অসমীয়া জাতিৰ বাবে ২০২৫ চনটো কেৱল এটা বছৰ হৈ নাথাকিল,বৰঞ্চ এক মৰ্মান্তিক ইতিহাস হৈ ৰ’ল। প্ৰাপ্তি আৰু হেৰুওৱাৰ দোমোজাত থকা এই বছৰটোৱে অসমীয়াৰ বুকুত যি দাগ কাটি গ’ল, সেয়া হয়তো যুগ যুগ ধৰি মচিব পৰা নাযাব। বিশেষকৈ ৰাজ্যৰ সাংস্কৃতিক জগতৰ ধ্ৰুৱতৰা জুবিন গাৰ্গৰ অকাল বিদায়ে সমগ্ৰ অসমবাসীক এতিয়াও শোকস্তব্ধ কৰি ৰাখিছে।
২০২৫ বৰ্ষটোৰ আটাইতকৈ মৰ্মান্তিক খবৰটো আহিছিল ১৯ ছেপ্টেম্বৰত। ছিংগাপুৰৰ ‘নৰ্থ ইষ্ট ইণ্ডিয়া ফেষ্টিভেল’ত অংশ ল’বলৈ গৈ সাগৰৰ বুকুত সাতুৰি থকা অৱস্থাত অসমীয়াৰ হিয়াৰ আমঠু জুবিন গাৰ্গৰ মৃত্যু হয়। এই খবৰে কেৱল এজন শিল্পীকে কাঢ়ি নিয়া নাছিল, বৰঞ্চ প্ৰতিজন অসমীয়াৰ ঘৰৰ এজন আপোন সদস্যক হেৰুওৱাৰ বেদনা দিছিল। তেওঁৰ অন্ত্যেষ্টিক্ৰিয়াৰ স্থান এক মন্দিৰলৈ ৰূপান্তৰিত হোৱা দৃশ্যই প্ৰমাণ কৰিলে যে জুবিন কেৱল এজন গায়ক নাছিল, তেওঁ আছিল এক সত্তা, এক আৱেগ।
কেৱল জুবিন গাৰ্গেই নহয়, বছৰটোৰ আৰম্ভণিতে ২ জানুৱাৰীত আমি হেৰুৱালোঁ বিশিষ্ট চলচ্চিত্ৰ প্ৰযোজক পৰাণ বৰবৰুৱাক। ইয়াৰ মাত্ৰ কেইদিনমান পিছতে ৮ জানুৱাৰীত ৯৩ বছৰ বয়সত জীৱন নাটৰ সামৰণি মাৰে কিংবদন্তি অভিনেত্ৰী তথা আন্তঃৰাষ্ট্ৰীয় মঞ্চত অসমীয়া ছবিৰ প্ৰথম প্ৰতিনিধি জ্ঞানদা কাকতিয়ে।
১৩ জানুৱাৰীৰ দিনা বিহুৰ উৰুকাৰ আনন্দৰ মাজতে গণশিল্পী ৰাজীৱ শদিয়াৰ মৃত্যুৱে সাংস্কৃতিক ক্ষেত্ৰখনত গভীৰ ছাঁ পেলায়। একেদৰে বিশিষ্ট তবলাবাদক আবিৰ বৰগোহাঞি (১৯ জানুৱাৰী), সুকণ্ঠী গায়িকা বীণা ভাগৱতী (৩ ফেব্ৰুৱাৰী), বাঁহীৰ যাদুকৰ দীপক শৰ্মা (৩ নৱেম্বৰ) আৰু বহুমুখী প্ৰতিভাসম্পন্ন শিল্পী চৈয়দ ছাদুল্লাৰ (৩০ অক্টোবৰ) বিয়োগে অসমৰ সাংস্কৃতিক বৰঘৰটো উদং কৰি থৈ গ’ল।
২০২৫ চনটোত আমাক কেইবাটাও মৰ্মান্তিক দুৰ্ঘটনাই জোকাৰি গ’ল। জানুৱাৰী মাহত উমৰাংছুৰ এটা অবৈধ কয়লা খনিত পানী সোমাই ৯ গৰাকী শ্ৰমিকৰ মৃত্যু হোৱা ঘটনাই খনন কাৰ্যৰ সুৰক্ষাক লৈ প্ৰশ্ন উত্থাপন কৰিলে। আনহাতে, বছৰৰ শেষৰ ফালে মাজুলীত ‘ফৰেষ্ট মেন’ যাদৱ পায়েঙৰ ‘মলাই কাঠনি ২.০’ অৰণ্যত দুষ্কৃতিকাৰীয়ে জুই লগাই দিয়া ঘটনাই প্ৰকৃতিপ্ৰেমীসকলক ব্যথিত কৰিলে। ইয়াৰ উপৰি ম্যানমাৰ সীমান্তত বিচ্ছিন্নতাবাদী গোটৰ সৈতে হোৱা সংঘৰ্ষই ৰাজ্যবাসীক ম্ৰিয়মান কৰিলে।
শোকৰ মাজতো অসমৰ বাবে কিছু ভাল খবৰ কঢ়িয়াই আনিছিল এই বছৰটোৱে। চৰাইদেউ মৈদামে ইউনেস্কোৰ বিশ্ব ঐতিহ্য ক্ষেত্ৰৰ মৰ্যাদা লাভ কৰাটো অসমীয়াৰ বাবে এক ঐতিহাসিক ক্ষণ হিচাপে চিহ্নিত হ’ল। অৰ্থনৈতিক দিশত ‘Advantage Assam 2.0’ সন্মিলনৰ জৰিয়তে ২.৭৭ লাখ কোটি টকাৰ বিনিয়োগৰ আশাই নতুন সম্ভাৱনাৰ দুৱাৰ মুকলি কৰিলে। ৰাজনৈতিকভাৱে ‘বহুপত্নী প্ৰথা নিষিদ্ধকৰণ বিল’ আৰু ‘সত্ৰ সংৰক্ষণ বিল’ৰ দৰে গুৰুত্বপূৰ্ণ পদক্ষেপে নতুন সামাজিক সংস্কাৰৰ ইংগিত দিলে। গুৱাহাটী বিমানবন্দৰৰ নতুন টাৰ্মিনেল আৰু ব্ৰহ্মপুত্ৰৰ ওপৰত নিৰ্মীয়মান দলংসমূহে ৰাজ্যৰ আন্তঃগাঁথনিৰ নতুন ছবিখন দাঙি ধৰিলে।
