ড্ৰাগছ আৰু বন্যপ্ৰাণীৰ পিছত এইবাৰ উত্তৰ বংগৰ মাজেৰে সোণৰ চোৰাং সৰবৰাহৰ এক চক্ৰ আৰক্ষীয়ে ধৰা পেলাইছে। এগৰাকী গাড়ী চালকৰ বুদ্ধিদীপ্ত সাহসী প্ৰচেষ্টাৰ সহায়ত আৰক্ষীৰ হাতত ধৰা পৰিছে এক চোৰাং সোণ সৰবৰাহ চক্ৰ।
আৰক্ষীয়ে চালকগৰাকীৰ সহায়ত দুগৰাকী যুৱকক গ্ৰেপ্তাৰ কৰাৰ লগতে প্ৰায় ১ কোটি টকাৰ সোণৰ বিস্কুট উদ্ধাৰ কৰিছে। দুই যুৱকে নিজৰ জেকেটৰ ভিতৰত লুকুৱাই আনিছিল এই বৃহৎ পৰিমাণৰ সোণখিনি। ধৃত যুৱক দুগৰাকী মহাৰাষ্ট্ৰৰ বাসিন্দা বুলি আৰক্ষীয়ে জানিবলৈ দিছে।
প্ৰকাশিত খবৰ অনুসৰি, আজি দিনৰ ভাগত দুগৰাকী যুৱকে শিলিগুৰিলৈ যোৱাৰ উদ্দেশ্যে ধুপগুৰি ষ্টেণ্ডৰ পৰা বাপ্পা নামৰ চালকজনৰ গাড়ীখন ভাড়াত লয়। কিন্তু কিছু দূৰ লৈ যোৱাৰ পিছত যুৱক দুজনৰ কথোপকথন শুনি চালকগৰাকীৰ মনত সন্দেহ হয়।
এই সন্দেহৰ বাবেই তেওঁৰ যাত্ৰাৰ মাজতে এখন ধাবাৰ পৰা জলপাইগুৰি সদৰ ট্ৰেফিক বিষয়াক এই বিষয়ে অৱগত কৰে। চালকজনৰ ফোনকল লাভ কৰাৰ পিছতে আৰক্ষীয়ে ৰাষ্ট্ৰীয় ঘাইপথত গাড়ীখন জব্দ কৰাৰ ব্যৱস্থা কৰে।
গাড়ীখন গৌশালা চাৰিআলিত উপস্থিত হোৱাৰ লগে লগে গাড়ীখন ৰখাই দিয়া হয় আৰু অনুসন্ধান আৰম্ভ হয়। অনুসন্ধানত যুৱক দুগৰাকীৰ পৰা ১৪ টা সোণৰ বিস্কুট উদ্ধাৰ কৰে আৰক্ষীয়ে। আৰক্ষীয়ে জব্দ কৰা বিস্কুটবোৰৰ ওজন ১ কিলোগ্ৰাম ৬২৮ গ্ৰাম বুলি জানিবলৈ দিছে।
জব্দকৃত সোণখিনিৰ বজাৰ মূল্য প্ৰায় ১ কোটি টকা হ’ব বুলি আৰক্ষীয়ে লগতে উল্লেখ কৰে। আনহাতে ধৃত দুই যুৱকক দেওবাৰে আৰক্ষীয়ে জলপাইগুৰি আদালতত হাজিৰ কৰিব আৰু ৰিমাণ্ড বিচাৰিব বুলি সংবাদ মাধ্যমৰ আগত অৱগত কৰিছে।