পাহাৰৰ বুকুত লুকাই থকা ডাৱৰ, প্ৰাচীন মন্দিৰৰ ঘণ্টাৰ শব্দ আৰু ধূপৰি সুগন্ধি। নেপাল মানেই সকলোৰে বাবে এক আকৰ্ষণীয় ঠাই। কিন্তু এইবাৰ ভাৰতীয় কনটেণ্ট ক্ৰিয়েটৰসকলৰ বাবে নেপাল ভ্ৰমণৰ এক বিশেষ সুযোগ লৈ আহিছে নতুন দিল্লীত থকা নেপাল দূতাবাসে। নেপালৰ পৰ্যটনক ভাৰতীয় পৰ্যটকৰ মাজত অধিক জনপ্ৰিয় কৰাৰ উদ্দেশ্যেই এই বিশেষ আৰু অভিনৱ পদক্ষেপ গ্ৰহণ কৰা হৈছে।
ছচিয়েল মিডিয়াৰ পাঁচগৰাকী শ্ৰেষ্ঠ ক্ৰিয়েটৰক এই বিশেষ ভ্ৰমণৰ বাবে বাছনি কৰা হ’ব। যদি আপুনি ট্ৰেভেল ব্লগ, ফুড ভ্লগিং বা লাইফষ্টাইল ৰিলছ বনাই ভাল পায়, তেন্তে এই সুযোগ আপোনাৰ বাবেই।
দূতাবাসে জনোৱা মতে, আবেদনকাৰীগৰাকী ভাৰতীয় নাগৰিক হোৱাটো বাধ্যতামূলক। ইউটিউব, ইনষ্টাগ্ৰাম বা ফেচবুকৰ দৰে ডিজিটেল প্লেটফৰ্মত তেওঁলোকৰ যথেষ্ট পৰিচিতি থাকিব লাগিব। বিশেষকৈ যিসকলে ভ্ৰমণ, আধ্যাত্মিকতা, এডভেঞ্চাৰ বা খোৱা-বোৱাৰ ওপৰত কনটেণ্ট তৈয়াৰ কৰে, তেওঁলোকে ইয়াত অগ্ৰাধিকাৰ পাব। অৱশ্যে কেৱল ফ’ল’ৱাৰৰ সংখ্যাই নহয়, আপোনাৰ আকৰ্ষণীয় কাহিনী কোৱাৰ ধৰণ আৰু উন্নত মানৰ ভিডিঅ’ বনোৱাৰ দক্ষতাও থাকিব লাগিব। ইয়াৰ বাবে ভাষাৰ কোনো বাধ্যবাধকতা নাই, ইংৰাজী, হিন্দী বা যিকোনো ভাৰতীয় আঞ্চলিক ভাষাত ভিডিঅ’ নিৰ্মাণ কৰা ক্ৰিয়েটৰসকলে ইয়াত আবেদন কৰিব পাৰিব।
নিৰ্বাচিত হোৱা এই পাঁচগৰাকী ক্ৰিয়েটৰক নেপালৰ পাহাৰ, হ্ৰদ, প্ৰাচীন স্তূপ আৰু ঐতিহ্যমণ্ডিত ঠাইসমূহলৈ লৈ যোৱা হ’ব। ইয়াৰ বিনিময়ত তেওঁলোকে নিজৰ ছচিয়েল মিডিয়া পেজত নেপালৰ সৌন্দৰ্য দাঙি ধৰিব লাগিব। ট্ৰেভেল ভ্লগ, ৰিলছ, পডকাষ্ট আৰু চৰ্টছৰ জৰিয়তে নেপালৰ পৰম্পৰা আৰু সংস্কৃতি প্ৰচাৰ কৰিব লাগিব। লগতে ভাৰতীয় পৰ্যটকসকলৰ বাবে প্ৰয়োজনীয় ভ্ৰমণৰ পৰামৰ্শ আৰু টিপছ আগবঢ়াব লাগিব।
এই ভ্ৰমণৰ বাবে আবেদন কৰা প্ৰক্ৰিয়াটো অতি সহজ। আবেদনকাৰীয়ে নিজৰ নাম, যোগাযোগৰ নম্বৰ, ছচিয়েল মিডিয়া হেণ্ডেলৰ লিংক আৰু ফ’ল’ৱাৰৰ সংখ্যা দূতাবাসলৈ পঠিয়াব লাগিব। ইয়াৰ লগতে পূৰ্বৰ কিছুমান কামৰ নমুনা আৰু শেষত আপুনি কিয় নেপাললৈ যাব বিচাৰে সেই বিষয়ে এটি চুটি টোকা লিখি পঠিয়াব লাগিব। গতিকে দেৰি নকৰি নিজৰ পাছপৰ্টখন উলিয়াই লওক। কনটেণ্ট বনোৱাৰ নিচা থকাসকলে এই সোণালী সুযোগ কোনো কাৰণতে নেহেৰুৱাব। ভাৰত আৰু নেপালৰ বন্ধুত্বৰ এই নতুন অধ্যায়ৰ অংশ হোৱাটো সঁচাকৈয়ে এক ডাঙৰ সৌভাগ্যৰ কথা।
