সমগ্ৰ ভাৰতবৰ্ষত কৰ্কট ৰোগৰ চিকিৎসাত ব্যৱহৃত অত্যাৱশ্যকীয় কেমোথেৰাপি ঔষধৰ নাটনিয়ে উদ্বেগ বৃদ্ধি কৰিছে। এনে পৰিস্থিতিত কেন্দ্ৰই প্লেটিনাম ভিত্তিক গুৰুত্বপূৰ্ণ কৰ্কটৰ ঔষধৰ মূল্য বৃদ্ধিৰ অনুমোদনৰ খবৰ পোহৰলৈ আহিছে। ফলত হাজাৰ হাজাৰ কৰ্কট ৰোগীয়ে দুটা কথাৰ চাপৰ সন্মুখীন হ’ব পাৰে – এফালে যোগানৰ সংকট আৰু আনফালে সম্ভাৱ্য মূল্যবৃদ্ধি।
চিছপ্লেটিন আৰু কাৰ্ব’প্লেটিনৰ দৰে গুৰুত্বপূৰ্ণ কেমোথেৰাপি ঔষধৰ যোগান দেশৰ বিভিন্ন প্ৰান্তত ব্যাহত হৈ পৰা বুলি দাবী কৰিছে চিকিৎসক আৰু ঔষধ কোম্পানীয়ে। হাওঁফাওঁ, ডিম্বাশয়, জৰায়ু, মূৰ আৰু ডিঙিৰ লগতে আন কেইবাটাও কঠিন কৰ্কট ৰোগৰ চিকিৎসাত দীৰ্ঘদিন ধৰি এই ঔষধ ব্যৱহাৰ হৈ আহিছে।
উদ্যোগটোৰ মতে আন্তঃৰাষ্ট্ৰীয় বজাৰত প্লেটিনামৰ মূল্য অস্বাভাৱিকভাৱে বৃদ্ধি পোৱাৰ বাবে উৎপাদন ব্যয়ো বহুগুণ বৃদ্ধি পাইছে। কেইবাটাও কোম্পানীয়ে দাবী কৰিছে যে যোৱা এবছৰত প্লেটিনামৰ মূল্য প্ৰায় দুগুণ বৃদ্ধি পাইছে। কিন্তু চৰকাৰী মূল্য নিয়ন্ত্ৰণৰ বাবে সেই অতিৰিক্ত খৰচ বজাৰত প্ৰতিফলিত কৰা সম্ভৱ হোৱা নাই।
এনে পৰিস্থিতিত দীৰ্ঘদিন ধৰি উৎপাদক কোম্পানীসমূহে মূল্য সীমা পুনৰীক্ষণৰ দাবী জনাই আহিছে। বিভিন্ন সূত্ৰৰ মতে, চিছপ্লেটিন, কাৰ্ব’প্লেটিন আৰু অক্সালিপ্লেটিনৰ দৰে কৰ্কটৰ ঔষধৰ মূল্য বৃদ্ধিৰ প্ৰস্তাৱৰ ওপৰত কেন্দ্ৰীয় পৰ্যায়ত আলোচনা আগবাঢ়িছে আৰু মূল্য পুনৰীক্ষণৰ পথত ইতিবাচক স্থিতি গ্ৰহণ কৰা হৈছে।
ঔষধ নিৰ্মাতাসকলৰ এটা অংশই দাবী কৰে যে বৰ্তমানৰ মূল্যত উৎপাদন অব্যাহত ৰখাটো আৰ্থিকভাৱে কঠিন হৈ পৰিছে। কিছুমান কোম্পানীয়ে উৎপাদন হ্ৰাস কৰাৰ বিপৰীতে কিছুমান কোম্পানীয়ে সাময়িকভাৱে উৎপাদন বন্ধ কৰি দিছে। ইয়াৰ বাবে চিকিৎসালয় আৰু বিতৰণ নেটৱৰ্কৰ ওপৰত যোগানৰ চাপ বৃদ্ধি পাইছে।
বিশেষজ্ঞসকলে আশংকা কৰিছে যে যদি এই সংকট দীৰ্ঘদিন ধৰি থাকে তেন্তে কৰ্কট ৰোগীৰ চিকিৎসা চক্ৰত ব্যাঘাত জন্মিব পাৰে। কেমোথেৰাপিৰ নিৰ্দিষ্ট সময়সূচী মানি চলাটো অতি গুৰুত্বপূৰ্ণ। ঔষধৰ অভাৱত চিকিৎসা পলম হ’লে ৰোগীৰ সুস্থ হোৱাৰ সম্ভাৱনা আৰু চিকিৎসাৰ ফলপ্ৰসূতাত প্ৰভাৱ পৰিব পাৰে।
বৰ্তমান চৰকাৰৰ সন্মুখত ডাঙৰ প্ৰত্যাহ্বান হৈছে ৰোগীৰ বাবে ঔষধৰ উপলব্ধতা নিশ্চিত কৰা আৰু একে সময়তে মূল্যবৃদ্ধিৰ প্ৰভাৱ নিয়ন্ত্ৰণ কৰা। কাৰণ উৎপাদন বজাই ৰাখিবলৈ মূল্য বৃদ্ধিৰ প্ৰয়োজন হ’লেও ইয়াৰ প্ৰত্যক্ষ প্ৰভাৱ কেন্সাৰ চিকিৎসাৰ সামগ্ৰিক খৰচত পৰিব পাৰে।
কৰ্কট ৰোগৰ দৰে গুৰুতৰ ৰোগৰ চিকিৎসাৰ বাবে ব্যৱহাৰ কৰা জীৱন ৰক্ষাকাৰী ঔষধৰ সংকট এতিয়া জনস্বাস্থ্য ব্যৱস্থাৰ বাবে এক ডাঙৰ চিন্তাৰ বিষয় হৈ পৰিছে। আগন্তুক দিনত মূল্যবৃদ্ধি আৰু যোগানৰ পৰিস্থিতি কেনেদৰে নিয়ন্ত্ৰণ কৰা হ’ব তালৈ চিকিৎসক, ৰোগী আৰু স্বাস্থ্য নীতি বিশেষজ্ঞৰ দৃষ্টি ৰৈছে।
