আজি অসম বিধানসভাৰ প্ৰথম পৰ্য্যায়ৰ ৪৭টা সমষ্টিৰ নিৰ্বাচনী প্ৰচাৰৰ সামৰণি পৰিব। পুনৰ দ্বিতীয় পৰ্যায়ৰ নিৰ্বাচনৰ বাবে ব্যস্ত হৈ পৰিব ৰাজনৈতিক দলৰ নেতাসকল।
ইয়াৰ মাজতে যোৱা কেইদিন ধৰি নিৰ্বাচনী প্ৰচাৰে উত্তপ্ত কৰি তোলে ৰাজ্যখনক।
বিজেপিয়ে লানি নিছিগাকৈ ষ্টাৰ কেম্পেইনাৰক প্ৰচাৰত নমোৱাৰ বিপৰীতে মহাজোঁটৰ ষ্টাৰ কেম্পেইনাৰ হিচাপেও আছে কেইবাগৰাকীও নেতা।
কিন্তু দিল্লীৰ পৰা অহা ষ্টাৰ কেম্পেইনাৰৰ তুলনাত আমাৰ ‘লোকেল ষ্টাৰ কেম্পেইনাৰ’ৰ ভাষ্যসমূহেহে অসমৰ ৰাইজক অধিক আকৰ্ষণ কৰা দেখা গৈছে।
ধন আৰু ক্ষমতাৰে বাহুবলী বিজেপিৰ লোকেল ষ্টাৰ কেম্পেইনাৰ মামা হিমন্তই ইতিমধ্যে ইমূৰৰ পৰা সিমূৰলৈ বুলি উধাতু খাই দৌৰি ফুৰিছে, নাচিছে, বাইকত উঠিছে আৰু সময়ে সময়ে ৰস প্ৰদানৰ চেষ্টা কৰি কটাক্ষও কৰিছে বিৰোধীক।
কিন্তু ইয়াৰ বিপৰীতে মাহজোঁটৰ এগৰাকী লোকেল ষ্টাৰ কেম্পেইনাৰৰ ৰূপত উজলি উঠিছে বিপিএফৰ মুৰব্বী হাগ্ৰামা মহিলাৰী।
শেহতীয়াকৈ হাগ্ৰামা মহিলাৰী সংবাদ মাধ্যমৰ বাবেও আকৰ্ষণৰ কেন্দ্ৰ হৈ পৰিছে। ইয়াৰ কাৰণ হৈছে নেতাগৰাকীয়েও আগবঢ়োৱা কিছুমান অকপট মন্তব্য।
‘হিমন্ত মোৰ গুৰু নহয়, মইহে হিমন্তৰ গুৰু’ বুলি কৈ হাগ্ৰামাই নিৰ্বাচনী প্ৰচাৰৰ যুঁজখনক নতুন মাত্ৰা আনি দিয়ে।
হাগ্ৰামাই এইদৰেও কয় যে হিমন্তৰ মুখ্যমন্ত্ৰী হোৱাৰ বাবে ভাগ্যও নাই, যোগ্যতাও নাই। মুঠৰ ওপৰত হিমন্তক বাৰে বাৰে আক্ৰমণৰ লক্ষ্য কৰি লৈ হাগ্ৰামাই বিজেপি মিত্ৰজোঁটৰ প্ৰচাৰক বহুখিনি নিষ্প্ৰভ কৰি তুলিবলৈ সক্ষম হৈছে।
আনহাতে, চিলাপথাৰত কংগ্ৰেছ মহাজোটৰ প্ৰাৰ্থী ডঃ হেম হৰি প্ৰসন্ন পেগুৰ হৈ প্ৰচাৰ চলাই বিজেপিৰ বিৰুদ্ধে আক্ৰমণাত্মক হৈ পৰে হাগ্ৰামা মহিলাৰী।
হাগ্ৰামাই কয়,’’বিজেপিৰ মিছা কোৱাটো অভ্যাস। পাঁচ বছৰ গ’ল, বিজেপিৰ লগত থাকি তেওঁলোকে কি কৰে মই জানো, সেইকাৰমেই বিজেপি এৰি আহিছোঁ।‘’
হাগ্ৰামাই লগতে কয়,’’মই হিমন্তৰ বিৰোধী, হিমন্ত কংগ্ৰেছত আহিলে মই বিজেপিত যাম।‘’
বিপিএফৰ মুৰব্বীগৰাকীয়ে লগতে বিজেপিৰ চৰকাৰ এইবাৰ নহয়, চৰকাৰ কংগ্ৰেছৰ নেতৃত্বত মহাজোঁটৰহে হ’ব বুলিও দোহাৰি আহিছে।
