যাৱজ্জীৱন কাৰাদণ্ড ভুগি থকা স্বঘোষিত গডমেন আছাৰাম বাপুক গুজৰাট উচ্চ ন্যায়ালয়ে অন্তৱৰ্তীকালীন জামিন মঞ্জুৰ কৰিছে। তেওঁৰ শাৰীৰিক অৱস্থা বিবেচনা কৰি ২০১৩ চনৰ এক ধৰ্ষণৰ গোচৰত এই জামিন মঞ্জুৰ কৰা হৈছে। ইয়াৰ পূৰ্বে ৰাজস্থান উচ্চ ন্যায়ালয়েও তেওঁৰ শাৰীৰিক অৱস্থা বিবেচনা কৰি জামিন মঞ্জুৰ কৰিছিল।
ন্যায়াধীশ ইলেশ জে ভোৰা আৰু আৰ টি ভাছানীৰ বিচাৰপীঠে বৃহস্পতিবাৰে কয় যে চিকিৎসাৰ দিশটো বিবেচনা কৰি এই সিদ্ধান্ত লোৱা হৈছে। কিন্তু তেওঁৰ যাৱজ্জীৱন কাৰাদণ্ড বাহাল আছে আৰু সেয়া বলবৎ থাকিব।
আছাৰাম বাপুৰ অধিবক্তা দেৱদত্ত কামাতে কয় যে তেওঁৰ ক্লায়েণ্ট হৃদৰোগ, উচ্চ ৰক্তচাপ, হাইপোথাইৰয়ডিজম, ৰক্তহীনতা আৰু গেষ্ট্ৰাইটিছ ৰোগত আক্ৰান্ত। এইবোৰৰ প্ৰয়োজনীয় চিকিৎসা কাৰাগাৰত উপলব্ধ নহয়। ছেপ্টেম্বৰ মাহত তেওঁক চিকিৎসাৰ বাবে দিল্লীলৈ লৈ যোৱা হৈছিল।
২০১৩ চনত আছাৰামে যোধপুৰৰ নিজৰ আশ্ৰমত ১৬ বছৰীয়া নাবালিকাক ধৰ্ষণ কৰাৰ অভিযোগ উত্থাপন হৈছিল। ইয়াৰ পিছত ২০১৩ চনৰ আগষ্ট মাহত তেওঁক ইন্দোৰৰ পৰা গ্ৰেপ্তাৰ কৰা হয়। সেই গোচৰত যোধপুৰৰ আদালতে ২০১৮ চনৰ এপ্ৰিল মাহত ধৰ্মগুৰুজনক দোষী সাব্যস্ত কৰে।
উক্ত গোচৰত স্বঘোষিত ধৰ্মগুৰুজনক যাৱজ্জীৱন কাৰাদণ্ডৰ শাস্তি প্ৰদান কৰা হয়। এই গোচৰত আছাৰামৰ পৰিয়ালৰ সদস্যৰ লগতে একাংশ শিষ্যও অভিযুক্ত হৈছিল। তেওঁলোক হ’ল আছাৰামৰ পত্নী লক্ষ্মী, পুত্ৰ নাৰায়ণ ছাই, কন্যা ভাৰতীৰ লগতে চাৰিগৰাকী শিষ্যা ধ্ৰুৱবেন, নিৰ্মলা, জাছি আৰু মীৰা। তেওঁৰ বিৰুদ্ধে ভাৰতীয় দণ্ডবিধিৰ ৩৪২, ৩৫৪এ, ৩৭০ (৪), ৩৭৬, ৫০৬ আৰু ১২০ বি ধাৰাত গোচৰ ৰুজু কৰা হৈছিল।
ইয়াৰ প্ৰতিবাদ কৰি চৰকাৰী অধিবক্তাগৰাকীয়ে কয় যে যদি আছাৰামৰ চিকিৎসা বিবেচনাৰ বিষয় হয়, তেন্তে তেওঁক যোধপুৰ কাৰাগাৰৰ পৰা সাবৰমতী কাৰাগাৰলৈ পঠিয়াব লাগে। এই সুবিধা তাত উপলব্ধ। লগতে কোৱা হয় যে আছাৰামৰ শাৰীৰিক অৱস্থা একেবাৰে গুৰুতৰ নহয়। তাৰ পিছতে উচ্চ ন্যায়ালয়ে ঘোষণা কৰে যে আছাৰামক ৬ মাহৰ জামিন মঞ্জুৰ কৰা হৈছে।
