গুৱাহাটী ৰে’ল ষ্টেশ্যনত ৫০ কেজি গাঞ্জা জব্দ ৰে’ল আৰক্ষীৰ
গুৱাহাটী ৰে’ল ষ্টেশ্যনত আজি পুৱা ৭ বজাত ৰে’ল আৰক্ষীয়ে অভিযান চলাই প্ৰায় ৫০ কেজি পৰিমানৰ গাঞ্জা জব্দ কৰে। ১২৪২৩ নম্বৰ নামনিমুৱা ৰাজধানী এক্সপ্ৰেছৰ কোচ নং এ’ৰ আসন নং ১/৩ৰ দুজন যাত্ৰীৰ জিম্মাৰ পৰা গাঞ্জাখিনি জব্দ কৰা হয়।
উক্ত লোক দুজনে ডিমাপুৰৰ পৰা নতুন দিল্লীলৈ গাঞ্জাখিনি নিয়াৰ সময়তে আৰক্ষীয়ে জব্দ কৰে। জিআৰপিএছৰ এটা তালাচী বাহিনীয়ে চলোৱা নিয়মিত তালাচীৰ সময়তে ধৰা পৰে ঘটনাতো।
ৰে’ল আৰক্ষীয়ে এই সন্দৰ্ভত আটক কৰা লোক দুজনক উত্তৰ-পশ্চিম দিল্লীৰ মংগলপুৰীৰ চিত্তৰঞ্জন গুপ্তা (৫৫) আৰু পশ্চিম দিল্লীৰ সৰস্বতী বিহাৰৰ মধু গুপ্তা বুলি চিনাক্ত কৰা হৈছে।
এই সন্দৰ্ভত ৰে’ল আৰক্ষীয়ে এটা গোচৰ ৰুজু কৰি অনুসন্ধান অব্যাহত ৰাখিছে।
উল্লেখযোগ্য যে শেহতীয়াকৈ উত্তৰ-পূৰ্বাঞ্চলৰ পৰা দেশৰ বাকী অংশলৈ ৰে’ল যোগে এনেধৰণৰ নিষিদ্ধ দ্ৰব্য সৰবৰাহৰ কেইবাটাও ঘটনা ৰে’ল আৰক্ষীয়ে ধৰা পেলাবলৈ সক্ষম হৈছে।