এতিয়াৰে পৰা দেশলৈ বিদেশৰ পৰা আমদানি নহয় লেপটপ, টেবলেট আৰু ব্যক্তিগত কম্পিউটাৰ। আজি এক জাননী যোগে কেন্দ্ৰীয় চৰকাৰে ভাৰতলৈ এই ইলেক্ট্ৰনিক সামগ্ৰীসমূহৰ আমদানিৰ ওপৰত তাৎক্ষণিকভাৱে নিষেধাজ্ঞা আৰোপ কৰিছে।
মূলত: স্থানীয় উৎপাদনত গুৰুত্ব দিয়াৰ উদ্দেশ্যে এই পদক্ষেপ গ্ৰহণ কৰা হৈছে বুলি সদৰী কৰা হৈছে। লক্ষণীয়ভাৱে গত এপ্ৰিল-জুন মাহত লেপটপ, টেবলেট আৰু ব্যক্তিগত কম্পিউটাৰকে ধৰি ইলেক্ট্ৰনিকছৰ আমদানি ১৯.৭ বিলিয়ন ডলাৰ আছিল।
জাননীখনত কোৱা হৈছে যে, “এইচ এছ এন ৮৭৪১ৰ অন্তৰ্গত লেপটপ, টেবলেট, অল-ইন-ৱান ব্যক্তিগত কম্পিউটাৰ, আৰু আল্ট্ৰা সৰু ফৰ্ম ফেক্টৰ কম্পিউটাৰ আৰু চাৰ্ভাৰৰ আমদানি নিষিদ্ধ হ’ব।”
অৱশ্যে বৈধ অনুজ্ঞাপত্ৰৰ জৰিয়তে আমদানিৰ অনুমতি দিয়া হ’ব বুলিও উল্লেখ কৰা হৈছে। আমদানিৰ ক্ষেত্ৰত প্ৰযোজ্য অনুসৰি শুল্ক পৰিশোধ কৰিব লাগিব বুলি চৰকাৰে লগতে কয়।
ভাৰতীয় বজাৰত মূলত: ডেল, এছাৰ, চেমচাং, এল জি, পেনাছনিক, এপল, লেন’ভ’ আৰু এইচ পি হৈছে লেপটপ-কম্পিউটাৰ বিক্ৰী কৰা কিছুমান মূল কোম্পানী। ইয়াৰে যথেষ্ট অংশ চীনৰ দৰে দেশৰ পৰা আমদানি কৰা হয়।
