সমগ্ৰ দেশতে ব্যাপক ছাঁটাই চলি আছে। প্ৰযুক্তি উদ্যোগৰ কৰ্মীসকল আটাইতকৈ বেছি ক্ষতিৰ সন্মুখীন হৈছে। গুগলে এইবাৰ মাইক্ৰছফ্টৰ পথেৰে আগবাঢ়ি বৃহৎ সংখ্যক কৰ্মচাৰী কৰ্তন কৰিব। শুকুৰবাৰে গুগলৰ মূল স্বত্বাধিকাৰী এলফাবেট ইঙ্কৰ ফালৰ পৰা কোৱা হৈছে যে কমেও ১২ হাজাৰ কৰ্মচাৰী বা মুঠ কৰ্মচাৰীৰ ৬ শতাংশৰ চাকৰি কৰ্তন হ’ব।
শেহতীয়াকৈ বিল গেটছৰ কোম্পানী মাইক্ৰছফ্টে প্ৰায় ১১ হাজাৰ কৰ্মচাৰী হ্ৰাস কৰা বুলি বাতৰি পোৱা গৈছিল। এইবাৰ গুগলৰ মুখ্য কাৰ্যবাহী বিষয়া সুন্দৰ পিচাইয়েও কৰ্মচাৰীসকললৈ এটা ই-মেইল প্ৰেৰণ কৰিছে। একে সময়তে, তেওঁ কৰ্মচাৰীসকলৰ ওচৰত ক্ষমা বিচাৰিছে।
লগতে পঢ়ক: অষ্ট্ৰেলিয়াত আৱিষ্কৃত বিশাল আকৃতিৰ ভেকুলী; নাম দিয়া হৈছে ‘টোডজিলা’
তেওঁ কৈছে, “অতি দুখৰ সৈতে আমি আনুমানিক ১২,০০০ কৰ্মচাৰী হ্ৰাস কৰাৰ সিদ্ধান্ত লৈছো। বিভিন্ন বিভাগৰ কৰ্মচাৰীসকলৰ প্ৰদৰ্শনৰ আধাৰত এই প্ৰক্ৰিয়াটো সম্পূৰ্ণ কৰা হ’ব। ইতিমধ্যে আমেৰিকা যুক্তৰাষ্ট্ৰৰ কৰ্মচাৰীসকললৈ ই-মেইলযোগে এই বাৰ্তা প্ৰেৰণ কৰা হৈছে। আন দেশৰ কৰ্মচাৰীসকলেও সোনকালেই ই-মেইল পাব। তাত থকা সংশ্লিষ্ট নিয়ম অনুসৰি ই-মেইল কৰা হ’ব বাবে অলপ বেছি সময় লাগিছে।”
তাৰপিছতে ক্ষমা বিচাৰি তেওঁ কয়,”এনে সিদ্ধান্তৰ বাবে মই অত্যন্ত দুঃখিত। মই জানো ইয়াত কৰ্মচাৰীসকলৰ ওপৰত কি কঠিন চাপ পৰিব। আজি এই পৰিস্থিতি সৃষ্টি হোৱাৰ বাবে মই সকলো দায়িত্ব মূৰ পাতি লৈছো।”
এলফাবেট ইঙ্কে গুগল, ইউটিউব আৰু অন্যান্য প্লেটফৰ্মৰ বাবে পৃথিৱীৰ বিভিন্ন প্ৰান্তৰ পৰা প্ৰতিভা বিচাৰি আনিছে। কিন্তু যিহেতু মাইক্ৰছফ্টৰ দৰে কোম্পানীৰ সৈতে প্ৰতিযোগিতা বাঢ়ি গৈ আছে, তেওঁলোকেও ব্যয় হ্ৰাস কৰাৰ পথত খোজ দিবলৈ বাধ্য হৈছে। সেয়েহে, কৃত্ৰিম বুদ্ধিমত্তাৰ জৰিয়তে এটা ডাঙৰ অংশৰ কাম কৰাৰ সিদ্ধান্ত লোৱা হৈছে।
লগতে পঢ়ক: আমেৰিকান ৰক কিংবদন্তী ডেভিদ ক্ৰছবীৰ পৰলোকপ্ৰাপ্তি
অৱশ্যে, গুগলে কৈছে যে কৰ্মচাৰীসকলক খালী হাতেৰে চাকৰিৰ পৰা অপসাৰণ কৰা নহয়। তেওঁলোকক কমেও ৬০ দিনৰ জাননীৰ সময়ত সম্পূৰ্ণ দৰমহা দিয়া হ’ব। তেওঁলোকে ২০২২ চনৰ বাবে বোনাচ আৰু উপযুক্ত ছুটীও পাব। ইয়াৰ উপৰিও, গুগলত কাম কৰা বছৰৰ সংখ্যাৰে বছৰ হিচাপে দুসপ্তাহৰ দৰমহা পৰিশোধ কৰা হ’ব। কোম্পানীটোৱে ছয় মাহৰ স্বাস্থ্য বীমা আৰু নিযুক্তি সেৱাও প্ৰদান কৰিব।
