২০২৩ চনৰ ৪ জুনৰ সেই দিনটো বিহাৰৰ ভাগলপুৰৰ বাবে আছিল এক আতংকৰ দিন। সুলতানগঞ্জত নিৰ্মীয়মান অগুৱানী-সুলতানগঞ্জ দলংখন হঠাতে এক প্ৰকাণ্ড শব্দ কৰি গংগা নদীত খহি পৰিছিল। এই ভয়ংকৰ দুৰ্ঘটনাই কেৱল বিহাৰতে নহয়, অসমৰ ৰাজধানী গুৱাহাটীতো তীব্ৰ জোকাৰণি তুলিছিল। ইয়াৰ কাৰণ আছিল গুৱাহাটীৰ পান বজাৰৰ পৰা উত্তৰ গুৱাহাটীলৈ সংযোগ কৰিবলগীয়া নিৰ্মীয়মান দলংখনৰ দায়িত্বতো আছিল একেখন কোম্পানী এছ পি এছ কনষ্ট্ৰাকচন ইণ্ডিয়া প্ৰাইভেট লিমিটেড।
বিহাৰৰ ঘটনাৰ পিছতে অসম চৰকাৰে আই আই টি গুৱাহাটীক ইয়াৰ নিৰ্মাণ কাৰ্য পৰীক্ষা কৰিবলৈ দিছিল যদিও সেই ৰিপৰ্ট এতিয়ালৈকে ৰাজহুৱা কৰা হোৱা নাই। কিন্তু দি ৰিপৰ্টাৰ্ছ কালেক্টিভ নামৰ এক অনুসন্ধানকাৰী সংস্থাৰ তথ্য অনুসৰি এই কোম্পানীটোৱে সেই একেটা বিত্তীয় বৰ্ষতে বিজেপিক ৫ কোটি টকাৰ বৰঙণি দিছিল।
এইটো কেৱল এটা বিচ্ছিন্ন ঘটনা নহয়। উত্তৰ-পূবৰ অসম, অৰুণাচল প্ৰদেশ, মণিপুৰ আৰু ত্ৰিপুৰাত চৰকাৰী ঠিকা পোৱা বহু কোম্পানী আৰু ব্যক্তিয়ে শাসকীয় দল বিজেপিক বৃহৎ পৰিমাণৰ ধন দান কৰাৰ এক বিশেষ ধাৰা দেখিবলৈ পোৱা গৈছে।
২০২২ চনৰ পৰা ২০২৪ চনৰ ভিতৰত এই চাৰিখন ৰাজ্যৰ পৰা বিজেপিয়ে চেক আৰু ইলেক্ট্ৰনিক মাধ্যমৰ জৰিয়তে মুঠ ৭৭.৬৩ কোটি টকা সংগ্ৰহ কৰিছিল। এই বৃহৎ অংকৰ ধনৰ প্ৰায় ৫৫ শতাংশই আহিছিল তেনেবোৰ কোম্পানী বা ব্যক্তিৰ পৰা যিয়ে ৰাজ্য বা কেন্দ্ৰীয় চৰকাৰৰ পৰা বিভিন্ন ঠিকা লাভ কৰিছিল বা চৰকাৰী অনুমতি লাভ কৰিছিল।
অসমৰ ক্ষেত্ৰত এই পৰিসংখ্যা আৰু অধিক চিন্তনীয়। ২০২৩-২৪ বৰ্ষত বিজেপি লাভ কৰা মুঠ বৰঙণিৰ ৫২ শতাংশতকৈও অধিক ধন চৰকাৰী ঠিকাদাৰৰ পৰা আহিছিল আৰু তাৰ আগৰ বছৰত এই পৰিমাণ আছিল প্ৰায় ৬৪ শতাংশ। ত্ৰিপুৰাত ২০২২-২৩ বৰ্ষত এই সংখ্যা আছিল অবিশ্বাস্য ৮৪ শতাংশ।
উত্তৰ-পূব ভাৰতৰ অৰ্থনীতি বহু পৰিমাণে কেন্দ্ৰীয় চৰকাৰৰ পুঁজিৰ ওপৰত নিৰ্ভৰশীল। ইয়াত ব্যক্তিগত খণ্ডৰ মূলধনৰ অভাৱৰ বাবে চৰকাৰী ঠিকা আৰু আন্তঃগাঁথনি নিৰ্মাণৰ কামবোৰেই অৰ্থনীতিৰ মূল চালিকা শক্তি হৈ পৰিছে।
