চল চাই চাপৰি বজোৱাত পাকৈত বিপিএফ প্ৰধান হাগ্ৰামা মহিলাৰীয়ে।
বিটিছি পৰিষদীয় নিৰ্বাচনৰ পূৰ্বে হিমন্ত বিশ্ব শৰ্মাক গালি-শপনি পাৰি আহিছিল আৰু হিমন্ত বিশ্ব শৰ্মা কেতিয়াও মুখ্যমন্ত্ৰী হ’ব নোৱাৰে বুলিও প্ৰসংগক্ৰমে দাবী কৰিছিল।
তাৰোপৰি, বিধানসভা নিৰ্বাচনৰ পূৰ্বে মহাজোঁটত চামিল হৈ বিজেপিৰ লগতে হিমন্ত বিশ্ব শৰ্মাৰ বিৰুদ্ধেও ক্ষোভ উজাৰিছিল হাগ্ৰামা মহিলাৰীয়ে।
কিন্তু সেই হাগ্ৰামা মহিলাৰীয়ে এতিয়া হিমন্ত বিশ্ব শৰ্মাই হওঁক বা বিজেপিয়ে হওঁক কাৰো বিৰুদ্ধে ক্ষোভ নাই।
মুখ্যমন্ত্ৰী হিমন্ত বিশ্ব শৰ্মাৰ লগতে কেবিনেট মন্ত্ৰীৰ শপতগ্ৰহণ অনুষ্ঠানত উপস্থিত থাকি হাগ্ৰামা মহিলাৰীয়ে হিমন্ত বিশ্ব শৰ্মা মুখ্যমন্ত্ৰী হোৱাৰ বাবে নিজকে সুখী বুলি দাবী কৰাৰ লগতে তেওঁৰ এজন ভাল বন্ধু বুলিও দাবী কৰে।
তেওঁ কয় ‘হিমন্ত বিশ্ব শৰ্মা মুখ্যমন্ত্ৰী হৈছে খুব ভাল লাগিছে। আমাৰেই বন্ধু, খুব ভাল বন্ধু। নিৰ্বাচনৰ সময়ত কথাৰ কিবা কিবি হৈছিল সেইবোৰ এতিয়া বাদ দিয়ক।‘
ইপিনে, কিছুদিনৰ পূৰ্বে মহাজোঁটৰ অংশীদাৰ হোৱা হাগ্ৰামাই বিপিএফৰ পূৰ্বৰ দৰেই বিজেপিৰ সৈতে সম্পৰ্ক থাকিব বুলিও দাবী কৰে।
সাংবাদিকে নিৰ্বাচনৰ পূৰ্বৰ কথা সোঁৱৰাই দিয়াত তেওঁ কয় ‘আমাৰ আগৰ যি সম্পৰ্ক আছিল সেয়া একেই থাকিব। এতিয়া খুব ভাল যোগাযোগ আছে নিৰ্বাচনৰ কথাবিলাক বাদ দিয়ক। হিমন্ত বিশ্ব শৰ্মা মুখ্যমন্ত্ৰী হোৱাত ভাল পাইছো আৰু আমি শুভেচ্ছাও জনাইছো।‘
উল্লেখযোগ্য যে, নিৰ্বাচনৰ পূৰ্বে হিমন্ত বিশ্ব শৰ্মাইয়ো হাগ্ৰামা মহিলাৰীক গ্ৰেপ্তাৰ কৰি জেইলত ভৰোৱাৰ হুংকাৰ দিছিল।
ইপিনে, শপত গ্ৰহণ অনুষ্ঠানৰ পূৰ্বে বিপিএফৰ চিৰবৈৰী য়ুপিপিএলৰ সভাপতি তথা বিটিছি প্ৰধান প্ৰমোদ বড়োৰ সৈতে একেখন মেজতে বহি আহাৰ গ্ৰহণ কৰে হাগ্ৰামা মহিলাৰীয়ে।
ইতিমধ্যে সেই ফটো ছ’চিয়েল মিডিয়াত ভাইৰেল হৈ পৰে।
সুযোগ সন্ধানী হাগ্ৰামা মহিলাৰীয়ে ইতিমধ্যে বহুবাৰ নিজৰ স্থিতি সলনি কৰিছিল আৰু এয়া হাগ্ৰামা মহিলাৰীৰ বাবে কোনো নতুন নহয়।
