বিপক্ষৰ খেলপথাৰৰ পিছত ঘৰুৱা খেলপথাৰতো ছানৰাইজাৰ্ছ হায়দৰাবাদৰ বেয়া সময় অব্যাহত আছে। ঘৰুৱা খেলপথাৰতে গুজৰাট টাইটানছৰ হাতত পৰাস্ত হ’ল। ছানৰাইজাৰ্ছে প্ৰকততে কোনো যুঁজেই আগবঢ়াব নোৱাৰিলে।
বেটিং আৰু বলিং দুয়োটা বিভাগতে ব্যৰ্থ হয় হায়দৰাবাদ। ফলত অৰেঞ্জ আৰ্মীয়ে চাৰিখন মেচত পৰাস্ত হোৱাৰ পাছত পইণ্ট তালিকাৰ তলত থাকি গ’ল। আনহাতে, গুজৰাটে ছানৰাইজাৰ্ছক ৭ উইকেটত পৰাস্ত কৰি পইণ্ট তালিকাৰ দ্বিতীয় স্থানলৈ উন্নীত হৈছে।
টছত জয়লাভ কৰি শুভমন গিলে এই মেচত বলিং কৰাৰ সিদ্ধান্ত লয়। তেওঁৰ সিদ্ধান্ত আছিল মূলতঃ পিটচ বুজি পোৱাৰ বাবে। হায়দৰাবাদৰ পিটচত প্ৰচুৰ ৰান হোৱাৰ নিশ্চয়তা আছিল। সেয়ে এই সিদ্ধান্ত আগতীয়াকৈ পৰিকল্পনা কৰি লোৱা হৈছিল। পৰিকল্পনাই কাম কৰিলে আৰু সেইটো ছিৰাজৰ চাৰি উইকেটৰ সৌজন্যত।
প্ৰথমে বেটিং কৰি ছানৰাইজাৰ্ছে ৮ উইকেট হেৰুৱাই ১৫২ ৰানহে সংগ্ৰহ কৰে। অভিষেক শৰ্মা, ট্ৰেভিছ হেড, ঈশান কিষাণ ব্যৰ্থ হয়। নীতিশ কুমাৰ ৰেড্ডীয়ে ৩১ ৰান আৰু হেনৰিক ক্লাচেনে ২৭ ৰান সংগ্ৰহ কৰে। তেওঁলোকৰ ৰান অবিহনে হয়তো এই ৰানখিনিও নহ’লহেঁতেন। অধিনায়ক পেট কামিন্সে ২২ ৰান সংগ্ৰহ কৰে যদিও সেয়া যথেষ্ট নহ’ল।
বলিঙেৰে ছিৰাজে চাৰিটা উইকেট দখল কৰাৰ বিপৰীতে প্ৰসিদ্ধ আৰু সাই কিশোৰে দুটাকৈ উইকেট দখল কৰে।
গুজৰাটেও লক্ষ্য অনুসৰণ কৰাৰ সময়ত ভাল আৰম্ভণি কৰা নাছিল। সাই সুদৰ্শনে মাত্ৰ ৫ ৰানহে সংগ্ৰহ কৰে। কিন্তু গিল টিকি থাকিল। বাটলাৰে শূন্য ৰাণতে উভতিলেও কোনো সমস্যা নহ’ল। গুজৰাটে ১৬.৪ অভাৰত ২ উইকেটত ১৫৩ ৰান সংগ্ৰহ কৰি জয়লাভ কৰে।
গিলে ৪৩টা বলত ৬১ ৰান সংগ্ৰহ কৰি অপৰাজিত হৈ থাকে। ৪৯ ৰানত অপৰাজিত হৈ থাকে ৱাশ্বিংটন সুন্দৰ। শেষত শ্বাৰফান ৰাদাৰফোৰ্ডে ৩৫ ৰানৰ ইনিংছ খেলে। ছামীৰ ২টা উইকেট আৰু কামিন্সৰ ১টা উইকেটৰ বাহিৰে আন কোনোৱে ছানৰাইজাৰ্ছৰ হৈ এটাও উইকেট নাপালে।
