আলোচনাৰ গতিধাৰাই যদিও বিটিচিত বিজেপি-ইউপিএলৰ চৰকাৰ গঠনৰ সম্ভাৱনা প্ৰকট কৰিছে তথাপি সংবাদমেল পাতি বিজেপিক মিত্ৰতাৰ ধৰ্ম সোঁৱৰাই দিলে হাগ্ৰামা মহিলাৰীয়ে।
বিটিচিৰ শেহতীয়া নিৰ্বাচনী পট পৰিবৰ্তনে একপ্ৰকাৰ দিশহাৰা কৰি তোলা বিপিএফৰ মুৰব্বী হাগ্ৰামা মহিলাৰীয়ে আজি পুৱা ১০.২৫ বজাত কোকৰাঝাৰাত অনুষ্ঠিত কৰে এখন সংবাদমেল।
বিটিচিৰ নিৰ্বাচনত ১৭ খন আসন লাভ কৰি সংখ্যাগৰিষ্ঠ আসন লাভ কৰা দলত পৰিণত হোৱা বিপিএফে এতিয়া কেৱল বিজেপিৰ সমৰ্থন পালেহে বিটিচিত চৰকাৰ গঠন কৰিব পাৰিব।
চৰকাৰ গঠনৰ ক্ষেত্ৰত বিজেপিয়ে বিপিএফক এতিয়াও সহায় কৰিব বুলি আশাবাদী হাগ্ৰামা মহিলাৰী।
কোকৰাঝাৰত আয়োজিত সংবাদমেলত সেই আশাই ব্যক্ত কৰি হাগ্ৰামাই কয় যে ২০১৬ চনৰ পৰাই বিধানসভাত বিজেপিৰে মিত্ৰতা অব্যাহত আছে।
দিল্লীতো বিজেপিৰে বিপিএফৰ মিত্ৰতা বাহাল আছে।
এনে পৰিস্থিতিত বিজেপিয়ে মিত্ৰতাৰ ধৰ্ম মানি চলি বিপিএফক চৰকাৰ গঠনৰ ক্ষেত্ৰত সহায় কৰিবলৈ হাগ্ৰামাই গেৰুৱা দলটোৰ শীৰ্ষ নেতৃত্বক আহ্বান জনায়।
তেওঁ কয় যে যদি দিল্লী-দিছপুৰত বিজেপিয়ে Betray নকৰে তেন্তে বিটিচিত বিজেপি-বিপিএফৰেই চৰকাৰ হ’ব।হিমন্ত বিশ্বৰ সৈতে নিৰ্বাচনী প্ৰচাৰৰ সময়ত হোৱা তিক্ত বাক্ যুদ্ধৰ কথা এতিয়া পাহৰি যোৱা বুলিও হাগ্ৰামাই সংবাদমেলত তাৎপৰ্যপূৰ্ণ মন্তব্য কৰে।
তেওঁ লগতে কয় যে বিধানসভাত বিজেপিৰে থকা মিত্ৰতা এতিয়াও বাহাল আছে আৰু ভৱিষ্যতেও থাকিব।
ইপিনে গুৱাহাটী মহানগৰীৰৰ হোটেল লিলিত আজি পুৱা বিজেপি আৰু ইউপিপিএলৰ বিজয়ী প্ৰাৰ্থীসকলে এক ফটো ছেছন কৰে আৰু ইয়াৰ পিছতে মুখ্যমন্ত্ৰী সৰ্বানন্দ সোণোৱালৰ সৈতে আলোচনা কৰাৰ বাবে মুখ্যমন্ত্ৰীৰ চৰকাৰী বাসভৱনলৈ যাত্ৰা কৰে।
