দেশৰ ভিতৰতে প্ৰথমবাৰৰ বাবে অসমত অনুষ্ঠিত হৈছে এখন স্বচ্ছতামূলক প্ৰতিযোগিতা। ডিব্ৰুগড় জিলাৰ বৃহত্তৰ বৰপথাৰ অঞ্চলৰ ২৫খন গাঁৱৰ এটা গোটে পৰিস্কাৰ-পৰিচ্ছন্নতাৰ ওপৰত গুৰুত্ব প্ৰদান কৰি এই বিশেষ প্ৰতিযোগিতাখনৰ আয়োজন কৰিছে।
সৰ্বসাধাৰণ ৰাইজৰ মাজত স্বচ্ছতা সম্পৰ্কে সজাগতা অনাৰ উদ্দেশ্যে দেশৰ ভিতৰতে প্ৰথমবাৰৰ বাবে এনেধৰণৰ এটা ধুনীয়া অনুষ্ঠানৰ আয়োজন কৰা দেখা গৈছে। আজিৰ পৰা আৰম্ভ হোৱা এই প্ৰতিযোগিতাখনৰ মূল লক্ষ্য হ’ল গাঁওবাসীৰ মাজত স্বচ্ছতা সম্পৰ্কত সজাগ কৰা।
এই বিশেষ ধৰণৰ প্ৰতিযোগিতাখনত বৃহত্তৰ বৰপথাৰ অঞ্চলৰ ২৫খন গাঁৱৰ গাঁওবাসীয়ে অংশ গ্ৰহণ কৰিব। প্ৰতিযোগিতাখনৰ প্ৰথম বিজেতাক ৫ হাজাৰ টকা, দ্বিতীয় বিজয়ীক ৩ হাজাৰ আৰু তৃতীয় স্থানপ্ৰাপ্তক ২ হাজাৰ টকা পুৰস্কাৰ হিচাপে প্ৰদান কৰিব।
স্বচ্ছ ভাৰত মিশ্যন অভিযান, অসমৰ ব্ৰেণ্ড এম্বেছাডৰ শশী কান্ত শইকীয়া, ডিব্ৰুগড় বিশ্ববিদ্যালয়ৰ পঞ্জীয়ক ড০ এইচ চি মহন্ত আৰু ডিব্ৰুগড় স্বচ্ছ ভাৰত মিশ্যন অভিযানৰ আহ্বায়ক দিলীপ কুমাৰ সিঙৰ উপস্থিতিত এই প্ৰতিযোগিতাখনৰ শুভাৰম্ভ কৰা হয়।
