মাইক্ৰ’ছফ্টৰ মুৰব্বী সত্য নাডেলাৰ সৈতে ‘এআই যুঁজ’ত নামিবলৈ সাজু গুগলৰ চিইঅ’ সুন্দৰ পিচাই। কেইমাহমানৰ আগতে সত্যই কটাক্ষ কৰিছিল যে এআই যুঁজত গুগল আগবাঢ়ি থকা উচিত আছিল। সেই মন্তব্যৰ উত্তৰ দিলে সুন্দৰে।
নিউয়ৰ্ক টাইমছৰ ডিলবুক ছামিটত অংশগ্ৰহণ কৰিছিল গুগলৰ চিইঅ’গৰাকীয়ে। তেতিয়াই তেওঁ কয়, “আমাৰ মডেলটোক মাইক্ৰ’ছফ্টৰ নিজৰ মডেলৰ সৈতে তুলনা কৰি দেখুৱালৈ মই সাজু আছো। যিকোনো দিন, যিকোনো সময়তে। তেওঁলোকেতো আনৰ মডেল ব্যৱহাৰ কৰি আছে। আমি এটা নতুন জেনেৰেশ্যনৰ মডেলক লৈ কাম কৰি আছো।”
সত্য নাডেলাই ইয়াৰ পূৰ্বে নৰ্জেছ বেংক ইনভেষ্টমেণ্ট মেনেজমেণ্টৰ প’ডকাষ্টৰ এক সাক্ষাৎকাৰত কৈছিল, “গুগলে স্বাভাৱিকতে এআই যুঁজত জয়ী হ’ব লাগিছিল। সেই সংস্থাটো অতি কাৰ্যক্ষম। তেওঁলোকৰ হাতত ডাটাৰ পৰা আৰম্ভ কৰি চিলিকন, মডেল, প্ৰডাক্টলৈকে সকলো আছে।”
স্বাভাৱিকতে তেওঁৰ মন্তব্যত থকা কটাক্ষৰ পিছত সংশ্লিষ্ট মহলৰ চকু গুগলত আছিল। অৱশেষত টেক জায়ান্টৰ চিইঅ’ই ভাৰতীয় মূলৰ সুন্দৰ পিচাইয়ে মুখ খুলিলে। ইয়াৰ উত্তৰত সত্য নাডেলাই ওলোটাই কিবা কয় নেকি তালৈ এতিয়া বিশেষজ্ঞসকলে চকু ৰাখিব।
উল্লেখ্য যে, কৃত্ৰিম বুদ্ধিমত্তাৰ বাবেই মানৱ সভ্যতাৰ বিলুপ্তি হ’ব পাৰে! এনে আশংকা অধিক প্ৰবল হৈ আহিছে। বিশেষকৈ ChatGPTৰ দৰে বটৰ আবিৰ্ভাৱৰ পিছৰে পৰা সেই সম্ভাৱনা আৰু অধিক শক্তিশালী হৈ পৰিছে। ইয়াৰ আগতে ষ্টিফেন হকিঙৰ দৰে বিজ্ঞানীয়ে এনে আশংকাৰ কথা কৈ গৈছে।
কিন্তু ইয়াৰ সমান্তৰালভাৱে এআইৰ গুৰুত্ব বৃদ্ধি পাবলৈ আৰম্ভ কৰিছে। সময়ৰ লগে লগে বিশ্বৰ আগশাৰীৰ প্ৰযুক্তি কোম্পানীসমূহে নিজৰ নিজৰ এআই মডেল বজাৰলৈ আনিছে। যাক কেন্দ্ৰ কৰি প্ৰতিযোগিতাৰ পৰিৱেশ সৃষ্টি হৈছে। এইবাৰ গুগলৰ চিইঅ’ই সেই প্ৰতিযোগিতাত মাইক্ৰ’ছফ্টক ‘যুঁজ’লৈ মাতিলে।
