গুৱাহাটী, ১৮ নৱেম্বৰ: গুৱাহাটীৰ সচেতন নাগৰিকৰ উদ্যোগত মঙলবাৰে অসমৰ প্ৰাণৰ শিল্পী জুবিন গাৰ্গৰ জন্মদিনটো ‘গছৰ দিন’ হিচাপে পালন কৰা হয় আৰু এই উপলক্ষে মহানগৰীত গছপুলি ৰোপন কাৰ্যসূচী ৰূপায়ণ কৰা হয়।
গছৰ দিন পালনৰ কাৰ্যসূচীৰ অংশ হিচাপে, দীঘলীপুখুৰী উদ্যানত, তাৰিণী চৰণ চৌধুৰী বহুমুখী বালিকা বিদ্যালয় চৌহদত আৰু হেদায়েৎপুৰ প্ৰাথমিক খেলপথাৰকে ধৰি কেইবাটাও স্থানত নাহৰকে ধৰি বিভিন্ন প্ৰজাতিৰ গছপুলি ৰোপণ কৰা হয়।
এই গছপুলি ৰোপন কাৰ্যসূচীটো আনুষ্ঠানিকভাৱে দীঘলীপুখুৰী উদ্যানৰ ভিতৰত বিশিষ্ট চিন্তানায়ক ড০ হীৰেন গোহাঁয়ে উদ্বোধন কৰে।
অনুষ্ঠানত ভাষণ দি ড০ গোহাঁয়ে প্ৰয়াত শিল্পীলৈ শ্ৰদ্ধাঞ্জলি জ্ঞাপন কৰাৰ লগতে গছৰ দিন পালনৰ উদ্দেশ্য ব্যাখ্যা কৰে।
ড০ গোহাঁয়ে কয়, “জুবিন গাৰ্গৰ মধুৰ স্মৃতিত গুৱাহাটীৰ সচেতন নাগৰিকৰ উদ্যোগত তেওঁৰ জন্মদিন উপলক্ষে আয়োজন কৰা এই বৃক্ষৰোপণ কাৰ্যসূচীত অংশগ্ৰহণ কৰি মই সুখী অনুভৱ কৰিছোঁ।”
গোহাঁইয়ে জুবিন গাৰ্গৰ প্ৰকৃতিৰ গভীৰ উপলব্ধিৰ ওপৰত গুৰুত্ব দি কয়, “জুবিন গাৰ্গে উপলব্ধি কৰিছিল যে মানুহ প্ৰকৃতিৰেই সন্তান। হাতী, বাঘ, সাপ, ভেকুলী, গঁড়কে ধৰি প্ৰতিটো বন্যপ্ৰাণীয়েই প্ৰকৃতিৰ সন্তান। দুৰ্ভাগ্যজনকভাৱে, কিছুমান লোকে উন্নয়নৰ নামত এই কথা পাহৰি গৈছে।”
পৰিৱেশৰ অৱক্ষয়ৰ ফলত হ’ব পৰা ভয়ংকৰ পৰিণতিৰ বিষয়ে সতৰ্ক কৰি ড০ গোহাঁইয়ে কয় ”প্ৰকৃতিৰ দুটা অমূল্য উপাদান—বায়ু আৰু পানীৰ অৱক্ষয়ৰ বাবে বন্যপ্ৰাণীয়ে এক সংকটৰ সন্মুখীন হৈছে। যদি বায়ু আৰু পানী প্ৰদূষিত হয়, তেন্তে পৃথিৱীৰ পৰা জীৱন সম্পূৰ্ণৰূপে ধ্বংস হৈ যাব। এই গুৰুত্বপূৰ্ণ বাৰ্তা বিয়পাই দিবলৈ আমি এই দিনটো ‘গছৰ দিন’ হিচাপে পালন কৰিছোঁ।”
গোহাঁইয়ে ধ্বংসাত্মক উন্নয়নমূলক শক্তিসমূহক সমালোচনা কৰি কয়, “আমি জ্ঞাতসাৰে বা অজ্ঞাতসাৰে আমাৰ পৰিৱেশ ধ্বংস যিসকলে ধ্বংস কৰিছে তেঁওলোকক জনাব বিচাৰোঁ যে আমি প্ৰকৃতিৰ বিৰুদ্ধে গৈ জীয়াই থাকিব নোৱাৰোঁ। উন্নয়নৰ নামত উন্মাদ হৈ পৰা সেইসকলৰ প্ৰকৃতি আৰু বন্যপ্ৰাণীৰ প্ৰয়োজন নাই; তেওঁলোকৰ কেৱল ধনৰহে প্ৰয়োজন। কেৱল ধন আহৰণ কৰিবলৈ তেওঁলোকে চাৰি-লেন আৰু ছয়-লেনৰ ঘাইপথৰ দৰে বিভিন্ন আন্তঃগাঁথনি প্ৰকল্প হাতত লৈছে।”
ৰাজনৈতিক বিশ্লেষক ড০ অপূৰ্ব কুমাৰ বৰুৱা, শিক্ষাবিদ ড০ ইন্দ্ৰাণী দত্ত, ইতিহাসবিদ ড০ মনোৰমা শৰ্মা, লেখিকা ৰাণী গোহাঁই আৰু জয়শ্ৰী বৰা, সাংবাদিক মহেশ ডেকা, প্ৰাক্তন সাংসদ উদ্ধৱ বৰ্মন, সমাজকৰ্মী এলেন ব্ৰুকছ, ৰবীন্দ্ৰনাথ দত্ত, কৰ্মী সংগীতা দাস, পূজা নিৰলা আৰু জয়ন্ত গগৈ, ইছফাকুৰ ৰহমান, সুপ্ৰকাশ তালুকদাৰ, যুৱ কবি কোকিল শইকীয়া আৰু যুৱ সাংবাদিক অঞ্জুমান ভৰদ্বাজ, আৰু কবি ৰশ্মিৰীয়া গগৈকে ধৰি গোটটোৰ কেইবাজনো বিশিষ্ট সদস্য আৰু অন্যান্য সচেতন নাগৰিকে এই অনুষ্ঠানত অংশগ্ৰহণ কৰে।
উল্লেখ্য যে ইয়াৰ পূৰ্বে, সোমবাৰে, গুৱাহাটীৰ সচেতন নাগৰিকৰ উদ্যোগত জুবিন গাৰ্গৰ সৃষ্টিৰাজিক উদযাপন কৰিবলৈ দীঘলীপুখুৰীত এক সাংস্কৃতিক সন্ধ্যাৰ আয়োজন কৰা হয়। এই অনুষ্ঠানত “জীয়া জুবিন” নামৰ এখন নাটক, জুবিন গাৰ্গৰ গীত পৰিৱেশন আৰু কবিতা পাঠ, আৰু মহেশ ডেকাৰ দ্বাৰা পৰিচালিত “বিয়ণ্ড দ্য ষ্টেজ: জুবিন গাৰ্গছ গ্ৰীণ ছিম্ফনী” নামৰ এখন তথ্যচিত্ৰ প্ৰদৰ্শন কৰা হয়।
