মহানগৰীৰ বায়ু প্ৰদূষণ বৰ্তমান এক ভয়ংকৰ স্তৰত উপনীত হৈছে। এই গুৰুতৰ সমস্যাৰ প্ৰতি চৰকাৰ আৰু একাংশ নাগৰিকৰ মাজত চলি থকা উদাসীনতা ভংগ কৰাৰ লক্ষ্যৰে আজি কটন বিশ্ববিদ্যালয়ৰ এলামনাই হলত ‘ধৰিত্ৰী সুৰক্ষা মঞ্চ, অসম’-এ এক বিশেষ সজাগতামূলক বক্তৃতানুষ্ঠানৰ আয়োজন কৰে। অধ্যাপিকা মনোৰমা শৰ্মাৰ সভাপতিত্বত অনুষ্ঠিত এই কাৰ্যসূচীত গুৱাহাটী চিকিৎসা মহাবিদ্যালয়ৰ সহকাৰী অধ্যাপক ডাঃ নিৰ্বাণ বৈশ্যই কয় যে গুৱাহাটীৰ বায়ুৰ মান ৯০ শতাংশ সময়তে উদ্বেগজনক হৈ থাকে। যান-বাহন আৰু নিৰ্মাণ কাৰ্যৰ পৰা নিৰ্গত সূক্ষ্ম ধূলিকণাই (PM) কেৱল হাঁওফাঁওৰ ক্ষতি নকৰে, বৰঞ্চ তেজৰ জৰিয়তে ই মগজু আৰু হৃদযন্ত্ৰলৈকো বিয়পি পৰে বুলি তেওঁ উল্লেখ কৰে। প্ৰতিকাৰ হিচাপে তেওঁ ব্যক্তিগত পৰ্যায়ত N95 মাস্কৰ ব্যৱহাৰ আৰু খাদ্যাভ্যাসত এন্টিঅক্সিডেন্ট তথা অমেগা-৩ অন্তৰ্ভুক্ত কৰাৰ পৰামৰ্শ দিয়ে।
দ্বিতীয়গৰাকী সমল ব্যক্তি, বি. বৰুৱা মহাবিদ্যালয়ৰ সহকাৰী অধ্যাপক ড০ বিজয় শংকৰ গোস্বামীয়ে গুৱাহাটীৰ বায়ুৰ মান কেতিয়াবা দিল্লীতকৈও ভয়াবহ হৈ পৰে বুলি উদ্বেগ প্ৰকাশ কৰে। যোৱা পাঁচ বছৰত যান-বাহনৰ সংখ্যা ৪০ হেজাৰৰ পৰা ১ লাখ ২০ হেজাৰলৈ তিনিগুণ বৃদ্ধি পোৱা, নিৰ্মাণ কাৰ্যৰ ধূলি আৰু হোটেলত ব্যৱহৃত কয়লাৰ ধোঁৱাই পৰিস্থিতি অধিক জটিল কৰিছে। গুৱাহাটীক ইতিমধ্যে ‘নন-এটেইনমেণ্ট চিটি’ হিচাপে ঘোষণা কৰা হৈছে আৰু ২০২৬ চনৰ ভিতৰত ধূলি নিৰ্গমন ৪০ শতাংশ হ্ৰাস কৰাৰ চৰকাৰী লক্ষ্যত উপনীত হ’বলৈ গ্ৰীণ নেটৰ ব্যৱহাৰ তথা ব্যাপক বৃক্ষৰোপণ অপৰিহাৰ্য বুলি তেওঁ মত পোষণ কৰে।
আনগৰাকী সমল ব্যক্তি, কটন বিশ্ববিদ্যালয়ৰ সহযোগী অধ্যাপক ড০ ৰাহুল মহন্তই কয় যে জলবায়ু পৰিৱৰ্তন আৰু বায়ু প্ৰদূষণ একেটা মুদ্ৰাৰ ইপিঠি-সিপিঠি। তেওঁ সতৰ্ক কৰি দিয়ে যে ক’লা কাৰ্বন জমা হোৱাৰ ফলত হিমালয়ৰ বৰফ গলি ব্ৰহ্মপুত্ৰৰ বানপানীয়ে ধ্বংসাত্মক ৰূপ লৈছে। ইয়াৰ লগতে গুৱাহাটীৰ ভৌগোলিক অৱস্থানৰ বাবে ‘টেম্পাৰেচাৰ ইনভাৰ্চন’ৰ (Temperature Inversion) ফলত প্ৰদূষকসমূহ ওলাই যাব নোৱাৰি চহৰখন প্ৰদূষণৰ ফান্দলৈ পৰ্যবসিত হৈছে।
“আমি উন্নয়ন আৰু পৰিৱেশৰ মাজত এটা ভুৱা পছন্দ (False Choice) কৰিব নালাগে; বৰঞ্চ পৰিৱেশক অগ্ৰাধিকাৰ দিহে উন্নয়নৰ পৰিকল্পনা কৰিব লাগে,” বুলি তেওঁ আহ্বান জনায়। বক্তৃতাৰ অন্তত অনুষ্ঠিত প্ৰশ্ন-উত্তৰ শিতানৰ পিছত অধিবক্তা কিশোৰ কলিতাই শলাগৰ শৰাই আগবঢ়ায় আৰু ধৰিত্ৰী সুৰক্ষা মঞ্চৰ মুখ্য আহ্বায়ক মহেশ ডেকাকে ধৰি অন্যান্য বিষয়ববীয়াসকলে ভৱিষ্যতেও প্ৰকৃতি সুৰক্ষাৰ এই সংগ্ৰাম চলাই যোৱাৰ প্ৰতিশ্ৰুতি প্ৰদান কৰে।
