বলীউডত নিজৰ নাম উজলাই তুলিছিল জুবিন গাৰ্গে। এজন প্ৰচাৰ-বিমুখ ব্যক্তি। হিন্দী চলচ্চিত্ৰ জগতত জনপ্ৰিয়তা অৰ্জন কৰিলেও তেওঁ নিজৰ অসমৰ শিপা পাহৰা নাছিল। সংগীতৰ স্বাৰ্থতে ছিংগাপুৰলৈ গৈ আৰু জীৱন্তে ঘুৰি নাহিল জুবিন।
জুবিনক হেৰুৱাই শোকত ভাগি পৰিছে সমগ্ৰ অসমবাসী। সংগীতৰ ৰাজপুত্ৰ গৰাকীৰ মৃত্যুৰ খবৰ পোৱাৰ পিছতে কাহিলীপাৰাত তেওঁৰ ঘৰৰ সন্মুখত জনসমুদ্ৰ। তেওঁৰ অনুৰাগীসকল কান্দোনত ভাঙি পৰিল।
জুবিনক হেৰুৱাই পাপন, প্ৰীতম, বাদশাহ, অমল মালিক, বিশাল মিশ্ৰ, বিশাল দাদলানি, জীত গংগোপাধ্যায়কে ধৰি চলচ্চিত্ৰ জগতৰ বহু তাৰকাই সমবেদনা জ্ঞাপন কৰে।
জুবিনৰ মৃত্যু পাপনৰ বাবে এজন ভাতৃক হেৰুৱাৰ দৰে। কণ্ঠশিল্পীগৰাকীয়ে মন্তব্য কৰে- ‘বহুত মৰ্মান্তিক! জুবিন, এটা প্ৰজন্মৰ কণ্ঠ! ইমান সোনকালে তেওঁ গুচি গ’ল। মোৰ ভাষা হেৰাই গৈছে। বন্ধু এজনক হেৰুৱাই বাকৰুদ্ধ হৈ পৰিছো। মোৰ ভাতৃক হেৰুৱালো। এই মহা শূন্যতা পূৰণ নহ’ব। তেওঁৰ আত্মাৰ শান্তি কামনা কৰিছো।’
জুবিন গাৰ্গে প্ৰীতমৰ সংগীত পৰিচলনাত ‘গেংষ্টাৰ’ ছবিৰ ‘য়া আলী’ গীতটো গাই বলীউডত জনপ্ৰিয়তাৰ শিখৰত উপনীত হয়। দুটা দশকৰ পাছতো সেই গীতটোৱে দৰ্শকৰ মনত অনুৰণন ঘটায়। সংগীত জগতৰ সেই ‘ৰত্ন’ হেৰুৱাই স্তম্ভিত হৈ পৰে প্ৰীতম। সংগীত পৰিচালকগৰাকীৰ মন্তব্য, “এটা দুৰ্ঘটনাই জুবিনৰ জীৱন কাঢ়ি লৈ গ’ল, ইয়াতকৈ ভয়ংকৰ আৰু দুৰ্ভাগ্যজনক খবৰ নাই। এতিয়াও মই মানি ল’ব পৰা নাই…. জুবিনৰ পত্নী গৰিমা আৰু তেওঁৰ পৰিয়াললৈ গভীৰ সমবেদনা জ্ঞাপন কৰিলোঁ।”
সংগীত শিল্পী জুবিন নৌতিয়ালে শোক প্ৰকাশ কৰে, ‘জুবিন আপোনাৰ গীতবোৰে চিৰদিনৰ বাবে আমাৰ হৃদয়ত অনুৰণন ঘটাব। এটা প্ৰকৃত প্ৰতিভা বহুত সোনকালে গুচি গ’ল। তেওঁৰ পৰিয়াললৈ সমবেদনা জ্ঞাপন কৰিলোঁ।’
এক্স হেণ্ডেলৰ পোষ্টত ৰেপাৰ বাদশাই লিখিছে, ‘জুবিন গাৰ্গক লগ পোৱা নাই যদিও তেওঁৰ গান শুনিছো। তেওঁৰ কাহিনী শুনিছোঁ। তেওঁৰ মৃত্যুৱে মোক এনেকৈ আঘাত দিব বুলি মই কেতিয়াও ভবা নাছিলো। শান্তিৰে জিৰণি লওক জুবিন দা।’
জুবিন গাৰ্গৰ মৃত্যুত ভাঙি পৰিছে আন এগৰাকী অসম সন্তান আদিল হুছেইন। অভিনেতাগৰাকীয়ে মন্তব্য কৰে যে, “চিংগাপুৰত সংঘটিত দুৰ্ঘটনাত জুবিনৰ হঠাৎ মৃত্যুৰ খবৰ পাই মই মৰ্মাহত হৈছো। আৰু সমানেই স্তম্ভিত হৈছো! অতি দুখৰ কথা। অসমীয়া সংগীত আৰু সংস্কৃতিলৈ তেওঁৰ অৱদান অসাধাৰণ। জুবিন তেওঁৰ গীতৰ জৰিয়তে চিৰদিনৰ বাবে আমাৰ মাজত থাকিব। তেওঁৰ আত্মাৰ শান্তিৰ বাবে ভগৱানৰ ওচৰত প্ৰাৰ্থনা কৰিছো। যেতিয়ালৈকে আমি সিপাৰে লগ নাপাও, জুবিন, তেতিয়ালৈকে সুন্দৰ কণ্ঠৰে ভগৱানক সুখী কৰি ৰাখা।” গায়ক অমল মালিক আৰু বিশাল মিশ্ৰইও শোক প্ৰকাশ কৰিছে।
উল্লেখ্য যে জুবিন গাৰ্গৰ তিনি দশকজোৰা সংগীত জীৱনত ৪০টা ভিন্ন ভাষাত গান গোৱাৰ অভিলেখো আছে। জুবিনে ১২ ধৰণৰ বাদ্যযন্ত্ৰ বজোৱাতো পাৰ্গত আছিল।
