গুৱাহাটী আৰ্টিষ্টছ গীল্ডৰ সোণালী জয়ন্তী বৰ্ষ উদযাপনৰ লগত সংগতি ৰাখি আজি অৰ্থাৎ ২৩ মাৰ্চ তাৰিখে গীল্ডৰ বীথিকাত “লেণ্ডস্কেপিং ছাবজেক্টিভিটী” (Landscaping Subjectivity) শীৰ্ষক এক বিশেষ শিল্প প্ৰদৰ্শনী সাধাৰণ দৰ্শকৰ বাবে আনুষ্ঠানিকভাৱে মুকলি কৰা হৈছে। চৰকাৰী চাৰু আৰু কাৰু কলা মহাবিদ্যালয়, অসমৰ সহযোগত আয়োজন কৰা এই প্ৰদৰ্শনীখন অহা ২৯ মাৰ্চলৈকে চলিব। নৱপ্ৰজন্মৰ প্ৰতিভাক জনসাধৰণৰ ওচৰলৈ অনাৰ উদ্দেশ্যে আয়োজিত এই প্ৰদৰ্শনীত কলা মহাবিদ্যালয়ৰ নিৰ্বাচিত ছাত্ৰ-ছাত্ৰীসকলৰ দৃষ্টিনন্দন শিল্পকৰ্মসমূহ প্ৰদৰ্শন কৰা হৈছে।
সমুদ্ৰ কাজল শইকীয়াৰ তত্বাৱধানত আৰু অনুপম শইকীয়াৰ সহ-তত্বাৱধানত আয়োজিত এই প্ৰদৰ্শনীখনত প্ৰায় ৪৪ গৰাকী নবীন শিল্পীৰ শেহতীয়া কৰ্মৰাজি উপস্থাপন কৰা হৈছে। দৰ্শকৰ সুবিধাৰ্থে আৰু শিল্পকৰ্মসমূহৰ বিষয়বস্তুৰ ওপৰত ভিত্তি কৰি সমগ্ৰ প্ৰদৰ্শনীখনক চাৰিটা মূল ভাগত বিভক্ত কৰা হৈছে। এই ভাগকেইটা হ‘ল— ‘দ্য লেণ্ডস্কেপিষ্টছ‘ (The Landscapists), ‘লেণ্ডস্কেপিং ইণ্টেৰিয়ৰ মনলগ‘ (Landscaping Interior Monologue), ‘চিয়িং এণ্ড লুকিং‘ (Seeing and Looking), আৰু ‘কালচাৰেল লেণ্ডস্কেপছ‘ (Cultural Landscapes)। এই ব্যতিক্ৰমী প্ৰদৰ্শনীৰ জৰিয়তে আধুনিক শিল্প ইতিহাসত সততে চৰ্চিত “লেণ্ডস্কেপ” ধাৰণাটোক এক নতুন আৰু বহল দৃষ্টিকোণৰ পৰা উপস্থাপন কৰাৰ প্ৰয়াস কৰা হৈছে।
প্ৰদৰ্শনীখনৰ মূল উদ্দেশ্য সন্দৰ্ভত তত্বাৱধায়ক সমুদ্ৰ কাজল শইকীয়াই এক তাৎপৰ্যপূৰ্ণ মন্তব্য আগবঢ়ায়। তেওঁৰ মতে, কেৱল এখন নিৰ্জীৱ ছবি অঁকাৰ সলনি, এই প্ৰদৰ্শনীয়ে দৰ্শকক লেণ্ডস্কেপৰ ধাৰণা, মানুহৰ তথাকথিত উন্নয়নৰ চিন্তা আৰু মানুহ তথা প্ৰকৃতিৰ মাজৰ জটিল সম্পৰ্কক লৈ পুনৰ চিন্তা কৰিবলৈ উৎসাহিত কৰিব। তেওঁ লগতে কয় যে ভাৰতীয় ভাষাত লেণ্ডস্কেপক “নিসৰ্গ” বুলি কোৱা হয়, যাৰ অৰ্থ হৈছে প্ৰকৃতি বা মানুহৰ স্পৰ্শৰ পৰা মুক্ত এক অৱস্থা। কিন্তু আধুনিকতাবাদী ধাৰণা অনুসৰি বৰ্তমান লেণ্ডস্কেপ মূলতঃ প্ৰকৃতিৰ ওপৰত মানুহৰ হস্তক্ষেপৰ এক প্ৰতীক হৈ পৰিছে, আৰু প্ৰদৰ্শনীখনে শিল্পকলাৰ জৰিয়তে এই বিশেষ দিশটোকেই উন্মোচন কৰিবলৈ চেষ্টা কৰিছে।
প্ৰদৰ্শনীৰ উদ্বোধনী অনুষ্ঠানটো এক অনাড়ম্বৰ অথচ গাম্ভীৰ্যপূৰ্ণ পৰিৱেশত অনুষ্ঠিত হয়। অনুষ্ঠানত উপস্থিত থাকি গুৱাহাটী আৰ্টিষ্টছ গীল্ডৰ সভাপতি খনিন দাস আৰু চৰকাৰী চাৰু আৰু কাৰু কলা মহাবিদ্যালয়ৰ অধ্যাপক ৰাতুল চন্দ্ৰ গগৈয়ে এনেধৰণৰ সহযোগিতামূলক উদ্যোগৰ ভূয়সী প্ৰশংসা কৰে। তেওঁলোকে মত প্ৰকাশ কৰে যে এনে পদক্ষেপে নৱাগত শিল্পীসকলক উৎসাহিত কৰাৰ লগতে ৰাজ্যৰ শিল্পকলাৰ উত্তৰণত গুৰুত্বপূৰ্ণ ভূমিকা পালন কৰিব। এই উদ্বোধনী অনুষ্ঠানটি সুচাৰুৰূপে পৰিচালনা কৰে গীল্ডৰ সম্পাদক নিখিলেশ্বৰ বৰুৱাই।
