আই পি এল ২০২৬ৰ ফাইনেলত পৰাস্ত হোৱাৰ হতাশা তেতিয়াও আঁতৰা নাছিল। ট্ৰফী হেৰুৱাৰ আঘাতৰ সৈতে মোকাবিলা কৰাত ব্যস্ত হৈ পৰিছিল গুজৰাট টাইটানছৰ ক্ৰিকেটাৰসকল। ইয়াৰ মাজতে এটা দুৰ্ঘটনা সংঘটিত হয়। হোটেললৈ উভতি অহাৰ পথত হঠাৎ টিম বাছখনত জুই লাগিল। আতংক নিমিষতে বিয়পি পৰিল। অৱশ্যে ভাল খবৰটো হ’ল কোনো ক্ৰিকেটাৰ বা দলৰ সদস্য আহত হোৱা নাই। সকলোৱে নিৰাপদে বাছৰ পৰা নামিবলৈ সক্ষম হ’ল।
দেওবাৰে নিশা আহমেদাবাদৰ নৰেন্দ্ৰ মোডী ষ্টেডিয়ামত অনুষ্ঠিত হোৱা আই পি এল ২০২৬ৰ ফাইনেলৰ পিছত গুজৰাট টাইটানছৰ খেলুৱৈসকল টীম বাছত উঠি হোটেললৈ উভতি আহিছিল। সেই সময়ত বাছখনত শ্বৰ্ট চাৰ্কিটৰ বাবে হঠাতে জুই লাগে বুলি প্ৰাৰম্ভিক তদন্তত প্ৰকাশ পাইছে। জুই দেখি ক্ষীপ্ৰতাৰে বাছখন ৰখাই ক্ৰিকেটাৰসকলক নিৰাপদে উলিয়াই নিবলৈ সক্ষম হয়।
এই ঘটনাৰ বাবে প্ৰায় এঘণ্টা ধৰি পথত আবদ্ধ হৈ থাকিবলগীয়া হৈছিল শুভমন গিলৰ দলটো। পিছত বিকল্প ব্যৱস্থাৰ জৰিয়তে তেওঁলোকক হোটেললৈ লৈ যোৱা হয়। কোনো ডাঙৰ দুৰ্ঘটনা সংঘটিত নোহোৱাত দলৰ সদস্যসকলে স্বস্তিৰ নিশ্বাহ লৈছে।
যোৱা কেইদিনমানৰ পৰা গুজৰাট টাইটানছ দীঘলীয়া যাত্ৰা আৰু ব্যস্ততাৰ মাজেৰে পাৰ হ’বলগীয়া হৈছিল। ২৭ মে’ত ধৰ্মশালাৰ পৰা মুলনপুৰত উপস্থিত হোৱা দলটোৱে ২৯ মে’ত তাত ৰাজস্থান ৰয়েলছৰ বিৰুদ্ধে কোৱালিফায়াৰ-২ মেচ খেলিছিল।ইয়াৰ পিছত ৩০ মে’ত আহমেদাবাদলৈ উভতি যোৱাৰ কথা আছিল যদিও বেয়া বতৰৰ বাবে নিৰ্ধাৰিত সময়ত উপনীত হ’ব পৰা নাছিল। অৱশেষত শনিবাৰে সন্ধিয়া দলটোৱে নিজৰ ঘাটিত উপস্থিত হয়।
ফাইনেলত গুজৰাটৰ প্ৰদৰ্শনেও আশা পূৰণ কৰিব নোৱাৰিলে। ৰয়েল চেলেঞ্জাৰ্ছ বাংগালুৰুৰ বিৰুদ্ধে নিৰ্ধাৰিত ২০ অভাৰত দলটোৱে মাত্ৰ ১৫৫/৮ ৰানহে সংগ্ৰহ কৰে। পিছত আৰ চি বিয়ে ৫ উইকেটত জয়লাভ কৰে।
খেলখনৰ অন্তত গুজৰাট টাইটানছৰ ক্ৰিকেট সঞ্চালক বিক্ৰম সোলংকীয়ে অৱশ্যে ক্লান্তিক অজুহাত হিচাপে ব্যৱহাৰ কৰিব বিচৰা নাছিল। তেওঁ কয় যে আমি বহু মেচ খেলিলোঁ, বহুত ভ্ৰমণ কৰিলোঁ, কিন্তু কেৱল ভাগৰুৱা হোৱাৰ বাবেই আৰ চি বিৰ কৃতিত্বক ক্ষুদ্ৰ কৰি তুলিব নিবিচাৰো।আমাৰ স্ক’ৰ আশা কৰাতকৈ কম আছিল। কিন্তু ল’ৰাকেইটাই শেষলৈকে যুঁজিছিল।
তেওঁ লগতে কয়, “মেচৰ শেষলৈ ঘূৰি চালে এনে লাগিব পাৰে যে বহু কাম বেলেগ ধৰণে কৰিব পৰা গ’লহেঁতেন। কিন্তু আপুনি এইটোও মানি ল’ব লাগিব যে প্ৰতিপক্ষই কেতিয়াবা ভাল ক্ৰিকেট খেলিব পাৰে।”
এফালে ফাইনেলত পৰাজয়, আনফালে উভতি অহাৰ পথত বাছত জুই – মুঠতে দেওবাৰৰ নিশা গুজৰাট টাইটানছৰ বাবে নিঃসন্দেহে দুঃস্বপ্নৰ নিশা হৈ থাকিব।
