এপিনে সুদৰ্শনৰ আক্ৰমণাত্মক বেটিং, আনফালে ছিৰাজ, প্ৰসিদ্ধ কৃষ্ণৰ দমনীয় বলিং। ঘৰুৱা খেলপথাৰতে মুম্বাইক অনায়াসে পৰাস্ত কৰে গুজৰাট টাইটানছে। শনিবাৰে নৰেন্দ্ৰ মোডী ষ্টেডিয়ামত হাৰ্দিক পাণ্ডিয়াৰ মুম্বাইক পৰাস্ত কৰি গুজৰাটে লীগ টেবুলৰ তৃতীয় স্থানলৈ আৰোহণ কৰে। আনহাতে, একেৰাহে দুখন মেচত পৰাস্ত হৈ মুম্বাই দহৰ ভিতৰত নৱম স্থানলৈ অৱনমিত হয়।
টছত জয়লাভ কৰি মুম্বাইৰ অধিনায়ক হাৰ্দিক পাণ্ডিয়াই প্ৰথমে বলিং কৰাৰ সিদ্ধান্ত লয়। গুজৰাটৰ শুভমান গিল আৰু সাই সুদৰ্শনে বেটিং মুকলি কৰে। দুয়োজন অ’পেনাৰেই ভাল আৰম্ভণি কৰিছিল। অৱশ্যে নৱম অভাৰত হাৰ্দিক পাণ্ডিয়াৰ বলত নমন ধীৰৰ হাতত ধৰা পৰি গিল পেভিলিয়নলৈ উভতি আহে। তেওঁ ২৭টা বলত ৩৮ ৰানৰ ইনিংছ খেলিছিল।
তাৰ পাছত জোছ বাটলাৰে সুদৰ্শনৰ সংগ দিবলৈ ক্ৰীজত নামে। তেওঁ ২৪টা বলত ৫টা চাৰি আৰু এটা ছয়ৰে ৩৯ ৰান সংগ্ৰহ কৰে। ১৪ নং অভাৰত তেওঁ মুজিব উৰ ৰহমানৰ বলত কেচ আউট হয়। তাৰ পাছত সুদৰ্শনে প্ৰায় এককভাৱে মুম্বাইৰ দলটোক আগুৱাই লৈ গ’ল। তেওঁ ৪১টা বলত ৬৩ ৰানৰ এটা সাৱলীল ইনিংছ খেলিছিল।
যেতিয়া সুদৰ্শন ট্ৰেণ্টৰ অব্যৰ্থ ইয়ৰ্কাৰত এল বি ডব্লিউ আউট হৈছিল, তেতিয়া স্ক’ৰব’ৰ্ডত আছিল ১৭.৬ অভাৰত ৪ উইকেটৰ বিনিময়ত ১৭৯ ৰান। সাই সুদৰ্শন আউট হোৱাৰ পিছত বাকী কোনোৱেই তেনেকৈ আক্ৰমণ আগবঢ়াব নোৱাৰিলে। ইয়াৰ পিছৰ দুটা অভাৰত ৪টা উইকেট হেৰুৱাই মাত্ৰ ১৭ ৰানহে আহিল। শেষত নিৰ্ধাৰিত ২০ অভাৰত ৮টা উইকেট হেৰুৱাই গুজৰাটৰ স্ক’ৰ ১৯৬ ৰান হয়।
বেটিং কৰিবলৈ নামি মুম্বাইয়ে আৰম্ভণিতে এক বিপৰ্যয়ৰ সন্মুখীন হয়। ১৯৭ ৰানৰ লক্ষ্য আগত লৈ বেটিং কৰিবলৈ আহি প্ৰথম অভাৰতে ৰোহিত শৰ্মাক ছিৰাজে ব’ল্ড আউট কৰে। চতুৰ্থ অভাৰত ছিৰাজে ৰায়ান ৰিকেলটনক আউট কৰে। এই জটিল পৰিস্থিতিত মুম্বাইৰ দায়িত্ব লয় তিলক ভাৰ্মা আৰু সূৰ্যকুমাৰ যাদৱে। প্ৰায় ৮ অভাৰ যুঁজি দিলেও স্ক’ৰব’ৰ্ডে ১০০ৰ সীমা অতিক্ৰম কৰাৰ পূৰ্বেই তিলক আউট হয়। সূৰ্য্যই অৱশ্যে ২৮টা বলত ৪৮ ৰানৰ আক্ৰমণাত্মক ইনিংছ খেলিছিল যদিও কোনো কামত নাহিল।
দলৰ ১৬ নং অভাৰত স্ক’ৰব’ৰ্ডত ৫ উইকেটত ১২০ ৰান হয়। তেওঁলোকে জয়ী হ’বলৈ মাত্ৰ ৪ অভাৰত ৭৬ ৰানৰ প্ৰয়োজন হৈছিল। বাকীসকলে প্ৰসিদ্ধ কৃষ্ণ, ছিৰাজ, আৰু সাই কিশোৰৰ শক্তিশালী বলিঙৰ আগত তিষ্ঠিব নোৱাৰিলে। মুম্বাই ইণ্ডিয়ানছে ২০ অভাৰত ৬টা উইকেট হেৰুৱাই মাত্ৰ ১৬০ ৰানহে সংগ্ৰহ কৰে। অৰ্থাৎ গুজৰাটে মেচখনত ৩৬ ৰানত জয়লাভ কৰে।
সংক্ষিপ্ত স্কোৰঃ
গুজৰাট টাইটানছ : ১৯৬/৮ (সাই সুদৰ্শন ৬৩, গিল ৩৮, বাটলাৰ ৩৯, ছিৰাজ ৩/৩৬, কৃষ্ণ ২/১৮)
মুম্বাই ইণ্ডিয়ানছ : ১৬০/৬ (তিলক ৩৯, সূৰ্য্যকুমাৰ ৪৮, হাৰ্দিক পাণ্ডিয়া ২/২৯)
গুজৰাট টাইটানছ ৩৬ ৰানত জয়ী হয়।
