Shaktikanta Das RBI Governor: প্ৰধান মন্ত্ৰী নৰেন্দ্ৰ মোদী আৰু কেন্দ্ৰত শাসনাধিষ্ঠ বিজেপি চৰকাৰৰ সৈতে ঘনিষ্ঠ সম্পৰ্কৰ ফল পাইছে ৰিজাৰ্ভ বেংকৰ গভৰ্নৰ শক্তিকান্ত দাসে। আজি কেন্দ্ৰীয় চৰকাৰে ভাৰতীয় ৰিজাৰ্ভ বেংকৰ গভৰ্নৰ শক্তিকান্ত দাসৰ কাৰ্যকাল ২০২৪ চনৰ ডিচেম্বৰলৈকে তিনি বছৰৰ বাবে বৃদ্ধি কৰে।
“কেবিনেটৰ নিযুক্তি সমিতিয়ে শক্তিকান্ত দাসক ভাৰতীয় ৰিজাৰ্ভ বেংকৰ গভৰ্ণৰ হিচাপে ২০২১ চনত ১০ ডিচেম্বৰত অন্ত পৰিব লগীয়া কাৰ্যকাল তিনি বছৰৰ বাবে বা পৰৱৰ্তী আদেশ লৈকে পুনৰ নিযুক্তি দিয়াত অনুমোদন জনাইছে।” এক চৰকাৰী বিবৃতিত এইদৰে প্ৰকাশ পাইছে।
দাসে ২০১৫ চনৰ পৰা ২০১৭ চনলৈ অৰ্থনৈতিক পৰিক্ৰমা বিভাগৰ প্ৰাক্তন সচিব হিচাপে কাৰ্যনিৰ্বাহ কৰিছিল।
শক্তিকান্ত দাসৰ প্ৰধানমন্ত্ৰী নৰেন্দ্ৰ মোদীৰ সৈতে ঘনিষ্ঠ সম্পৰ্ক আছে বুলি কোৱা হয়। তেওঁ দীৰ্ঘদিন ধৰি মোডীৰ বিত্ত বিভাগৰ সচিব আছিল। ২০১৬ চনৰ নৱেম্বৰত প্ৰধানমন্ত্ৰীয়ে বিমুদ্ৰাকৰণৰ সিদ্ধান্ত লোৱাৰ সময়তো শক্তিকান্ত দাসে সচিবৰ দায়িত্ব বহন কৰি আছিল।
তেওঁ কেন্দ্ৰৰ দ্বাৰা বিমুদ্ৰাকৰণৰ ওপৰত বহুতো স্পষ্টীকৰণ দিয়া শুনা গৈছে। শক্তিকান্ত দাসক ইয়াৰ বাবে পুৰস্কাৰ হিচাপে ৰিজাৰ্ভ বেংক (RBI)ৰ গভৰ্ণৰ হিচাপে নিযুক্ত কৰা হৈছিল। তেওঁ ১৫ তম বিত্ত আয়োগৰ সদস্যও আছিল।
২০১৮ চনত উৰ্জিত পেটেলে ৰিজাৰ্ভ বেংকৰ গভৰ্নৰ পদৰ পৰা অব্যাহতি লোৱাৰ পাছত কেন্দ্ৰীয় চৰকাৰে শক্তিকান্ত দাসক গভৰ্নৰ পদত নিযুক্তি দিছিল। প্ৰধানমন্ত্ৰী নৰেন্দ্ৰ মোদীৰ প্ৰধান মন্ত্ৰীত্ব কালত ৰিজাৰ্ভ বেংকৰ দুজন গভৰ্নৰ হিচাপে কাৰ্যনিৰ্বাহ কৰা ৰঘুৰাম ৰাজন আৰু উৰ্জিত পেটেল দুয়ো অৰ্থনীতিৰ বিদ্বান আছিল।
আনহাতে বৰ্তমানৰ গভৰ্নৰ শক্তিকান্ত দাসৰ অৰ্থনীতিত কোনো ডাঙৰ ডিগ্ৰী নাই, কিন্তু প্ৰধানমন্ত্ৰীৰ সৈতে ঘনিষ্ঠতাৰ সূত্ৰেই বুৰঞ্জীৰ ডিগ্ৰীধাৰী শক্তিকান্ত দাস ৰিজাৰ্ভ বেংকৰ গভৰ্নৰ পদত অধিষ্ঠিত হৈছিল।
শক্তিকান্ত দাসৰ কাৰ্যকালত ভাৰতীয় অৰ্থনীতিৰ অৱস্থা ক্ৰমাৎ ডুবিবলৈ আৰম্ভ কৰে । তেওঁৰ কাৰ্যকালতে ভাৰতীয় GDP ৰ হাৰ অভিলেখভাৱে হ্ৰাস পায়। তৎসত্বেও মোদী চৰকাৰে একমাত্ৰ ঘনিষ্ঠতাৰ সূত্ৰেই তেখেতৰ কাৰ্যকাল বৃদ্ধি কৰা বুলি বৰ্তমান চৰ্চিত হৈছে।
