চলিত বছৰৰ ১ ডিচেম্বৰৰ পৰা সকলো যান-বাহনৰ কাৰণে FASTag বাধ্যতামূলক কৰিছিল যদিও শেহতীয়াভাৱে চৰকাৰে ইয়াৰ সময়সীমা বৃদ্ধি কৰি ১৫ ডিচেম্বৰ কৰিছে।
‘FASTag লগোৱাৰ ক্ষেত্ৰত নাগৰিকসকলে যাতে আৰু অলপ সময় লাভ কৰে তাৰ বাবে কেন্দ্ৰীয় পথ পৰিবহন আৰু যোগাযোগ মন্ত্ৰালয়ে বৈদ্যুতিকভাৱে টোল সংগ্রহ কৰাৰ সময়সীমা ১৫ ডিচেম্বৰলৈ বৃদ্ধি কৰাৰ সিদ্ধান্ত গ্ৰহণ কৰে’, বিভাগৰ ফালৰ পৰা এই কথা জনায়।
উল্লেখ্য যে কেন্দ্রীয় পৰিবহন মন্ত্রী নীতিন গাডকাৰিয়ে যোৱা মাহত এক ঘোষণাৰ জৰিয়তে কৈছিল যে FASTag নথকা যান-বাহন সমূহৰ পৰা দুগুন হাৰত টোল সংগ্ৰহ কৰা হ’ব।
এই পাইলট প্রকল্পটো ২০১৪ চনত আৰম্ভ হৈছিল য’ত Radio Frequency Identification Technology (RFID) প্রযুক্তিৰ সহায়ত বৈদ্যুতিকভাৱে টোল সংগ্রহ কৰা হ’ব। নাথাকিব টোল গেটত শাৰী পাতি থকা সমস্যা।
টোল সংগ্রহৰ বাবে FASTag টিক গাড়ীৰ উইণ্ড’স্ক্ৰিণত সংযুক্ত কৰিব লাগিব। RFID-চালিত প্রযুক্তি যিখন টোল প্লাজাত উপলব্ধ, সেইপিনে স্বয়ংকৃতভাৱে টোল সংগ্ৰহ কৰা হ’ব।
FASTagৰ বিষয়ে সবিশেষ পঢ়িবলৈ ইয়াত ক্লিক কৰক : ১ ডিচেম্বৰৰ পৰা সকলো যান-বাহনত FASTag বাধ্যতামূলক; কিদৰে লাভ কৰিব FASTag
ভাৰতীয় ৰাষ্ট্ৰীয় ঘাইপথ প্ৰাধিকৰণৰ বিষয়াই জানিবলৈ দিয়া অনুসৰি ১৫ ডিচেম্বৰলৈ FasTag সম্পূৰ্ণ বিনামূলীয়াকৈ লাভ কৰিব।
দেশৰ প্ৰায় ৫৩৭ টা টোল গেটত ইতিমধ্যে বৈদ্যুতিক টোলিঙৰ ব্যৱস্থা সম্পূৰ্ণ হৈ উঠিছে।
জানিব পৰা মতে ২৭ নৱেম্বৰ অৰ্থাৎ বুধবাৰলৈকে দেশত প্ৰায় ৭০ লাখ FasTag ইচ্ছ্যু হৈছে। ২৬ নৱেম্বৰত সৰ্বাধিক ১,৩৫,৫৮৩ টেগছ ইচ্ছ্যু হৈছিল আৰু তাৰ আগৰ দিনটোত ইচ্ছ্যু হৈছিল ১.০৩ লাখ।
