পৌৰ নিগমৰ এই দুটা নতুন নীতি নিৰ্দেশনা নামানিলে গুৱাহাটীত ঘৰ বনাব নোৱাৰিব আপুনি!
বুধবাৰে গুৱাহাটী পৌৰ নিগমৰ কাৰ্য্যায়লয় অনুষ্ঠিত হোৱা এখন গুৰুত্বপূৰ্ণ বৈঠকত গুৱাহাটী মহানগৰীত গৃহ নিৰ্মাণৰ ক্ষেত্ৰত কিছুমান বাধ্যবাধকতা আৰোপ কৰাৰ সিদ্ধান্ত গ্ৰহণ কৰিছে গুৱাহাটী পৌৰ নিগমে।
‘‘মহানগৰীত নতুনকৈ গৃহ নিৰ্মাণ কৰাৰ সময়ত এতিয়াৰে পৰা গৃহ নিৰ্মাণকাৰী সকলে বৰষুণৰ পানী সংৰক্ষণৰ ব্যৱস্থা আৰু জাৱৰ নিষ্কাশনৰ ব্যৱস্থা কৰিব লাগিব অন্যথা তেওঁলোকক গৃহ নিৰ্মাণৰ অনুমতি দিয়া নহ’ব’’-এই মন্তব্য নিগমৰ আয়ুক্ত দেবেশ্বৰ মালাকৰৰ।
আনহাতে, গৃহ নিৰ্মাণৰ লগত সংগতি ৰাখি এই দুয়োটা দিশ চোৱাৰ বাবে এখন বিশেষ তিনিজনীয়া সমিতি গঠন কৰা হৈছে আৰু এই সমিতিখনে বৰষুণৰ পানী সংৰক্ষণ আৰু জাৱৰ নিষ্কাশন ব্যৱস্থাৰ দিশটো চোৱা চিতা কৰিব।
মালাকৰে বৰষুণৰ পানী সংৰক্ষণ আৰু জাৱৰ সংৰক্ষণৰ বাবে নিগমে বিশেষ মডেলো প্ৰকাশ কৰিব বুলি জানিবলৈ দিয়ে।
দুৰ্গা পূজাৰ পাছতে পৌৰ নিগমে গঠন কৰি দিয়া বিশেষ সমিতিখনে দাখিল কৰিবলগীয়া প্ৰতিবেদনখনে উৰ্ধতম কৰ্তৃপক্ষৰ আনুমোদন লাভ কৰিলে ইয়াক সম্পূৰ্ণৰূপে কাৰ্য্যকৰী কৰা হ’ব।
উল্লেখযোগ্য যে, গুৱাহাটী মহানগৰীক স্বচ্ছ কৰি ৰখা আৰু মহানগৰীৰ খোৱা পানীৰ সংকট দুৰ কৰাৰ বাবে পৌৰ নিগমৰ এনে সিদ্ধান্ত গুৰুত্বপূৰ্ণ হিচাপে বিৱেচিত হৈছে।