ পদক্ষেপক এটা ডাঙৰ বিফলতা বুলি দাবী কৰি কয় যে বিমুদ্ৰাকৰণৰ ফলত উদ্যোগবোৰ বন্ধ হৈ পৰিল, যাৰ বাবে কোটি কোটি লোকে চাকৰি হেৰুৱালে।
ঝাৰখণ্ডত গেৰুৱা দলটোৰ পৰাজয়ৰ কাৰণ ব্যাখ্যা কৰি কয়, “বিতৰ্কিত নাগৰিকত্ব সংশোধনী বিল পাছ কৰাৰ বাবেই ঝাৰখণ্ডত বৃহৎ পৰাজয়। মহাৰাষ্ট্ৰ, হাৰিয়ানাতো ৰাইজে বিজেপিক আঁতৰাই পঠালে। এতিয়া বিজেপিমুক্ত ভাৰতৰ দিশে গৈ আছে”, গোলাম নবী আজাদ।
