নিৰ্ধাৰিত লক্ষ্যতকৈ জি এছ টি সংগ্ৰহৰ পৰিমাণ কম হোৱা বাবে চিন্তিত হৈ পৰা কেন্দ্ৰীয় চৰকাৰে বিষয়টো তদাৰক কৰিবলৈ এখন ১২ জনীয়া নতুন কমিটি গঠন কৰি দিছে।
কি কাৰণত জি এছ টি সংগ্ৰহৰ পৰিমাণ ১৩ শতাংশৰ পৰা ৫ শতাংশলৈ অৱনমিত হ’ল সেই সন্দৰ্ভত কমিটিখনে অহা ১৫ দিনত ইয়াৰ প্ৰথমখন ৰিপ’ৰ্ট কেন্দ্ৰীয় চৰকাৰক প্ৰদান কৰিব।
কমিটিখনত মহাৰাষ্ট্ৰ, তামিলনাডু, উত্তৰ প্ৰদেশ, পশ্চিম বংগ, পঞ্জাৱৰ জি এছ টি কাউন্সিলৰ আয়ুক্ত আৰু কেন্দ্ৰীয় জি এছ টি কাউন্সিলৰ যুটীয়া সচিব আৰু কাৰ্যকৰী উপাধ্যক্ষও আছে।
ইয়াৰ উপৰি অন্য ৰাজ্যৰ আয়ুক্ত সকলে যদি এই নতুন কমিটিখনৰ সদস্য হিচাপে অন্তৰ্ভুক্ত হ’ব বিচাৰে তেন্তে ইয়াৰ বাবে তেওঁলোকে জি এছ টি কাউন্সিলৰ সচিবালয়ক পত্ৰযোগে জনাব পাৰিব।
হ্ৰাস পোৱা জি এছ টি সংগ্ৰহৰ পৰিমাণ কেনেদৰে বৃদ্ধি কৰিব পৰা যাব, কেনেদৰে বাণিজ্য ক্ষেত্ৰত জি এছ টি সুলভ কৰিব পৰা যাব আদি ক্ষেত্ৰত এই কমিটিখনে কাম কৰিব।
উল্লেখ্য যে ধাৰাবাহিকভাৱে হ্ৰাস পাইছে জি এছ টি সংগ্ৰহৰ পৰিমাণ। ছেপ্তেম্বৰ মাহত জি এছ টি সংগ্ৰহৰ পৰিমান হৈছে ৯১,৯১৬ কোটি টকা, তাৰ বিপৰীতে আগষ্ট মাহত এই পৰিমান আছিল ৯৮,২০২ কোটি টকা।
এইদৰে জি এছ টি সংগ্ৰহৰ পৰিমাণ ধাৰাবাহিকভাৱে হ্ৰাস পাই অহাৰ ফলত ২০১৯-২০ বিত্তীয় বৰ্ষত আশা কৰাতকৈ ৪০ হাজাৰ কোটি টকা কম হোৱাৰ আশংকা ব্যক্ত কৰিছে। ইয়াকে লৈ এতিয়া চিন্তিত হৈ পৰিছে ৰাজ্যসমূহ।
এটা সূত্ৰৰ মতে, অলপতে গোৱাত অনুষ্ঠিত হোৱা জি এছ টি কাউন্সিলৰ বৈঠকত এই সম্পৰ্কে ৰাজ্য সমূহৰ বিত্ত মন্ত্ৰীসকলক অৱগত কৰা হৈছে।
উল্লেখ্য যে অলপতে কেন্দ্ৰীয় বিত্ত মন্ত্ৰী নিৰ্মলা সীতাৰমণে ঘৰুৱা প্ৰতিষ্ঠানসমূহৰ ক্ষেত্ৰত কৰ্পোৰেট কৰ হ্ৰাস কৰাৰ কথা ঘোষণা কৰিছিল। বিত্ত মন্ত্ৰীৰ এই ঘোষণাক আদৰণি জনাইছিল জি এছ টি কাউন্সিল পৰিষদে।
ইয়াৰ উপৰি যোৱা ২০ ছেপ্তেম্বৰত গোৱাত অনুষ্ঠিত হোৱা জি এছ টি কাউঞ্চিলৰ ৩৭ সংখ্যক বৈঠকত অটোমোবাইল, বিস্কুট আদি সামগ্ৰীৰ ক্ষেত্ৰতো জি এছ টিৰ সালসলনি দিশত পৰ্যালোচনা কৰা হৈছিল।