অনুসন্ধানত দেখা গৈছে যে কেন্দ্ৰ আৰু ৰাজ্যত ক্ষমতাত থকা দলটোক বৃহৎ বৰঙণি দি ঠিকাদাৰসকলে নিজৰ ব্যৱসায় চলাই নিছে। অসমৰ ধানুকা গ্ৰুপে ২০২৩-২৪ বৰ্ষত বিজেপিক ৩.৩৫ কোটি টকা দান কৰিছিল। এই গ্ৰুপৰ অশোক ধানুকাৰ নাম পূৰ্বে ঝাৰখণ্ডৰ চৰকাৰ ভঙাৰ ষড়যন্ত্ৰৰ অভিযোগতো জড়িত হৈছিল। ধানুকা পৰিয়ালৰ দ্বাৰা পৰিচালিত কোম্পানীয়ে অসমৰ ৰাষ্ট্ৰীয় স্বাস্থ্য অভিযানৰ বহুতো ঠিকা লাভ কৰি আহিছে। একেদৰে বদৰী ৰায় এণ্ড কোম্পানী নামৰ প্ৰতিষ্ঠানটোৱে ১ কোটি টকা চান্দা দিছে। এই কোম্পানীটোৱে মেঘালয় বিধানসভাৰ গম্বুজ খহি পৰা বিতৰ্কত জড়িত থকাৰ পাছতো অসমত ১৪০ কোটি টকীয়া পুলিচ বেটেলিয়নৰ ভৱন নিৰ্মাণকে ধৰি বহু গুৰুত্বপূৰ্ণ কাম লাভ কৰিছে।
অৰুণাচল প্ৰদেশৰ ব্যৱসায়ী চামচন বোৰাঙেও ২০২৩-২৪ বৰ্ষত বিজেপিক ৪.৩ কোটি টকা দান কৰিছে। তেওঁৰ কোম্পানী চেডী এলাইড এজেন্সীৰ বিৰুদ্ধে আদালতত দুৰ্নীতিৰ অভিযোগত গোচৰ চলিছিল যদিও তেওঁ এই বৰঙণিৰ সৈতে ঠিকাৰ কোনো সম্পৰ্ক নাই বুলি দাবী কৰিছে। আনহাতে ষ্টাৰ চিমেন্টে যোৱা বছৰ বিজেপিক ৫ কোটি টকা দান কৰিছিল। বিশেষ কথাটো হ’ল সেই একেটা বছৰতে কোম্পানীটোৱে অসম চৰকাৰৰ সৈতে ৩২০০ কোটি টকীয়া এক ডাঙৰ প্ৰকল্পৰ বাবে বুজাবুজিৰ চুক্তি স্বাক্ষৰ কৰিছে। এই কোম্পানীটোৱে উত্তৰ-পূবৰ বিভিন্ন ৰাজ্যত ১৮টাতকৈও অধিক চৰকাৰী ঠিকা লাভ কৰিছে। কোম্পানীটোৱে অৱশ্যে জানিবলৈ দিছে যে তেওঁলোকে সকলো নিয়ম মানিহে দান দিছে আৰু অন্য ৰাজনৈতিক দলকো বৰঙণি আগবঢ়াইছে।
ভাৰতৰ নিৰ্বাচন আয়োগৰ ওচৰত দাখিল কৰা তথ্য বিশ্লেষণ কৰি অনুসন্ধানকাৰী দলটোৱে জনাইছে যে বহু ক্ষেত্ৰত বিজেপিয়ে দান দিয়া লোকৰ সম্পূৰ্ণ ঠিকনা লুকুৱাই ৰাখিছে যাৰ বাবে বহুতো দাতাৰ পৰিচয় উদ্ধাৰ কৰাটো কঠিন হৈ পৰিছে। যদিও চৰকাৰী ঠিকা পোৱা লোকে ৰাজনৈতিক দলক দান দিয়াটো আইনীভাৱে অবৈধ নহয়, কিন্তু ইয়াৰ আঁৰত থকা অঘোষিত বুজাবুজি আৰু সুযোগ-সুবিধা লাভৰ যি চক্ৰ চলিছে সেয়া গণতন্ত্ৰৰ বাবে এক ডাঙৰ প্ৰত্যাহ্বান। উত্তৰ-পূবৰ এই ঠিকাদাৰী অৰ্থনীতিয়ে কেনেকৈ ৰাজনৈতিক পৃষ্ঠপোষকতাত ফুলি-পালি উঠিছে সেইটোৱে এতিয়া সৰ্বত্ৰ চৰ্চাৰ বিষয় হৈ পৰিছে।
