শিৱসেনাৰ উদ্ধৱ থাকৰে গোট আৰু সিন্দে গোটৰ মাজত হোৱা বাদানুবাদ আৰু এই ক্ষেত্ৰত মহাৰাষ্ট্ৰৰ ৰাজ্যপাল ভগত সিং কোশিয়াৰীৰ ভূমিকা সন্দৰ্ভত আজি কঠোৰ স্থিতি লয় উচ্চতম ন্যায়ালয়ে। সেনা বনাম সেনা গোচৰৰ শুনানি গ্ৰহণ কৰি উচ্চতম ন্যায়ালয়ে বিগত বৰ্ষত উদ্ধৱ থাকৰে নেতৃত্বাধীন চৰকাৰক ক্ষমতাচ্যুত কৰা মহাৰাষ্ট্ৰৰ আস্থা ভোটত ৰাজ্যপাল কোশিয়াৰীৰ ভূমিকা সন্দৰ্ভত পৰ্যৱেক্ষণ কৰি ৰাজ্যপালৰ কৰ্তব্য সোঁৱৰাই দিয়ে।
ৰাজ্যপাল কোশিয়াৰীৰ স্থিতিক কঠোৰ সমালোচনা কৰি উচ্চতম ন্যায়ালয়ৰ বিচাৰপীঠে কয় যে ৰাজ্যপালে সতৰ্কতাৰে ক্ষমতা প্ৰয়োগ কৰিব লাগিব আৰু আস্থা ভোটৰ আহ্বানে যে চৰকাৰক ক্ষমতাচ্যুত কৰিব পাৰে সেই বিষয়ত সজাগ হ’ব লাগিব। কেৱল শাসকীয় দলৰ ভিতৰৰ মতানৈক্যৰ ভিত্তিত আস্থা ভোটৰ আহ্বানে নিৰ্বাচিত চৰকাৰক উৎখাত কৰিব পাৰে বুলিও ন্যায়ালয়ে সোঁৱৰাই দিয়ে।
মুখ্য ন্যায়াধীশ ডি ৱাই চন্দ্ৰচূড়ৰ নেতৃত্বত পাঁচজনীয়া সংবিধান বিচাৰপীঠে কয়, “ৰাজ্যপালে সচেতন হ’ব লাগিব যে আস্থা ভোটৰ আহ্বানৰ ফলত চৰকাৰৰ পতন ঘটিব পাৰে। চৰকাৰৰ পতনৰ গতি ক্ষীপ্ৰ কৰা কোনো ক্ষেত্ৰতে ৰাজ্যপালে প্ৰৱেশ কৰা উচিত নহয়। জনসাধাৰণে শাসকীয় দলটোক অবিশ্বাস কৰিবলৈ ল’ব আৰু ৰাজ্যপালে শাসকীয় দলটোক উৎখাত কৰিব। এয়া গণতন্ত্ৰৰ বাবে এক দুখজনক দৃশ্য।”
বিচাৰপীঠে লগতে ৰাজ্যপালসকলে তেওঁলোকৰ ক্ষমতা যথোপযুক্ত পৰ্যবেক্ষণৰ ভিত্তিত ব্যৱহাৰ কৰিব লাগিব বুলিও উল্লেখ কৰে। উল্লেখ্য যে, সিন্দে গোটৰ বিসম্বাদৰ ফলশ্ৰুতিত মহাৰাষ্ট্ৰত ক্ষমতা হেৰুৱাইছিল উদ্ধৱ থাকৰে নেতৃত্বাধীন শিৱসেনা-এনচিপি-কংগ্ৰেছ মিত্ৰজোঁটৰ চৰকাৰে। বিগত মাহত নিৰ্বাচন আয়োগে শিৱসেনাৰ নাম আৰু দলীয় প্ৰতীক একনাথ সিন্দে গোটক প্ৰদান কৰিছিল।
ইয়াৰ পিছতে উচ্চতম ন্যায়ালয়ৰ কাষ চাপিছিল উদ্ধৱ থাকৰে। সিন্দে চৰকাৰৰ যোগ্যতাৰ ওপৰত প্ৰশ্ন উত্থাপন কৰি থাকৰেই যুক্তি দৰ্শাইছে যে আস্থা ভোটৰ সময়ত সিন্দে আৰু আন ১৫ গৰাকী বিসম্বাদী বিধায়কক অযোগ্য ঘোষণা কৰা হৈছিল। এই গোচৰৰ শুনানি গ্ৰহণকৰি উচ্চতম ন্যায়ালয়ে ৰাজ্যপাল কোশিয়াৰীক এই আস্থা ভোটৰ আধাৰ কি আছিল, সেই সন্দৰ্ভত তীক্ষ্ণ প্ৰশ্ন তুলিছে।
বিচাৰপীঠে কয় যে, এটা দলৰ ভিতৰত বিধায়কসকলৰ মাজত উন্নয়ন পুঁজি পৰিশোধ বা দলীয় লোকাচাৰৰ পৰা বিচ্যুতিৰ দৰে যিকোনো ভিত্তিত মতভেদ হ’ব পাৰে। কিন্তু সেয়া ৰাজ্যপালে আস্থা ভোটৰ বাবে আহ্বান জনোৱাৰ বাবে পৰ্যাপ্ত ভিত্তি হ’ব পাৰে নেকি বুলি প্ৰশ্ন কৰে আদালতে।
শীৰ্ষ আদালতৰ এই প্ৰশ্নৰ উত্তৰত ছলিচিটৰ জেনেৰেল তুষাৰ মেহতাই বিদ্ৰোহী বিধায়কসকলে উদ্ধৱ থাকৰেৰ ওপৰত আস্থা হেৰুৱাইছে বুলি যুক্তি দৰ্শাই যদিও মুখ্য ন্যায়াধীশ চন্দ্ৰচূড়ে দলৰ অসন্তুষ্টিৰ বাবে ৰাজ্যপালে আস্থা ভোটৰ আহ্বান জনোৱাটো ন্যায়সঙ্গত নহয় বুলি মন্তব্য কৰে।
