দেশজুৰি শেহতীয়াকৈ চৰ্চালৈ অহা বাৰানসীৰ জ্ঞানৱাপী মছজিদৰ শিৱলিংগৰ প্ৰসংগত আজি উচ্চতম ন্যায়ালয়ত শুনানি গ্ৰহণ কৰা হয়। স্পৰ্শকাতৰ বিষয়টো সন্দৰ্ভত শুনানি গৰিহণ কৰি উচ্চতম ন্যায়ালয়ে কেইবাটাও গুৰুত্বপূৰ্ণ নিৰ্দেশ দিয়ে।
সেইমৰ্মে যি ঠাইত শিৱলিং পোৱা গৈছে সেই অঞ্চলটো সংৰক্ষিত কৰাৰ নিৰ্দেশ দিয়ে ন্যায়ালয়ে । উচ্চতম ন্যায়ালয়ে লগতে নিৰ্দেশ দিছে যে শিৱলিংগ পোৱা অঞ্চলটো সুৰক্ষিত কৰাৰ লগতে মুছলমানসকলক মছজিদত প্ৰৱেশ কৰাত কোনো ধৰণে বাধা দিব অথবা নামাজ পঢ়া বন্ধ কৰিব নোৱাৰিব।
আজি উচ্চতম ন্যায়ালয়ে বাৰাণসীৰ জ্ঞানৱাপী মছজিদ চৌহদৰ জৰীপৰ ওপৰত স্থগিতাদেশ বিচাৰি কৰা আবেদনৰ শুনানি গ্ৰহণ কৰে। ন্যায়াধীশ ডি ৱাই চন্দ্ৰচূড়ৰ নেতৃত্বত এখন বিচাৰপীঠে অঞ্জুমান ইণ্টেজামিয়া মছজিদ সমিতিৰ আবেদনৰ শুনানি গ্ৰহণ কৰে।
ইয়াৰ পূৰ্বে গোচৰটোৰ সম্পৰ্কত এলাহাবাদ উচ্চ ন্যায়ালয়ে নিৰ্দেশ দিছিল যে তেওঁলোকে মছজিদত জৰীপ বন্ধ কৰিবলৈ বা বিষয়টোত হস্তক্ষেপ নকৰে।
এই ৰায়ক প্ৰত্যাহ্বান জনাই অঞ্জুমানে ইন্তেজামিয়া মছজিদ সমিতিয়ে উচ্চতম ন্যায়ালয়ৰ দ্বাৰস্থ হয়। কাশীৰ জ্ঞানৱাপী মছজিদ পৰিচালনাৰ দায়িত্ব এই সমিতিৰ হাতত আছে।
ইপিনে, উচ্চতম ন্যায়ালয়ৰ শুনানিৰ পূৰ্বে সোমবাৰে বাৰাণসী আদালতৰ নিৰ্দেশত জ্ঞানৱাপী মছজিদৰ ওজুখানা বন্ধ কৰি দিয়া হয়।
জানিব পৰা গৈছে যে অঞ্জুমানে ইন্তেজামিয়া মছজিদ সমিতিয়েও এই আদেশক প্ৰত্যাহ্বান জনাই এখন আবেদন দাখিল কৰিব।
উল্লেখ্য যে তৃতীয় দিনৰ জৰীপৰ সময়ত মছজিদৰ ওজুখানাত এটা শিল পোৱা গৈছিল। এই পৰিস্থিতিত, এগৰাকী অধিবক্তাই শিলটো শিৱলিঙ্গ বুলি দাবী কৰি আদালতৰ কাষ চাপিছিল আৰু স্থনটো ছীল কৰিবলৈ অনুৰোধ কৰিছিল। এই সন্দৰ্ভত বাৰাণসী আদালতে ওজুখানা ছীল কৰাৰ নিৰ্দেশ দিয়ে।
অৱশ্যে, মুছলমান পক্ষই দাবী কৰে যে তাত পোৱা শিলটো শিৱলিঙ্গ নহয়, এটা ঝৰ্ণাহে। এইক্ষেত্ৰত বিভ্ৰান্তি বিয়পোৱা বুলি অভিযোগ কৰা হৈছে।
উল্লেখ্য যে আদালতৰ নিৰ্দেশত ১৪ মে’ত কাশীৰ জ্ঞানৱাপী মছজিদৰ জৰীপৰ কাম পুনৰ এবাৰ আৰম্ভ কৰা হৈছিল। দিল্লীৰ বাসিন্দা ৰাখী সিং, লক্ষ্মী দেৱী, সীতা চাহু আৰু অন্যান্যসকলে দাখিল কৰা আবেদনৰ পিছত বাৰাণসী জিলা আদালতৰ নিৰ্দেশত এই জৰীপটো চলোৱা হৈছে। অধ্যয়নটোৰ ভিডিঅ’গ্ৰাফাৰে দাবী কৰিছিল যে জৰীপ আৰু ভিডিঅ’গ্ৰাফীৰ সময়ত বাৰাণসীৰ জ্ঞানৱাপী-শৃংগাৰ গৌৰী কমপ্লেক্সৰ খুব ওচৰতে দুটা স্বস্তিকৰ চিহ্ন দেখা গৈছিল। তাৰ পিছতেই উত্তেজনা বিয়পি পৰে। পিছত প্ৰতিবাদৰ সন্মুখীন হৈ জৰীপটো পিছুৱাই দিয়া হয়।
আনহাতে, মুছলিম পক্ষই আয়ুক্তক অপসাৰণৰ দাবী জনায়। অৱশ্যে, আদালতে আয়ুক্ত বদলিৰ অনুৰোধ খাৰিজ কৰে। তদুপৰি, এই জৰীপটো দ্ৰুততাৰে সম্পূৰ্ণ কৰিবলৈ আৰু প্ৰতিবেদন দাখিল কৰিবলৈ নিৰ্দেশ দিয়ে।
জৰীপৰ সময়ত মছজিদৰ ভিতৰৰ এটা এলেকাত এটা শিৱলিঙ্গ পোৱা বুলি দাবী উঠাৰ পিছতে এটা গোচৰ ৰুজু কৰা হয় আৰু এতিয়া সমগ্ৰ বিষয়টো উচ্চতম ন্যায়ালয় পাইছে।
