গোচৰৰ শুনানি চলি আছিল। সেই সময়ত এজন অধিবক্তাই বিয়েৰৰ মগত চুমুক দিছে। কেৱল সেয়াই নহয়। বিয়েৰৰ মগটোত চুমুক দি থাকোঁতে তেওঁ ফোনতো কথা পাতে। বিষয়টো আদালতে ভাল দৃষ্টিৰে চোৱা নাই।
অধিবক্তাগৰাকীৰ এই আচৰণত ন্যায়াধীশগৰাকীও স্তম্ভিত হৈ পৰে। অধিবক্তাগৰাকীৰ বিৰুদ্ধে আদালত অৱমাননাৰ গোচৰ ৰুজু কৰা হৈছে। এই ঘটনা গুজৰাট উচ্চ ন্যায়ালয়ৰ।
এই ঘটনা কিছুদিন আগতে সংঘটিত হৈছিল। কিন্তু মঙলবাৰে গুজৰাট উচ্চ ন্যায়ালয়ে নিজাববীয়াকৈ অধিবক্তাগৰাকীৰ বিৰুদ্ধে আদালত অৱমাননাৰ গোচৰ ৰুজু কৰে।
বাতৰি অনুসৰি এই ‘অৱজ্ঞাসূচক আৰু স্পষ্ট আচৰণ’ৰ বাবে ভাস্কৰ তান্না নামৰ জ্যেষ্ঠ অধিবক্তাগৰাকীৰ বিৰুদ্ধে আদালত অৱমাননাৰ গোচৰ ৰুজু কৰা হৈছে।
প্ৰতিবেদন অনুসৰি যোৱা ২৫ জুনত গুজৰাট উচ্চ ন্যায়ালয়ত এটা গোচৰৰ ভাৰ্চুৱেল শুনানি চলি আছিল। সেই সময়ত অধিবক্তাগৰাকীয়ে বিয়েৰৰ মগত চুমুক দি আন এজনৰ লগত মোবাইল ফোনত কথা পাতি আছিল। সেই মুহূৰ্তটোও কেমেৰাত ধৰা পৰে। এতিয়া সেই সময়ৰ ছবি আৰু ভিডিঅ’বোৰ ছ’চিয়েল মিডিয়াত ভাইৰেল হৈ পৰিছে। ইয়াৰ পিছতে গুজৰাট উচ্চ ন্যায়ালয়ে অধিবক্তাগৰাকীৰ বিৰুদ্ধে এই ব্যৱস্থা গ্ৰহণ কৰে।
ইয়াৰ সমান্তৰালকৈ ন্যায়াধীশ এ এছ ছুপেহিয়া আৰু ন্যায়াধীশ আৰ টি ভাছানীৰ বিভাগীয় বিচাৰপীঠে ভাস্কৰ তান্নাৰ আচৰণৰ বাবে জ্যেষ্ঠ অধিবক্তাৰ মৰ্যাদা বাতিল কৰিব লাগে বুলি কয়। অৱশ্যে গোচৰৰ শুনানি গ্ৰহণৰ পিছত অধিক ব্যৱস্থা গ্ৰহণৰ সিদ্ধান্ত লোৱা হৈছে।
গুজৰাট উচ্চ ন্যায়ালয়ৰ ন্যায়াধীশ সন্দীপ ভাটৰ বিচাৰপীঠৰ সন্মুখত সংঘটিত হৈছে বিয়েৰত চুমুক দিয়াৰ এই ঘটনা। পিছত এই ঘটনাৰ এটা ভিডিঅ’ ক্লিপ ব্যাপকভাৱে প্ৰচাৰিত হয়।
এই ঘটনাক তীব্ৰ গৰিহণা দি ন্যায়াধীশ এ এছ ছুপেহিয়া আৰু ন্যায়াধীশ আৰ টি ভাছানীৰ বিভাগীয় বিচাৰপীঠে কয় যে এনে আচৰণক আওকাণ কৰিলে ন্যায়পালিকা আৰু আইনৰ শাসনৰ ওপৰত ইয়াৰ ‘ব্যাপক আৰু গুৰুতৰ প্ৰভাৱ’ পৰিব। ইয়াৰ ফলত আইনৰ শাসন ধ্বংস হ’ব বুলিও আদালতে কয়। একে সময়তে তেওঁৰ বিৰুদ্ধে আদালত অৱমাননাৰ গোচৰ ৰুজু কৰাৰ নিৰ্দেশ দিয়া হৈছে।
আদালতে অধিবক্তাগৰাকীলৈ জাননীও প্ৰেৰণ কৰিছে। অহা দুসপ্তাহৰ ভিতৰত এই গোচৰৰ শুনানি গ্ৰহণ কৰা হ’ব। গোচৰটো নিষ্পত্তি নোহোৱালৈকে কোনো ভাৰ্চুৱেল শুনানিত অংশগ্ৰহণ কৰিব নোৱাৰিব অধিবক্তাগৰাকীয়ে।
