গুৱাহাটী ক্ৰাইম ব্ৰাঞ্চে দ্য ৱায়াৰৰ প্ৰতিষ্ঠাপক সম্পাদক সিদ্ধাৰ্থ বৰ্ধৰাজনক সোধা-পোছাৰ বাবে হাজিৰ হ’বলৈ নিৰ্দেশ জাৰি কৰিছে। ভাৰতীয় নাগৰিক সুৰক্ষা সংহিতা (বিএনএছএছ), ২০২৩ৰ কেইবাটাও ধাৰাত ৰুজু হোৱা গোচৰৰ অধিনত জ্যেষ্ঠ সাংবাদিকগৰাকীক চমন কৰা হৈছে।
১২ আগষ্টত জাৰি কৰা জাননীখনত বৰ্ধৰাজনক ২২ আগষ্ট পুৱা ১১:৩০ বজাত পানবজাৰৰ থানাত তদন্তকাৰী বিষয়াৰ সন্মুখত হাজিৰ হ’বলৈ নিৰ্দেশ দিয়া হৈছে। বিএনএছএছৰ ধাৰা ৩৫(৩)ৰ অধীনত জাৰি কৰা চমনখনত কোৱা হৈছে যে এফআইআৰ/কেছ নং ০৩/২০২৫ৰ চলি থকা তদন্তৰ সৈতে জড়িত “তথ্য আৰু পৰিস্থিতি নিৰ্ণয় কৰিবলৈ তেওঁক সোধা-পোছা কৰাৰ যুক্তিসংগত ভিত্তি” আছে।
উল্লেখ্য যে এই গোচৰটোত নতুন ফৌজদাৰী আইনৰ ধাৰা ১৫২ (ভাৰতৰ সাৰ্বভৌমত্ব, ঐক্য আৰু অখণ্ডতাৰ প্ৰতি ভাবুকি কঢ়িয়াই অনা কাৰ্য্য), ধাৰা ১৯৬ (ধৰ্ম, জাতি, জন্মস্থান, বাসস্থান বা ভাষাৰ ভিত্তিত বিভিন্ন গোটৰ মাজত শত্ৰুতা প্ৰসাৰ কৰা), ধাৰা ১৯৭(১)(ঘ) (মিছা বা বিভ্ৰান্তিকৰ তথ্য প্ৰস্তুত কৰা বা প্ৰকাশ কৰা)। ভাৰতৰ সাৰ্বভৌমত্ব, ঐক্য, অখণ্ডতা বা নিৰাপত্তা), ধাৰা ৩(৬) (নিৰ্দিষ্ট অপৰাধমূলক জ্ঞান বা উদ্দেশ্যেৰে কৰা অপৰাধমূলক কাৰ্য্য), ধাৰা ৩৫৩ (জনসাধাৰণৰ উপদ্ৰৱ সৃষ্টি কৰা বক্তব্য), ধাৰা ৪৫ (অপৰাধমূলক কাৰ্য্যৰ বাবে উচটনি দিয়া), আৰু ধাৰা ৬১ (অপৰাধমূলক ষড়যন্ত্ৰ) ধাৰাত গোচৰ ৰুজু কৰিছে।
অপৰাধ শাখা পৰিদৰ্শক সৌমাৰজ্যোতি ৰয় স্বাক্ষৰিত এই জাননীখনত এনে চমনৰ বাবে বিশেষ নিৰ্দেশনাৰ কথা উল্লেখ কৰা হৈছে।
নৰ্থ ইষ্ট নাৱে পৰিদৰ্শকগৰাকীৰ সৈতে যোগাযোগ কৰোতে এফ আই আৰ সন্দৰ্ভত সবিশেষ প্ৰকাশ কৰিবলৈ অস্বীকাৰ কৰি কয় যে, “গোচৰৰ সবিশেষ আৰু কি ভিত্তিত এফ আই আৰ দাখিল কৰা হৈছে সেই বিষয়ে প্ৰকাশ কৰিব নোৱাৰি। অনুগ্ৰহ কৰি এফ আই আৰ সন্দৰ্ভত ডি চি পি (ক্ৰাইম ব্ৰাঞ্চ)ৰ সৈতে কথা পাতিবলৈ কয়।”
অৱশ্যে এই সন্দৰ্ভত উপ আৰক্ষী আয়ুক্ত (অপৰাধ শাখা) দেৱজিৎ নাথৰ পৰাও কোনো মন্তব্য লাভ কৰিবলৈ সক্ষম হোৱা নাই।
উল্লেখ্য যে ১২ আগষ্টত অপাৰেচন সিন্দূৰৰ এটা লেখাৰ সন্দৰ্ভত অসম আৰক্ষীয়ে দাখিল কৰা এক সুকীয়া গোচৰত বৰ্ধৰাজনক গ্ৰেপ্তাৰৰ পৰা অন্তৱৰ্তীকালীন সুৰক্ষা প্ৰদান কৰিছিল উচ্চতম ন্যায়ালয়ে।
দ্য ৱায়াৰে প্ৰকাশ কৰা এই লেখাটোৰ আধাৰত মৰিগাঁও আৰক্ষী থানাত ১৫২ ধাৰা আৰু বিএনএছএছৰ অধীনত অন্যান্য অপৰাধৰ গোচৰ ৰুজু কৰিছিল।
ন্যায়াধীশ সূৰ্য কান্ত আৰু জয়মল্য বাগচিৰ বিচাৰপীঠে দ্য ৱায়াৰ পৰিচালনা কৰা ফাউণ্ডেশ্যন ফৰ ইণ্ডিপেণ্ডেণ্ট জাৰ্নেলিজমৰ আবেদনৰ ভিত্তিত কেন্দ্ৰীয় চৰকাৰক জাননী জাৰি কৰে। ফাউণ্ডেশ্যনৰ এই আবেদনে নতুন বিধানৰ সাংবিধানিক বৈধতাক প্ৰত্যাহ্বান জনাই যুক্তি আগবঢ়ায় যে ই ঔপনিৱেশিক যুগৰ দেশদ্ৰোহ আইন, আৰু ভাৰতীয় দণ্ডবিধিৰ (আই পি চি) ধাৰা ১২৪এ ক অব্যাহত ৰখাৰ পথ মুকলি কৰিছে।
