মহানগৰীৰ এখন ব্যক্তিগত বিদ্যালয়ৰ সৈতে জড়িত ধন দাবীৰ অভিযোগত এজন তথাকথিত সংগঠনৰ সভাপতিক গ্ৰেপ্তাৰ কৰিছে গুৱাহাটী আৰক্ষীয়ে।
সৌন্দৰ্য যোগী ওৰফে মৌচম বৰুৱা নামৰ অভিযুক্তজন হিউমেন ৰাইটছ এণ্ড এণ্টি কৰাপশ্যন ফাউণ্ডেশ্যন নামৰ সংগঠনটোৰ সৈতে জড়িত বুলি জানিব পৰা গৈছে।
বাতৰি অনুসৰি, অভিযুক্তই গুৱাহাটীৰ লিটিল ষ্টেপছ নামৰ এখন বিদ্যালয়ৰ পৰা ২ লাখ টকা দাবী কৰাৰ অভিযোগ উত্থাপন হৈছে।
জানিব পৰা মতে, ধন দাবীৰ সৈতে জড়িত অভিযোগৰ পিছতে দিছপুৰ আৰক্ষীয়ে তথাকথিত নেতাজনক গ্ৰেপ্তাৰ কৰে।
বাতৰি অনুসৰি, ইয়াৰ পূৰ্বেও ৰাজ্যখনত চলি থকা বৃহৎ বাহন চুৰি আৰু জালিয়াতি চক্ৰৰ সৈতে জড়িত থকাৰ অভিযোগত সৌন্দৰ্য যোগীক গ্ৰেপ্তাৰ কৰা হৈছিল।
তেওঁৰ বিৰুদ্ধে অসমৰ বিভিন্ন গাড়ী এজেন্সীৰ পৰা বাহন ভাড়াত লৈ পিছলৈ অবৈধভাৱে বিক্ৰী কৰাত জড়িত বুলি অভিযোগ উঠিছে।
অভিযুক্ত এজন পৰিচিত প্ৰৱঞ্চক বুলি আৰক্ষীয়ে গম পায় আৰু বৰ্তমান তেওঁৰ বিৰুদ্ধে অধিক তদন্ত চলি আছে।
