নিৰ্বাচন আয়োগ ভাৰতীয় গণতন্ত্ৰৰ ৰক্ষক নে ভোট চুৰিৰ অংশীদাৰ? নিৰ্বাচন আয়োগৰ নিৰপেক্ষতাক লৈ পুনৰবাৰ বিস্ফোৰক অভিযোগ উত্থাপন কৰিছে কংগ্ৰেছ নেতা ৰাহুল গান্ধীয়ে। গুজৰাটৰ ভোটাৰ তালিকা সংশোধনৰ নামত চলি থকা ‘এছ আই আৰ ‘ প্ৰক্ৰিয়াক এক সু-পৰিকল্পিত ‘ভোট চুৰিৰ কৌশল’ আখ্যা দি গান্ধীয়ে অভিযোগ কৰিছে যে এতিয়া জনসাধাৰণে নহয়, বৰঞ্চ বিজেপিয়েহে নিৰ্বাচনৰ ফলাফল স্থিৰ কৰিব বিচাৰিছে। বিশেষকৈ নিৰ্দিষ্ট সম্প্ৰদায়ৰ ভোটাৰৰ নাম কৰ্তন আৰু ভুৱা আপত্তি দাখিলৰ জৰিয়তে বিজেপিৰ বিৰুদ্ধে এক বৃহৎ জালিয়াতিৰ ‘ব্লু-প্ৰিণ্ট’ ৰচনা কৰাৰ অভিযোগ উঠিছে।
লোকসভাৰ বিৰোধী দলপতিগৰাকীয়ে লগতে দাবী কৰে যে এই “ভোট চুৰিৰ ষড়যন্ত্ৰ”ত ভাৰতীয় নিৰ্বাচন আয়োগ এক মুখ্য অংশীদাৰত পৰিণত হৈছে। এক্সৰ (X) এটা পোষ্টত গান্ধীয়ে কয় যে ভোটাৰ তালিকাৰ সংশোধন প্ৰক্ৰিয়াটোক “এজন ব্যক্তি, এটা ভোট”ৰ সাংবিধানিক অধিকাৰ খৰ্ব কৰাৰ অস্ত্ৰ হিচাপে ব্যৱহাৰ কৰা হৈছে। তেওঁৰ মতে, ইয়াৰ জৰিয়তে জনসাধাৰণে নহয়, বৰঞ্চ বিজেপিয়েহে সিদ্ধান্ত ল’ব যে কোনে শাসনৰ গাদী দখল কৰিব।
ৰাহুল গান্ধীয়ে অভিযোগ কৰে যে য’তেই ‘এছ আই আৰ’ প্ৰক্ৰিয়া চলিছে, তাতেই ভোট চুৰি হৈছে। তেওঁৰ ভাষাত, “গুজৰাটত যি চলিছে সেয়া কোনো প্ৰশাসনিক প্ৰক্ৰিয়া নহয়, এয়া এক বৃহৎ কৌশল। আটাইতকৈ ভয়ানক কথাটো হ’ল যে একেটা নামতে হাজাৰ হাজাৰ আপত্তি দাখিল কৰা হৈছে।”
তেওঁ লগতে অভিযোগ কৰে যে কংগ্ৰেছক সমৰ্থন কৰা নিৰ্দিষ্ট সম্প্ৰদায় আৰু নিৰ্বাচনী কেন্দ্ৰসমূহৰ পৰা বাচনি কৰি কৰি ভোটাৰৰ নাম কৰ্তন কৰা হৈছে। যিবোৰ সমষ্টিত বিজেপিৰ পৰাজয়ৰ সম্ভাৱনা আছে, সেইবোৰ স্থানৰ পৰা ভোটাৰৰ নাম নোহোৱা কৰি দিয়া হৈছে। আলান্দ (Aland) আৰু ৰাজুৰাত (Rajura) দেখা পোৱা এই একেই আৰ্হি এতিয়া গুজৰাট আৰু ৰাজস্থানতো প্ৰয়োগ কৰা হৈছে বুলি তেওঁ উল্লেখ কৰে।
গান্ধীয়ে নিৰ্বাচন আয়োগক তীব্ৰ সমালোচনা কৰি কয়, “আটাইতকৈ গুৰুতৰ কথটো হ’ল যে নিৰ্বাচন আয়োগ এতিয়া আৰু গণতন্ত্ৰৰ ৰক্ষক হৈ থকা নাই। আয়োগ এতিয়া ভোট চুৰিৰ এই ষড়যন্ত্ৰৰ এজন প্ৰধান অংশীদাৰ হৈ পৰিছে।”
ইফালে, গুজৰাট প্ৰদেশ কংগ্ৰেছেও সামাজিক মাধ্যমৰ জৰিয়তে অভিযোগ কৰিছে যে নিৰ্বাচনত ৰিগিঙৰ এক নতুন আৰ্হি আৰম্ভ হৈছে। দলটোৰ মতে, ‘এছ আই আৰ’ৰ আপত্তি দাখিলৰ অন্তিম দিন আছিল ১৮ জানুৱাৰী। ১৫ জানুৱাৰীলৈকে মাত্ৰ কেইটামান আপত্তিহে লাভ কৰা হৈছিল, কিন্তু তাৰ পাছতে হঠাতে লাখ লাখ আপত্তি (ফৰ্ম-৭) দাখিল কৰা হয়।
কংগ্ৰেছৰ দাবী অনুসৰি, নিৰ্বাচন আয়োগে প্ৰকাশ কৰা ১২ লাখ আপত্তিৰ তথ্যৰ পৰা স্পষ্ট হৈছে যে নিৰ্দিষ্ট জাতি আৰু অঞ্চলক লক্ষ্য কৰি এই কাম কৰা হৈছে। এজন ব্যক্তিৰ নামতে বিভিন্ন স্বাক্ষৰ ব্যৱহাৰ কৰি ডজন হিচাপত আপত্তি দাখিল কৰা হৈছে যদিও আয়োগে নিৰৱ দৰ্শকৰ ভূমিকা পালন কৰিছে। বিৰোধী দলে এই সন্দৰ্ভত তথ্য বিচাৰি পত্ৰ প্ৰেৰণ কৰিছে যদিও আয়োগৰ পৰা কোনো সঁহাৰি পোৱা নাই বুলিও অভিযোগ উত্থাপন হৈছে।
