নাই আইনৰ শাসন। হিংসাত্মক পৰিস্থিতিত বিধ্বস্ত আফ্ৰিকান দেশ নাইজেৰিয়াত অপৰাধে চৰম ৰূপ ধাৰণ কৰিছে। এইবাৰ নাইজেৰিয়াত সংঘটিত হ’ল এক ভয়ংকৰ ঘটনা। অস্ত্ৰধাৰী অপৰাধীৰ এটা দলে বলপূৰ্বকভাৱে বিদ্যালয়ত প্ৰৱেশ কৰি ২৫ গৰাকী ছোৱালীক অপহৰণ কৰে। আৰু এই ঘটনাক প্ৰতিহত কৰাৰ সময়ত বিদ্যালয়ৰ উপাধ্যক্ষক গুলীয়াই হত্যা কৰে। উগ্ৰপন্থীৰ বন্দুকৰ গুলীত আৰু কেইবাজনো লোক আহত হয়। ঘটনাটো পোহৰলৈ অহাৰ লগে লগে হুলস্থুলৰ সৃষ্টি হয়।
আৰক্ষীৰ সূত্ৰ অনুসৰি সোমবাৰে পুৱা উত্তৰ-পশ্চিম নাইজেৰিয়াৰ কেবি ষ্টেট অঞ্চলত সংঘটিত হয় এই আক্ৰমণ। ইয়াৰে এখন ছোৱালীৰ বৰ্ডিং স্কুলত অত্যাধুনিক অস্ত্ৰৰে আক্ৰমণ কৰে দুৰ্বৃত্তই। কোনোৱে একো বুজি পোৱাৰ আগতেই নিৰ্বিচাৰে গুলীচালনা কৰিবলৈ ধৰিলে। বিদ্যালয়খনৰ উপাধ্যক্ষৰ থিতাতে মৃত্যু হয়। ইয়াৰ উপৰিও আন কেইবাজনো বিদ্যালয়ৰ কৰ্মচাৰী আহত হয়। এনে পৰিস্থিতিত দুষ্কৃতিকাৰীয়ে বিদ্যালয়ত প্ৰৱেশ কৰি ২৫ গৰাকী ছাত্ৰ-ছাত্ৰীক টানি আনি হাবিলৈ লৈ যায়। তথ্য লাভ কৰাৰ পাছতে সেই স্থানলৈ যায় আৰক্ষী। আহতসকলক উদ্ধাৰ কৰি চিকিৎসালয়ত ভৰ্তি কৰোৱা হৈছে। কোনে এই আক্ৰমণ সংঘটিত কৰিছিল সেয়া এতিয়াও স্পষ্ট হোৱা নাই। কোনো সংগঠনে এই আক্ৰমণৰ দায়িত্ব স্বীকাৰ কৰা নাই। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।
উল্লেখ্য যে নাইজেৰিয়াত এনেধৰণৰ আক্ৰমণ নতুন নহয়। এই বছৰ মধ্য নাইজেৰিয়াত অৱস্থিত বেনুৱেত বন্দুকধাৰীৰ এটা দলে ভয়ংকৰ সাম্প্ৰদায়িক আক্ৰমণ চলাইছিল। শতাধিক গাঁৱৰ লোকক হত্যা কৰাৰ উপৰি কেইবাটাও পৰিয়ালক ঘৰত আবদ্ধ কৰি জুই লগাই দিয়া হয়। এই অঞ্চলৰ উত্তৰ অংশ প্ৰধানকৈ মুছলমান আৰু দক্ষিণ অংশ প্ৰধানকৈ খ্ৰীষ্টান। ফলত তাত মাজে মাজে সাম্প্ৰদায়িক হিংসাৰ সূচনা হয়। নাইজেৰিয়াত সন্ত্ৰাসবাদৰ আন এটা নাম হৈছে উগ্ৰপন্থী সংগঠন বকো হাৰাম। শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে দেশৰ বিভিন্ন প্ৰান্তত খ্ৰীষ্টান ধৰ্মাৱলম্বী লোকৰ ওপৰত আক্ৰমণৰ সন্দৰ্ভত এক কঠোৰ সতৰ্কবাণী জাৰি কৰিছে। তেওঁ কয়, “যদি নাইজেৰিয়া চৰকাৰে খ্ৰীষ্টানসকলক সুৰক্ষা দিব নোৱাৰে তেন্তে আমেৰিকাৰ বন্দুক গৰ্জন কৰিবলৈ সাজু। আমি ইছলামিক সন্ত্ৰাসবাদক শিপাই উলিয়াবলৈ প্ৰতিশ্ৰুতিবদ্ধ।”
