আৰ্থিক মন্দা! মুখ্য মন্ত্ৰী, ভিআইপিৰ ভ্ৰমণৰ বাবে চৰকাৰে কিনিলে ১৯১ কোটি টকীয়া বিমান

পাঁচ বছৰ পূৰ্বেই আৰম্ভ কৰা ক্ৰয়ৰ প্ৰক্ৰিয়া বহু বিলম্বৰ পাছত আনুষ্ঠানিকভাৱে সম্পূৰ্ণ হৈ উঠিল।

গুজৰাটৰ বিজেপি চৰকাৰে অৱশেষত ইয়াৰ মুখ্য মন্ত্ৰী বিজয় ৰূপানি আৰু ৰাজ্যপাল তথা উপ মুখ্য মন্ত্ৰীৰ দৰে আন মৰ্যাদাৰ ব্যক্তিৰ ব্যৱহাৰ বাবে ক্ৰয় কৰিলে ১৯১ কোটি টকীয়া বিমান।

বিষয়াসকলে জানিবলৈ দিয়া মতে আগন্তুক দুসপ্তাহৰ ভিতৰতে দুটা ইঞ্জিনযুক্ত “Bombardier Challenger 650’ বিমান আহি পাব।

নতুন এই বিমানখনত ১২ গৰাকী যাত্ৰীয়ে যাত্ৰা কৰিব পাৰিব আৰু প্ৰায় ৭,০০০ কিলোমিটাৰ উৰিব।

বিগত ২০ বছৰ ধৰি মুখ্য মন্ত্ৰী তথা আন সম মৰ্যাদাৰ ভিআইপি সকলৰ বাবে ব্যৱহাৰ হোৱা ‘Beechcraft Super King’তকৈ ই বহু উন্নত হ’ব।

এই বিমান ঘন্টাত প্ৰায় ৮৭০ কিলোমিটাৰ বেগত উৰিব পাৰে।

প্ৰায় ১৯১ কোটি টকা ব্যয় সাপেক্ষ “Bombardier Challenger 650’ বিমানখন চলিত মাহৰ তৃতীয় সপ্তাহত গুজৰাট চৰকাৰৰ ওচৰলৈ আহি পাব। বিমানখন ক্ৰয়ৰ বাবে সকলো আনুষ্ঠানিকতা ইতিমধ্যে সম্পূৰ্ণ কৰা হৈছে।

গুজৰাটৰ অসমাৰিক পৰিবহনৰ সঞ্চালক অজয় চৌহানে জানিবলৈ দিয়া মতে নতুন বিমানখনে বৰ্তমানৰ বিমানখনতকৈ অধিক দূৰত্ব অতিক্ৰম কৰিব পাৰিব আৰু ভিআইপিসকল ওচৰৰ দেশ চীন পৰ্যন্ত যাব পাৰিব।

তেওঁ জানিবলৈ দিয়ে যে  “Bombardier Challenger 650’ বিমানত ইন্ধন ভৰোৱাৰ ঝামেলা পূৰ্বৰখনৰ দৰে নাই। এনে সীমাবদ্ধতাৰ বাবে পূৰ্বৰ ‘Beechcraft Super King’য়ে আহেমদাবাদৰ পৰা গুৱাহাটী পাবলৈ পাঁচ ঘন্টা সময় লৈছিল।

সি যি কি নহওক, অৰ্থনৈতিক মন্দাৱস্থাৰ মাজত ককবকাই থকা দেশখনৰ ভিআইপিৰ ভ্ৰমণৰ বাবে এনে ব্যয় বহুল বিমান ক্ৰয়ৰ দৰে কাৰ্যই দেশৰ জনসাধাৰণৰ প্ৰতি চৰকাৰৰ দায়বদ্ধতাৰ দিশটোকে উন্মোচিত কৰে।