অসম আৰক্ষীত খালী হৈ আছে বৃহৎ সংখ্যক পদ। মুঠ ৬,৬৬১টা কনিষ্টবলৰ পদ ৰাজ্যত খালী হৈ থকা বুলি সবিশেষ অসম আৰক্ষীৰ পৰা জানিব পৰা গৈছে। কিন্তু খালী হৈ থকা পদ সমূহ পূৰণ কৰাৰ বিপৰীতে পৰ্যাপ্ত পৰিমাণৰ মানৱ সম্পদ অবিহনেই ৰাজ্যৰ বিভিন্ন পৰিস্থিতিৰ সৈতে মোকাবিলা কৰিব লগীয়া হৈছে অসম আৰক্ষী। কিয়নো পদ পূৰণৰ ক্ষেত্ৰত ৰাজ্য চৰকাৰে লোৱা নাই কোনো ব্যৱস্থা।
অসম আৰক্ষীৰ তথ্যৰ পৰা জানিব পৰা অনুসৰি বিভাগটোত ৮০৩টা উপ-পৰিদৰ্শকৰ পদ খালী হৈ আছে। ইয়াৰে গুৱাহাটী আৰক্ষী আয়ুক্তালয়ত ৪১টা, বিশেষ শাখাত ১১৬টা পদ আৰু সীমান্ত শাখাত খালী হৈ আছে ১৯৪টা পদ।
বিশেষ শাখাৰ দৰে আৰক্ষী চোৰাংচোৱা শাখাতেই যদি এনেদৰে বৃহৎসংখ্যক উপ-পৰিদৰ্শকৰ পদ খালী হৈ থাকে তেন্তে বিভাগটোৱে কিদৰে গোপনীয় তথ্য লাভ কৰিব সেয়া এক ডাঙৰ প্ৰশ্ন। আনহাতে ৰাজ্যৰ বিভিন্ন বেটেলিয়নত সশস্ত্ৰ শাখাৰ ২৯টা উপ পৰিদৰ্শকৰ পদ খালী হৈ আছে।
ইয়াৰ উপৰি বিভাগটোত খালী হৈ আছে আৰক্ষীৰ ২,৩৯৪টা য়ু বি কনিষ্টবল, ২,৯০৭টা এ বি কনিষ্টবল, ৫০টা গাড়ীচালকৰ পদ। একেদৰে বেটেলিয়নসমূহৰো মুঠ ৮৪০টা কনিষ্টবল আৰু ৪২০টা গাড়ীচালকৰ পদ খালী হৈ আছে।
ইয়াৰে সীমান্ত শাখাত ১৫৮টা, ৰে’লৱে আৰক্ষীত ১৫৮টা য়ু বি কনিষ্টবলৰ পদ খালী হৈ থকাৰ বিপৰীতে গুৱাহাটী আৰক্ষী আয়ুক্তালয়ত ৭৫১টা য়ু বি আৰু ৮৬টা এ বি কনিষ্টবলৰ পদ খালী হৈ আছে।
আনহাতে, তিনিচুকীয়া, ধুবুৰী, নগাঁও, ডিব্ৰুগড় আদিৰ দৰে স্পৰ্শকাতৰ জিলাতো বৃহৎসংখ্যক কনিষ্টবলৰ পদ খালী হৈ থকাৰ বিষয়ে বিভাগটোৰ পৰা জানিব পৰা গৈছে।
আৰক্ষীৰ তথ্য অনুসৰি বিভাগটোত সশস্ত্ৰ, অসশস্ত্ৰ, গাড়ীচালক আদিৰ মুঠ ৬,৬৬১টা কনিষ্টবলৰ পদ খালী হৈ আছে। উল্লেখ্য যে বিভাগটোত বৃহৎসংখ্যক পদ খালী হৈ থকাৰ পাছতো কিয় এই সমূহ পদ পূৰণৰ ব্যৱস্থা ৰাজ্য চৰকাৰে কোনো ব্যৱস্থা গ্ৰহণ কৰা নাই সেয়া ৰহস্যৰ আৱৰ্তত।