বি পি এফৰ সভাপতি তথা বিটিচি প্ৰধান হাগ্ৰামা মহিলাৰীয়ে আগন্তুক লোকসভা নিৰ্বাচন আৰু অগপ, বিজেপিৰে মিত্ৰতা সন্দৰ্ভত মন্তব্য আগবঢ়াই কয় যে তেওঁৰ দল লোকসভা নিৰ্বাচনৰ বাবে সম্পুৰ্ণ ৰূপে সাজু হৈছে।
শুকুৰবাৰে সাংবাদিকৰে হোৱা সাক্ষাৎকাৰত হাগ্ৰামা মহিলাৰীয়ে কোকৰাঝাৰ লোকসভা সমষ্টিত বিপিএফ দলে প্ৰাৰ্থিত্ব আগবঢ়াব আৰু মংগলদৈ সমষ্টিকে ধৰি অন্যান্য সমষ্টিত বিজেপি আৰু অগপৰ মিত্ৰতাৰ প্ৰাৰ্থীক সমৰ্থন জনাব বুলি উল্লেখ কৰে। বিজেপিৰ সৈতে অগপই মিত্ৰতা ভংগ কৰিলেও বি পি এফৰ সৈতে অগপৰ মিত্ৰতা অক্ষুন্ন আছে বুলি হাগ্ৰামাই তাৎপৰ্যপূৰ্ণ মন্তব্য কৰে।
বৰ্তমানৰ সাংসদ নৱ কুমাৰ শৰণীয়া সন্দৰ্ভত মন্তব্য প্ৰকাশ কৰি হাগ্ৰামাই কয় যে এইবাৰ কোকৰাঝাৰ সমষ্টিত মূল যুঁজখন হ’ব বি পি এফ আৰু ইউ পি পি এলৰ প্ৰাৰ্থীৰ মাজত, নৱ কুমাৰ শৰণীয়া প্ৰতিদ্বন্দ্বিতাৰ মাজলৈয়ে নাহে। বিগত লোকসভা নিৰ্বাচনৰ সময়ত বিটিচি অঞ্চলত এন্টি বড়ো আবেগ সৃষ্টি কৰি নৱ কুমাৰ শৰণীয়া বিজয়ী হৈছিল কিন্তু এইবাৰ পুনৰ সেই পন্থাৰে তেওঁ বিজয়ী হ’ব নোৱাৰিব বুলি তাৎপৰ্য্যপূৰ্ণ মন্তব্য কৰে বিটিচি প্ৰধান জনে।
আনহাতে, কংগ্ৰেছে ইতিমধ্যে লোকসভা নিৰ্বাচনৰ প্ৰতিদ্বন্দ্বিতাৰ পৰা বাহিৰ হৈছে বুলিও উল্লেখ কৰে মহিলাৰীয়ে।
